जहाँ बिजनेस, त्यहाँ बीबीए (भिडियो)

A+ A A-

ब्याचलर्स अफ बिजनेस एडमिनिस्ट्रेसन (बीबीए) करिब दुई दशकअघि त्रिभुवन विश्वविद्यालयले सुरु गरेको व्यवस्थापनसम्बन्धी प्रयोगात्मक विषय हो ।

व्यवस्थापनसँग सम्बन्धित विषयहरू रहेको यस विषयले मानिसको सैद्धान्तिक ज्ञान र व्यावहारिक सीपलाई विकास गर्न जोड दिन्छ । यो विषय पढ्न विद्यार्थीहरूले कक्षा ११ र १२ मा कम्तिमा १.८० जीपीए प्राप्त गर्नुपर्छ ।

यस्तै विद्यार्थीहरूले व्यवस्थापन सङ्कायले लिने प्रवेश परीक्षा सेन्ट्रल एडमिनिस्ट्रेसन म्यानेजमेन्ट टेस्ट (सीम्याट) समेत कम्तिमा ४० प्रतिशत अंक ल्याइ उत्तीर्ण गर्नुपर्छ ।

चार वर्षमा आठ सेमेस्टर रहेको बीबीएमा सबै सेमेस्टरमा गरेर ३८ वटा विषयहरू पढाइन्छ । बीबीएमा ६० प्रतिशत व्यवस्थापनको विषयहरूको अध्ययन गर्नुपर्छ ।

व्यवस्थापनभित्र बिजनेस म्यानेजमेन्ट, मानव संशाधन व्यवस्थापन, बिजनेस स्ट्राटेजीलगायत विषयहरूको अध्ययन गर्नुपर्छ भने गणित, स्टाटिस्टिक्स, मनोविज्ञान विषयको पनि अध्ययन गर्नुपर्छ ।

प्रयोगात्मक विषय भएको हुनाले बीबीएमा चारवटा सेमिनारहरूमा उपस्थित हुनुपर्छ भने हरेक विषयको ४० प्रतिशत आन्तरिक मूल्याङ्कनबाट हुन्छ । यस्तै विद्यार्थीरूले तीन क्रेडिट घण्टाको दुई महिने इन्टर्नसिप पनि अनिवार्य रूपमै गर्नुपर्छ ।

सामान्यता यो विषय पढ्न ४–५ लाख शुल्क लाग्ने गर्छ भने कलेजले दिने सेवा सुविधा, प्रोजेक्टहरू, फिल्ड भिजिटका आधारमा शुल्क तलमाथि हुन सक्छ । यस विषयमा पनि सरकारी विद्यालय पढेका र सरकारी विद्यालयबाट प्लस टु पास गरेका र छात्रवृत्तिको अन्य दायरा पूरा गर्ने विद्यार्थीलाई छात्रवृत्तिको व्यवस्था गरिएको छ ।

विद्यार्थीहरूमा व्यवस्थापन तथा समग्र व्यवसाय सञ्चालन गर्न चाहिने सिप विकास हुन्छ । यसरी व्यवसाय रहेको हरेक क्षेत्रमा बीबीए पढेकाहरूले काम गर्न पाउँछन् । बैंक तथा फाइनान्स, गैरसरकारी तथा अन्तर्राष्ट्रिय गैरसरकारी संस्था, सरकारी कार्यालय, उद्याशीलतालगायत क्षेत्रमा काम गर्ने अवसर प्राप्त गर्छन् ।

पछिल्लो समय बीबीए ग्लोबल विषयको रूपमा स्थापित भइसकेको छ । यो विषय विश्वको सबैजसो देशमा पढाई हुने हुँदा विदेशमा पढ्न जान चाहने नेपाली विद्यार्थीले अधिकांश देशमा अध्ययन गर्न सक्छन् ।

विदेश जाँदा भिसा सजिलै प्राप्त गर्ने सम्भावना बढी रहन्छ । यसो हुँदा व्यवसाय रहेको क्षेत्रमा काम गर्न चाहने विद्यार्थीरूका लागि यो विषय छनोट गर्दा उत्तम हुन्छ ।