भोजपुरमा पालैपालो जितेका शेरधन र सुदनको तेस्रो भिडन्त, कसको पल्ला भारी (भिडियो)

भोजपुरमा पालैपालो जितेका शेरधन र सुदनको तेस्रो भिडन्त, कसको पल्ला भारी (भिडियो)

A+ A A-

तत्कालीन नेकपा माओवादी सशस्त्र युद्धमा रहेकै बेला २०५६ मा भएको आम चुनावमा कान्छो सांसद हुँदै प्रतिनिधिसभा छिरेका थिए, शेरधन राई । प्रदेश १ का पूर्वमुख्यमन्त्रीसमेत रहेका उनी यस पटक पनि भोजपुरबाट प्रतिनिधिसभामा आउन चुनावी मैदानमा उत्रिएका छन् ।

शेरधनका चुनावी प्रतिस्पर्धी हुन्, नेकपा (माओवादी केन्द्र) का नेता सुदन किराती । उनी पनि चुनावी अभियानमा व्यस्त छन् । शेरधनसँग सुदनको यसपटक हुन लागेको चुनावी प्रतिस्पर्धा तेस्रो हो ।

पहिलो संविधानसभा चुनाव २०६४ मा शेरधनलाई सुदनले पराजित गरेका थिए । तर, २०७० मा भने सुदन शेरधनबाट पराजित भए । २०७४ मा भएको प्रतिनिधिसभा चुनावमा भने वाम गठबन्धनबाट शेरधन प्रदेशसभा र सुदन प्रतिनिधिसभाको उम्मेदवार बने । दुवैले जिते ।

यस पटक सुदन लोकतान्त्रिक–वाम गठबन्धनको साझा उम्मेदवार बनेका छन् । गठबन्धनमा माओवादीसँगै नेपाली कांग्रेस र नेकपा (एकीकृत समाजवादी) छन् । शेरधन भने एमालेका उम्मेदवार हुन् ।

दुवै उम्मेदवारले आफूले चुनाव जित्ने दाबी गरिरहेका छन् । ‘चुनावबाट म अनुमोदित हुन्छु नै । जिल्लाभर मेरो पक्षमा माहोल छ,’ सुदनले शिलापत्रसँग भने ।

शेरधनले पनि कसैले छोड्न नपर्ने र सबैलाई आउँ आउँ लाग्ने भोजपुर बनाउने अठोट रहेको बताउँदै चुनावबाट प्रतिस्पर्धी उम्मेदवार सुदनलाई जित्ने दाबी गरेका छन् ।

एक मात्र प्रतिनिधिसभाको निर्वाचन क्षेत्र रहेको भोजपुरमा अरुण, आमचोक, टेम्केमैयुङ, पौवादुङ्मा, रामप्रसाद राई, साल्पासिलिछो र हतुवागढी गाउँपालिका छन् भने भोजपुर र षडानन्द नगरपालिका छन् ।

गत स्थानीय चुनावमा वडाध्यक्षहरूले पाएको मतका आधारमा एमाले पहिलो दलका रूपमा रहेको देखिन्छ । तर, पाँच दलीय गठबन्धनको मत जोड्दा भने एमाले पछाडि छ । वडाध्यक्षहरूले पाएको मतका आधारमा एमालेले स्थानीय चुनावमा २७ हजार ६५६ मत पाएको छ ।

त्यस्तै सत्ता गठबन्धनमा रहेको नेपाली कांग्रेसले २३ हजार ५९९, माओवादी केन्द्रले १४ हजार ७६१ र एकीकृत समाजवादीले १ हजार ९०६ मत पाएका छन् । जनता समाजवादी पार्टीले १ हजार ६४७ मत पाएको छ ।

यस आधारमा सुदन उम्मेदवार बनेको सत्ता गठबन्धनको मत ३८ हजार ५५६ छ । यो मत शेरधनको दल एमालेका वडाध्यक्षहरूले पाएको भन्दा १० हजार ९०० कम हो ।

यो परिणामको आधारमा सुदनको पल्ला भारी देखिन्छ । तर, उनका लागि चुनौती भनेको कांग्रेसको मत कति आउँछ भन्ने हो । स्थानीय चुनावमा तालमेल गर्दा पनि धेरै स्थानीय तहमा कांग्रेसको मत माओवादी, एकीकृत समाजवादी र जनता समाजवादी पार्टीका उम्मेदवारलाई परेन । विगतको यो तथ्यले गर्दा सुदनले चुनाव जित्छन् नै भन्ने निश्चित गर्ने अवस्था छैन । यस कारण जितको यकिन भने ४ मङ्सिरपछि हुनेछ ।

शेरधन प्रदेश १ को मुख्यमन्त्रीका अतिरिक्त सङ्घीय सरकारको सञ्चार तथा सूचना प्रविधिमन्त्री भइसकेका नेता हुन् । सुदन पनि दुई पटक सांसद भइसकेका छन् । सुदन बेदागी नेता हुन् । तर, उनीहरूलाई यस पटक भने स्वतन्त्र उम्मेदवार दिलिप पौडेलदेखि रमेश ओझाले पनि चुनौती थपेका छन् ।

हेर्नुस् भिडियोः