भीमसेनदास प्रधानकाे कटाक्ष : एमालेले बनाएको घरमा बस्न पूर्व आइजीपी आइपुगे

A+ A A-

काठमाडौं ६ मा कांग्रेसका उम्मेदवार भीमसेनदास प्रधानले एमालेले बनाएको घरमा सवेन्द्र खनाल बस्न आएको टिप्पणी गरेका छन् । शनिबार सञ्चारकर्मीसँग अन्तर्क्रिया गर्दै सर्वेन्द्र खनाललाई उठाउने एमालेको निर्णय अराजनीतिक भएको आराेप लगाए । ‘घर बनाएको छ एमालेले त्यो ठाउँमा बस्न आएका छन् पूर्व आइजीपी । राष्ट्रिय योगदानमा भूमिका भएकालाई संसदमा ल्याउने हो भने अपर हाउस छ । समानुपातिक प्रणाली छ । पार्टीमा त्याग गरेकालाई पाखा लगाउँदै जाने हो भने राजनीति प्रणाली के होला ?,’ उनले भने ।

एमालेमा निरंकुश प्रवृत्ति रहेको टिप्पणी गर्दै उनले प्रश्न उठाँउदा भीम रावल, घनश्याम भुसाललगायतलाई टिकट नदिएको उल्लेख गरे । कांग्रेसमा व्यापक छलफलपछि मात्रै टिकट वितरण गरिएको उनकाे दाबी छ । ‘सम्पूर्ण रुपमा डेमोक्रेटिक रहेका सर्वेन्द्र खनाल केपी ओलीको अन्धभक्त भएर आक्रमणमा उत्रिनुभएको छ,’ उनले भने ।

कार्यक्रममा प्रदेश क की उम्मेदवार तथा काठमाडौं महानगरकी पूर्व उपप्रमुख हरिप्रभा खड्गीले आफ्नाे कार्यकालमा काठमाडौंका संस्कृति जोगाउन गरेको प्रयास सफल भएको र फेरि पनि उस्तै काम गर्ने बताइन् । ‘५ वर्षमा हराभरा काठमाडौं, भाषा संस्कृति कला जोगाउन लाग्ने छु । अकुपाइ टुडिखेल अभियानबाट खुल्ला मन्चका ५१ वटा पसल हटाएँ । धार्मिक र सांस्कृतिक पर्यटन विकास गर्न सक्छौँ,’ उनले भनिन् । आफ्नो घोषणापत्रमा गर्न सक्ने काममात्र गर्ने उनले बताइन् । ‘गर्न सक्ने काम मात्र घोषणापत्रमा समेट्छौँ । नसक्ने कुराको आश्वासन बाड्दैनौँ,’ उनले भनिन् ।

कार्यक्रममा प्रदेश ख का उम्मेदवार विष्णुभक्त तिमल्सिनाले कांग्रेस उम्मेदवारहरूले जनताको समस्या बुझेको बताए । उनले आफूले अहिलेसम्म लाभको पद नलिएको बताए । ‘ कुनै पनि लाभको पद लिएको छैन । ६ नं क्षेत्रको प्रत्येक घर घरमा कोही उम्मेदवार पुगेको छ भने कांग्रेसका उम्मेदवार पुगेका छन्,’ उनले भने ।

प्रकाशित मिति: शनिबार, कात्तिक ५, २०७९ १६:२५