कर्णालीको एउटै मञ्चमा पुगेका गठबन्धनका शीर्ष नेता- ओलीको आलोचना, गठबन्धनको बचाउ

कर्णालीको एउटै मञ्चमा पुगेका गठबन्धनका शीर्ष नेता- ओलीको आलोचना, गठबन्धनको बचाउ

A+ A A-

आगामी प्रतिनिधिसभा र प्रदेशसभा चुनावका लागि गठबन्धन बनाएर होमिएका पाँच दलीय नेपाली कांग्रेस, नेकपा माओवादी केन्द्र, एकीकृत समाजवादी र राष्ट्रिय जनमोर्चाका शीर्ष नेताहरू आइतबार कर्णाली प्रदेशको एउटै मञ्चमा देखिए ।

चुनावी चटारोका बीच देश दौडाहामा रहेका गठबन्धनका शीर्ष नेताले आइतबार सुर्खेतमा आयोजित पाँच दलीय गठबन्धनको प्रदेशस्तरीय कार्यकर्ता भेलामा सम्बोधन गरे । नेपाली कांग्रेसका सभापति एवं प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल (प्रचण्ड), नेकपा एकीकृत समाजवादीका अध्यक्ष माधव नेपाल र कांग्रेसका वरिष्ठ नेता रामचन्द्र पौडेलले एकताको सन्देश दिँदै संविधानको रक्षा र प्रतिगमनविरुद्ध गठबन्धन बनेको उद्घोष गरे । उनीहरूले गठबन्धनको बचाउ मात्रै गरेनन् नेकपा एमालेका अध्यक्ष केपी ओलीको पालैपालो आलोचना गरे ।

देउवाले पाँच दलीय गठबन्धन कर्णालीका लागि मात्रै नभई देशका लागि ऐतिहासिक रहेको तर्क गरे । गठबन्धनबाट उम्मेदवार बनेका कर्णालीका ३६ निर्वाचन क्षेत्रका उम्मेदवार सहभागी रहेको कार्यक्रममा देउवाले गठबन्धन लामो समय टिक्ने दाबी गरे ।

‘संविधान र संघीयतालाई बचाउने काम गठबन्धनले गरेको छ । परिवर्तनकारी शक्तिहरू एक ठाउँमा उभिएका छौँ । यो गठबन्धन लामो समय जान्छ,’ देउवाले भने । एमाले अध्यक्ष केपी ओलीले देशको राष्ट्रिय सार्वभौमिकतामाथि कुठराघात गर्दै संविधानको बर्खिलाप गरेपछि गठबन्धन जन्मिएको देउवाको तर्क थियो ।

संविधान र गणतन्त्रको रक्षाका लागि गठबन्धनको जित हुनुपर्ने उल्लेख गर्दै विजयका लागि एकताबद्ध हुन आवश्यक रहेको देउवाको भनाइ छ । गठबन्धनविरुद्ध उम्मेदवारी दिएकालाई उम्मेदवारी फिर्ता लिन आग्रह गर्दै देउवाले आवश्यकताअनुसार अवसर दिने वचन दिए ।

माओवादी केन्द्रका अध्यक्ष प्रचण्डले गठबन्धन दलका नेताहरू एकताबद्ध छन् भनेर देखाउन सातै प्रदेशमा एकताको सन्देश दिन आएको बताए । एमाले अध्यक्ष ओलीले लोकतान्त्रिक आन्दोलनमाथि कुठराघातको मौका खोजीरहेको उनको भनाइ छ । ओलीले गर्न खोजेको लोकतान्त्रिक आन्दोलनमाथिको अन्तर्घात परिवर्तनकारी शक्तिको प्रयासका कारण असफल भएको प्रचण्डले बताए ।

‘कुनै बेला ओली गोरुगाडा चढेर अमेरिका पुगिँदैन भनेर भन्थे । तर, पछि तिनै मान्छे हस्ताक्षर गर्न अघि सरे । तर, पनि उनको सोचमा परिवर्तन आएको रहेनछ,’ प्रचण्डले भने ।

गठबन्धनलाई हल्का रूपमा नलिन चेतावनी दिँदै प्रचण्डले बागी उम्मेदवारलाई उम्मेदवारी फिर्ता लिन आग्रह गरे । कर्णालीबाट सुरु भएको प्रतिगमनविरुद्धको विद्रोहले केन्द्रमा प्रवेश पाएको बताउँदै प्रचण्डले बागी उम्मेदवारलाई कुनै न कुनै ठाउँमा अवसर दिने प्रतिबद्धता जनाए ।

एकीकृत समाजवादीका अध्यक्ष नेपालले धेरै कोसिस गर्दा पनि ओली नसुध्रिएको टिप्पणी गरे । गठबन्धनको अभियानमा एकजुट हुन उनले पनि आग्रह गरे । नेपाली राजनीतिमा व्यक्तिवादी प्रवृत्तिको नेतृत्व एमाले अध्यक्ष ओलीले गरेको उनको भनाइ छ ।

‘नेपालको राजनीतिमा व्यक्तिवादी हावी भएको छ । ओलीले व्यक्तिकेन्द्रित सत्ता चलाएर संविधान कुल्चँदै देखएको अधिनायकवादी चरित्रले देशलाई अस्तव्यस्त बनाए,’ नेपालले भने, ‘ओलीले देश भाँडमा जावस्, जनता जता पो जाउन्, मेरो स्वार्थ जसरी पनि पूरा हुनुपर्छ भन्ने मनस्थितिले राज्यसत्ता सन्चालन गरे ।’

चुनाव लड्नका लागि मात्रै नभइ जित्नका लागि उम्मेदवार बन्न नेपालको आग्रह थियो ।

सभालाई सम्बोधन गर्दै नेपाली कांग्रेसका वरिष्ठ नेता रामचन्द्र पौडेलले एमाले अध्यक्ष ओलीबाट देशमा जघन्य अपराध भएको दाबी गरे । पौडेलले देशलाई प्रतिगमनबाट जोगाउन गठबन्धन एउटा अभियान भएको जिकिर ग रे । आधिकारिक उम्मेदवारको पक्षमा निष्ठापूर्वक लाग्न गठबन्धनका कार्यकर्ताहरूलाई पौडेलले आग्रह गरे ।

‘कर्णाली कांग्रेसका साथीहरूलाई भन्छु हँसिया हथौडाबाट नडराउँनु होला, किनकी गोलाकारभित्रको हँसिया हथौडा अहिले हाम्रो साथमा छ, हामीले यो देशलाई उन्नतिको बाटोमा लिने प्रयास गरेका छौँ,’ पौडेलले भने ।

इमान्दार भएर चुनावमा भोट हाल्न आग्रह गर्दै संविधान, लोकतन्त्र, देश तथा जनताको स्थायी निकास भनेको गठबन्धन रहेको पौडेलको दाबी थियो ।

प्रकाशित मिति: आइतबार, कात्तिक ६, २०७९ १८:५०