दोलखा इन्चार्जबाट राजीनामा दिएकी देवी खड्कालाई प्रश्न- चुनावको मुखमा माओवादी छाड्‌न लागेको हो ?

दोलखा इन्चार्जबाट राजीनामा दिएकी देवी खड्कालाई प्रश्न- चुनावको मुखमा माओवादी छाड्‌न लागेको हो ?

A+ A A-

नेकपा माओवादी केन्द्रकी नेतृ देवी खड्काले दोलखा जिल्ला इञ्चार्जबाट राजीनामा दिएकी छिन् । पार्टीले प्रतिनिधिसभाको टिकट वितरणमा गरेको निर्णयप्रति असन्तुष्ट खड्काले चुनावको मुखमा राजीनामा बुझाएकी हुन् । खड्काको राजीनामासँगै दोलखामा माओवादी केन्द्रलाई चुनावी धक्का लाग्ने विश्लेषण हुन थालेको छ । सत्ता गठबन्धनका तर्फबाट दोलखामा माओवादी केन्द्रले गंगा कार्कीलाई उम्मेदवार बनाएको छ । एमालेले दोलखामा बालकृष्ण सिवाकोटीलाई उम्मेदवार बनाएको छ । राजीनामाको विषयमा केन्द्रित रहेर नेतृ खड्कासँग गरिएको कुराकानी:

तपाईंले चुनावको मुखैमा जिल्ला इन्चार्जबाट किन राजीनामा दिनुभयो ?

जिल्ला पार्टीले टिकटका लागि तीन जनाको नाम सिफारिस गरेको थियो । तर, माथिबाट पछि एकपटक पनि छलफल नगरी टिकट वितरण गरियो । त्यतिबेला म डेङ्गी लागेर बिरामी भएकी थिएँ । यसरी गंगा कार्कीलाई टिकट दिनुपर्‍यो भनेर पनि भनिएन । पार्टीको दोलखा जिल्ला इन्चार्ज रहेकी मलाई लुकाएर टिकट वितरण गरेपछि चित्त दुखेको हो ।

मसँग एकपटक छलफल गरेको भए मान्थेँ । इन्चार्जको हिसाबले अरुलाई अवसर दिनुहुन्न भन्ने पक्षमा म कहिल्यै पनि रहिनँ, अहिले पनि छैन । तर, मलाई बाइपास गरेर प्रत्यक्ष र समानुपातिकतर्फको उम्मेदवार तय गरेपछि गाह्रो लाग्यो । मलाई छलेर ढाँटेर निर्णय गरेपछि चित्त बुझेन । दोस्रो, मेरो स्वास्थ्य अवस्था पनि ठीक छैन । पछिल्लो समय म बिरामी छु । लामो समयदेखि स्वास्थ्यमा समस्या आएकाले पनि राजीनामा दिएकी हुँ ।

तेस्रो, महिला भएको आधारमा सधैँ अवसर पाउनुपर्छ भन्ने छैन । म महिला भएको आधारमा सधैँ अवसर पाउने, एक्सपोजर भइरहने भन्ने हुँदैन, अरुले पनि अवसर पाउनुपर्छ ।

टिकट नपाएपछि बिरामीको बहाना बनाएर राजीनामा दिएको होइन र ?

म बिरामी नै छु । कसले भन्छ यस्तो कुरा ? टिकट मैले पाइसकेको हुँ । मन्त्री भइसकेकी छु । मैले टिकट नपाएर होइन । सल्लाह गरिएन भनेर मेरो कुरा भनिसकेँ नि । तर, अहिले म धेरै खटेर काम गर्न पनि सक्दिनँ, स्वास्थ्यका कारणले । त्यही भएर राजीनामा दिएकी हुँ ।

पार्टी छोड्दिनँ । माओवादी कसैको पेवा होइन । म १७ वर्षको उमेरदेखि यो पार्टीमा लागेकी हुँ । मेरो दाइ शहीद भएको पाँच महिनामा मलाई जिल्लाको नेतृत्व दिइएको थियो । मैले पनि त्यो समयमा रुँदै नेतृत्व लिएकी हुँ । यो पार्टीमा अरु पदमा टिक्छन्, म बोलेर टिकिरहेकी छु ।

तपाईं मन्त्री हुनुभयो, भाइ बागमती प्रदेशको मन्त्री हुनुहुन्छ । सधैँ तपाईंहरूलाई मात्र अवसर दिनुपर्ने हो र ?

होइन । तर, मेरो भाइ र मलाई किन जोड्ने ? म मेरो कारणले अवसर पाउने हो । मेरो भाइ उसको कारणले अवसर पाउने हो । हाम्रो जनयुद्धमा योगदान छ र यो पार्टीमा छौँ । भाइ र मलाई जोडेर हेर्नु नै गलत छ । हामी अलग-अलग छौँ । यदि मेरो श्रीमान्‌ले अवसर लिएको र मैले पनि अवसर लिएको भए भन्नुपर्‍यो ।

पार्टीको केन्द्रीय नेतृत्वसँग असहमति हो कि प्रदेश नेतृत्वसँग मात्र हो ?

नेतृत्व होइन, प्रक्रियासँग असहमति हो । कसैलाई अवसर पाइसक्यौ भनेर भन्ने, कसैलाई सधैँ अवसर दिइरहने परिपाटी गलत छ । अहिले पनि कति जनाका छन् श्रीमान् र श्रीमती चुनावी मैदानमा ? तिनीहरूले कहिलेदेखि अवसर पाउन थालेका हुन् ? कहिलेसम्म पाइरहने हुन्, थाहा छैन । मेरो विरोध यो कुरामा हो ।

पार्टी छोड्नुभएको त होइन नि ?

होइन । पार्टी छोड्दिनँ । माओवादी कसैको पेवा होइन । म १७ वर्षको उमेरदेखि यो पार्टीमा लागेकी हुँ । मेरो दाइ शहीद भएको पाँच महिनामा मलाई जिल्लाको नेतृत्व दिइएको थियो । मैले पनि त्यो समयमा रुँदै नेतृत्व लिएकी हुँ । यो पार्टीमा अरु पदमा टिक्छन्, म बोलेर टिकिरहेकी छु । यो पार्टीभन्दा दायाँबायाँ हुन्नँ । इन्चार्जबाट मात्रै राजीनामा दिएकी हुँ ।

प्रचण्डसँग असहमतिबारे तपाईंले कुराकानी गर्नुभएको छ कि छैन ?

पार्टीमा रहेर काम गर्छु । मेरो असहमति छ । तर, पार्टीको काममा लाग्छु । धेरै कुरा मिलेका छैनन् । जिल्लाको नेतृत्व भएपछि छलफलसम्म गर्नुपर्थ्यो, गरेनन् । समानुपातिक उम्मेदवार शंकर लामालाई दिने भनिएको थियो । त्यो भएन । त्यही भएर मेरो असहमति छ । तर, काम गर्छु । चुनाव आएको छ । फिल्डमा खट्छु । नेतृत्वसँग पनि कुरा हुँदै जान्छ ।

प्रकाशित मिति: बुधबार, कात्तिक २, २०७९ १८:१२