प्रहरीलाई आईजीपी सिंहको निर्देशन– चुनावमा आफ्नो जिम्मेवारी निष्पक्ष रूपमा निर्वाह गर्नू

प्रहरीलाई आईजीपी सिंहको निर्देशन– चुनावमा आफ्नो जिम्मेवारी निष्पक्ष रूपमा निर्वाह गर्नू

A+ A A-

नेपाल प्रहरी महानिरीक्षक धीरजप्रताप सिंहले आगामी मंसिर ४ मा हुने निर्वाचनमा आफ्नो जिम्मेवारीलाई निष्पक्ष र त्रुटिरहित तवरले निभाउन नेपाल प्रहरीलाई निर्देशन दिएका छन् ।

आइतबार राष्ट्रिय प्रहरी प्रशिक्षण प्रतिष्ठान महाराजगञ्जमा आयोजित प्रहरी निरीक्षक आधारभूत तालिम १– १८१ औँ समूहको दीक्षान्त समारोहलाई सम्बोधन गर्दै प्रहरी महानिरीक्षक सिंहले आगामी चुनावमा प्रहरीले पाएको जिम्मेवारीलाई निष्पक्ष र त्रुटिरहित तवरले सम्पन्न गर्न निर्देशन दिएका छन् ।

उनले निर्वाचनलाई निष्पक्ष, शान्तिपूर्ण र भयरहित वातावरणमा सम्पन्न गर्नु प्रहरीको जिम्मेवारी भएको बताए । उनले प्रहरीलाई कानुनको परिधिभित्र रही अपराध अनुसन्धान र कानुन कार्यान्वयनमा कठोरता अपनाउन निर्देशन दिए । उनले गैरकानुनी तथा आपराधिक क्रियाकलापविरुद्ध निर्मम हुन पनि निर्देशन दिए ।

उनले ‘चेन अफ कमाण्ड’ नेपाल प्रहरीले अवलम्बन गर्दै आएको व्यवसायिक संस्कृति भएको उल्लेख गर्दै यसको परिधिभन्दा बाहिर नजान आग्रह गरे । महानिरीक्षक सिंहले चेन अफ कमाण्ड बाहिर रहेर गरिने वृत्तिविकास र अवसरको परिकल्पनाप्रति संगठन कठोर हुने स्पष्ट पारे ।

उनले प्रविधिजन्य समस्या समाधानका लागि प्रविधिमैत्री र प्रविधिको विकासप्रति अद्यावधिक हुन आग्रह गरे । उनले साइबर क्राइम, क्रिप्टो करेन्सीलगायत आर्थिक अपराध बढेको भन्दै त्यसप्रति सचेत रहन पनि निर्देशन दिए । अपराधमा संलग्न व्यक्तिको पहिचान, त्यसको प्रभाव, पीडितको पहिचान, अन्तरनिकाय समन्वय, पीडितलाई क्षतिपूर्ति र पीडकलाई कारबाही गर्ने दायित्व बहन गर्न उनले प्रहरीलाई आग्रह गरे ।

उनले प्रहरीले नागरिकको जायज र कानुनसम्मत अपेक्षा पूरा गर्नेगरी काम गर्नुपर्ने बताए । प्रहरीप्रतिको नकारात्मक धारणा हटाउने गरी काम गर्न उनले आग्रह गरे ।

प्रकाशित मिति: आइतबार, कात्तिक ६, २०७९ १२:२१