यस्ता छन् दलहरूका चुनावी गीत (भिडियोसहित)

A+ A A-

मंसिर ४ प्रतिनिधिसभा र प्रदेशसभाका उम्मेदवारहरूलाई भोट हाल्ने दिन हो ।

चुनाव नजिकिएसँगै चुनावी प्रचारप्रसारका लागि पार्टीहरूले विभिन्न शैलीहरू अपनाउँछन् । तिनै शैलीअन्तर्गतको प्रभावकारी शैली मानिन्छ गीत । गीतले आमनागरिकहरूलाई छिट्टै प्रभावित बनाउन सक्छ । यसपालि पनि प्रमुख दलहरूले चुनावी प्रचारका गीतहरू सार्वजनिक गरिरहेका छन् । जुन बाटोबाटो वा घरदैलो कार्यक्रममा गुञ्जाउँदै पनि हिँडेका छन् ।

नेकपा एमालेको पाँच वर्षअघि चुनावी प्रचारको बेला ‘सै पनि एमाले’ गीत निकै चर्चित बनेको थियो । बद्रि पंगेनी र प्रिया भण्डारीको स्वर तथा ईएनबीको शब्द र संगीत रहेको उक्त गीत जनमनमा बसेको थियो । त्यही गीतलाई यसपालि पनि चुनावी प्रचारका लागि एमालेले घरदैलो कार्यक्रममा प्रयोग गरेको छ ।

गत २० अक्टोबरमा एमालेको नयाँ चुनावी गीत युट्युबमा सार्वजनिक भएको छ- ‘आयो एमाले’ । गीतका पहिलो हरफ यस्ता छन्:

कोही आए नानाथरी भाषण गर्ने खाले
कोहीकोहीले त संविधानै हाम्रो भन्न थाले
समृद्धिको बहार बोकी आयो एमाले, आयो एमाले...।

गीतमा सुन्दर विरही पाख्रिन र मातृका बुढामगर ओलीको स्वर छ । सुन्दर विरही पाख्रिनकै संगीत रहेको गीतमा कमल विरही थापाले भिडियो बनाएका छन् । यो गीत युट्युबमार्फत सुन्न र हेर्न सकिनेछ ।

२१ अक्टोबरमा एमालेकै नयाँ चुनावी गी ‘शहीदको सपना एमाले’ पनि अपलोड भएको छ ।

गीतमा गायिका तथा प्रतिनिधिसभा सदस्यकी उम्मेदवार कोमल वलीले स्वर दिएकी छन् । उनलाई बलबहादुर राजवंशी, समीक्षा चौधरी, अनुमा चौधरीले साथ दिएका छन् । गीतमा बलबहादुरको संगीत छ भने बेदेन्द्रबहादुर राजवंशीले उक्त गीत लेखेका छन् । गीतका पहिलो हरफ यस्ता छन्:

मजदुरको सपना हो एमाले
किसानको पसिना हो एमाले
श्रमिकको श्रम हो एमाले
जनताको भरोसा हो एमाले...।

एमालेको आधिकारिक गीत भने मंगलबार मात्र सार्वजनिक हुने प्रचारप्रसार विभागले जनाएको छ । ‘हाम्रो आधिकारिक गीतको सुटिङ भइरहेको छ । मंगलबार युट्युबमार्फत सार्वजनिक हुन्छ ।

नेपाली काङ्ग्रेसको चुनावी प्रचार गीत ‘मङ्सिर चार’ एक महिनाअघि सार्वजनिक भएको छ । गीतमा लोकराज अधिकारीको शब्द तथा गोविन्द मधुर आचार्यको संगीत छ । गीतलाई गायिका राधिका हमालले गाएकी छन् ।

उनलाई शशीविक्रम थापा, स्मृति शाही, गोविन्द मधुर आचार्यले साथ दिएका छन् । गीतको भिडियोका निर्देशक तीर्थबहादुर थापाले गरेका छन् । गीतका हरफ यस्ता छन्:

यता पनि जय नेपाल, उता पनि जय नेपाल
मेची काली जताततै काङ्ग्रेसमा यही नेपाल
होसियार, खबरदार !
आउँदैछ मङ्सिर चार...।

गठबन्धनको आधिकारिक गीत पनि हालै युट्युबमार्फत सार्वजनिक भएको छ । ‘गठबन्धनलाई नजिताई भा'छैन’ बोलको गीतलाई चेतन सापकोटा र स्मिता दाहालले गाएका छन् । संगीत तथा शब्द चेतन सापकोटाकै रहेको छ । यो गठबन्धनले चुनावी प्रचारप्रसारको आधिकारिक गीत मानेको छ । गीतको पंक्ति यस्तो छ:

गठबन्धनलाई नजिताई भा'छैन
प्रचण्डले सोचेजस्तो गर्नै पा'छैन ...।

विष्णु खत्रीको ‘गठबन्धनले हो’ गीत युट्युबमा हालै अपलोड भएको देखिन्छ । त्यसैगरी ‘लालसलाम’ गीत पनि युट्युबमा हेर्न सकिन्छ । गीतमा नवीन खड्का र टीका पुनले आवाज दिएका छन् भने शब्द पनि नवीनकै रहेको छ ।

गीतको एरेन्ज तथा संगीत आशिष अविरलको छ ।

नेकपा माओवादी केन्द्रले चुनावकेन्द्रित गीत र्‍यापमा पनि ल्याएको छ, ‘भोट फर प्रचण्ड’ । हिजो आफूले आलोचना गरेका संगीत र भाकाहरू अहिले भने माओवादीका लागि संकट टार्ने उपाय बनेका छन् ।

प्रकाशित मिति: आइतबार, कात्तिक ६, २०७९ १७:५५