नेपाल दूरसञ्चार प्राधिकरणले आयात गरेकाे अर्बौंको प्रविधिले के काम गर्छ ?

A+ A A-

नेपाल दूरसञ्चार प्राधिकरणका लागि खरिद गरेर नेपाल ल्याइएका सामग्री कानुन र आवश्यकताअनुसार नै भएको प्राधिकरणले दाबी गरेको छ ।

प्राधिकरणले लेवनानस्थित भेनाराइज सोलुसन कम्पनीमार्फत १ अर्ब १२ करोड मूल्यबराबरको सामग्री नेपाल भित्र्याएको थियो । तर, उक्त सामग्रीमा ठूलो कमिसनको खेल भएको र वास्तविक मूल्यभन्दा अत्यधिक बढी मूल्य तिरेर सामग्री आयात गरेको देखिएपछि भन्सार कार्यालयले रोकेको हो ।

उक्त विषय विवादमा परेपछि प्राधिकरणले विज्ञप्ति नै जारी गरेर प्राविधिक सामग्रीको आवश्यकताबारे स्पष्ट पारेको हो । ‘सार्वजनिक खरिद ऐन-२०६३ र सार्वजनिक खरिद नियमावली २०६४ अनुसार आयातपत्र माग गरी छनोटमा परेको कम्पनीमार्फत प्राधिकरणका लागि आवश्यक सामग्री खरिद भएको र यसबारे अनावश्यक हल्ला फैलाउन खोजिएको छ,’ विज्ञप्तिमा भनिएको छ ।

भन्सार कार्यालय स्रोतका अनुसार भेनाराइज सोलुसन कम्पनीले १ अर्ब १२ करोड रुपैयाँको सामग्री नेपाल भित्र्याएको र उक्त मूल्य कृत्रिम छ । भेनाराइज सोलुसन कम्पनीले नेपाल भित्र्याएको सामग्रीबारे भन्सार कार्यालयले छुट्टै विज्ञ टोलीमार्फत जाँचबुझ गराएको छ ।

विज्ञ टोलीले समेत प्राधिकरणका लागि आयात भएको सामग्रीमा ठूलो कमिसनको खेल भएको र राष्ट्रको पुँजी रोक्न सल्लाह दिएको भन्सार कार्यालय स्रोतको भनाइ छ । भेनाराइज सोलुसन कम्पनीले प्राधिकरणका लागि सर्भर, ल्यापटप र कल फोन आयात गरेको छ, जसमा एउटै ल्यापटपको मूल्य ६५ लाख रुपैयाँ छ । त्यस्तै, एउटै सर्भरको मूल्य १ करोड राखिएको छ ।

प्राधिकरणका सहायक प्रवक्ता अच्युतानन्द मिश्रले दूरसञ्चारका लागि आउने प्राविधिक सामग्री (ट्राफिक मोनिटरिङ) प्राधिकरणको गुणस्तर वृद्धिका लागि आयात गरिएको बताए ।

ल्यापटप र त्यसका लागि आवश्यक ड्राइभ टेस्ट, कन्ट्रोल प्यानल महँगो भएकाले ल्यापटपको मूल्य ६५ लाख पुगेको उनको दाबी छ । यसअघि प्राधिकरणका लागि आवश्यक खरिद प्रक्रिया नै विवादमा परेको थियो । जसका कारण २०७६ मा खरिद प्रक्रिया नै रद्द गरेको थियो । तर, प्राधिकरणका लागि आवश्यक सामग्री आफैँले ल्याउन पाउनुपर्ने मागसहित लेबनानस्थित भेनराइज सोलुसन कम्पनी सर्वोच्च पुगेको थियो ।

सर्वोच्चले २०७८ मा भेनराइज कम्पनीलाई नै ल्याउन दिने आदेश गरेको थियो । सोहीबमोजिम कम्पनीले प्राधिकरणका लागि सामग्री नेपाल भित्र्याएको हो । भन्सार स्रोतका अनुसार, सामग्री लेबनानको कम्पनीले 'ट्याक्स हेभन' मुलुक साइप्रसबाट नेपाल भित्र्याएको खुलेको छ ।

के काम गर्छ प्राधिकरणले ल्याएको अर्बौंको सामग्रीले ?

भेनाराइज सोलुसनले प्राधिकरणका लागि पहिलो चरणमा भी-प्रो १ सय ९ सेट, ड्राइभ टेस्ट किट र कन्ट्रोल प्यानल, २ थान ल्यापटप र ८ थान सेल फोन नेपाल भित्र्याएको छ । उक्त सामग्रीको काम दूरसञ्चार प्रदायक कम्पनीहरूमाथि निगरानी गर्नु हो ।

प्राधिकरणका सहायक प्रवक्ता अच्युतानन्द मिश्रले भने, ‘हामीले आयात गरेको सामग्रीको काम दूरसञ्चार प्रदायक कम्पनीहरूको सेवा कति प्रभावकारी छ, कति नेपालभित्रबाट फोन हुन्छ, कति विदेशी कलहरू आउँछन्, त्यसको मोनिटरिङ गर्नु हो । त्योबाहेक दूरसञ्चारको प्रयोगमार्फत कर छली गरे/नगरेकोबारे पनि थाहा हुन्छ ।’

पहिलो चरणको सामग्रीबाहेक प्राधिकरणका लागि भेनाराइज सोलुसनले करिब ३ अर्ब रुपैयाँबराबरको प्राविधिक सामग्री ल्याउने जिम्मा पनि पाएको छ ।