गठबन्धनको बलमा कर्णालीमा पहिलो शक्ति बन्ने दाउमा कांग्रेस, सकसमा एमाले

A+ A A-

मंसिर ४ मा हुने प्रतिनिधिसभा र प्रदेशसभा निर्वाचनको मिति नजिकिएसँगै कर्णालीमा चुनावी सरगर्मी बढेको छ । दलहरू गाउँकेन्द्रित भएका छन् । २०७४ मा वाम गठबन्धनसँग चुनाव लडेर कर्णालीमा प्रतिनिधिसभातर्फ शून्य भएको कांग्रेस यसपालि माओवादी र समाजवादीलाई साथमा लिएर पहिलो शक्ति बन्ने दाउमा छ ।

माओवादी केन्द्र र एमालेको वाम गठबन्धनले कर्णालीमा पहिलो पार्टी बनेको एमालेलाई यसपटक आफ्नो विरासत जोगाउन कडा प्रतिस्पर्धा गर्नुपर्नेछ । माओवादी, कांग्रेस र एकीकृत समाजवादी मिलेर बनेको गठबन्धनसँग एमाले एक्लैले प्रतिस्पर्धा गर्दैछ । गत वैशाख ३० मा भएको स्थानीय तह निर्वाचनको मत परिणामअनुसार कर्णालीमा कांग्रेस पहिलो हुँदा माओवादी दोस्रो र एमाले तेस्रो स्थानमा झरेको छ ।

यो मत परिणामले एमाले कमजोर हुनुको मुख्य कारण पार्टी विभाजन हो । कर्णालीका ७९ पालिकामध्ये कांग्रेसले ३२ पालिकाको नेतृत्व गर्दा माओवादी केन्द्रले २३ पालिका जितेको छ । त्यस्तै, एमाले १५ पालिकामा सीमित भएको छ । गठबन्धन एकातिर एमाले एक्लो हुँदा एमालेले आफ्नो साख जोगाउन निकै संघर्ष गर्नुपर्ने देखिन्छ ।

कालीकोट, जुम्ला, डोल्पा, हुम्ला, रुकुम पश्चिमलगायतका जिल्लाहरूमा एमाले कमजोर छ । जुन स्थानीय तहको मत परिणामले देखाइसकेको छ । गठबन्धनसँग कडा रूपमा प्रस्तुत नभए २०७४ मा कांग्रेसले बोकेको डोको बोक्नुपर्ने अवस्था आउन सक्ने आकलन गर्न थालिएको छ ।

यस्तो थियो २०७४ को प्रतिनिधिसभा र प्रदेशसभाको जोडघटाउ

सुर्खेत

राजधानीसमेत रहेको सुर्खेतका दुवै निर्वाचन क्षेत्रबाट प्रतिनिधिसभामा एमालेले जितेको थियो । एमाले-माओवादीको समीकरणले प्रदेशसभामा भने चारमध्ये दुईवटा माओवादी र दुईवटा एमालेले जितेको थियो । प्रदेशसभातर्फ निर्वाचन क्षेत्र नम्बर १ 'क' बाट माओवादीबाट ठम्मर विष्ट १५ हजार ३ सय ५२ मत ल्याएर निर्वाचित हुँदा उनका निकटतम प्रतिद्वन्द्वी कांग्रेसका टेकबहादुर सिंह ठकुरीले १५ हजार १ सय ३२ मत प्राप्त गरेका थिए ।

माओवादीबाट असन्तुष्ट बनेका विष्ट अहिले एमालेबाट प्रदेशसभा सदस्यको उम्मेदवार बनेका छन् । १ 'ख' मा एमालेका खड्गबहादुर खत्री २१ हजार ६ सय २१ मत प्राप्त गरेर विजयी हुँदा कांग्रेसका झकबहादुर डाँगी १७ हजार ७ हजार २ सय ८७ मत प्राप्त गरी पराजित भएका थिए ।

निर्वाचन क्षेत्र नम्बर २ मा प्रतिनिधिसभामा एमालेका नवराज रावतले ३७ हजार ४ सय ४७ मत प्राप्त गरी कांग्रेसका हृदयराम थानीलाई पराजित गरेका थिए । थानीले २८ हजार ६ सय ४६ मत प्राप्त गरेका थिए । थानी यसपटक पनि प्रतिनिधिसभासभा सदस्यमा उम्मेदवार बनेका छन् ।

प्रदेशसभा 'क' तर्फ एमालेका यामलाल कँडेलले २१ हजार २ सय ८२ मत प्राप्त गरेर विजयी हुँदा कांग्रेसका कमलराज रेग्मीले १५ हजार ९ सय ४७ मत प्राप्त गरेका थिए । कँडेल यसपालि पनि प्रदेशसभामा दोहोरिन खोजेका छन् ।

यस्तै, २ 'ख' मा वाम गठबन्धनको तर्फबाट माओवादी विन्दमान विष्ट १५ हजार ६ सय ४८ मत ल्याएर विजयी भएका थिए । विष्टले कांग्रेसका तप्तबहादुर विष्टलाई हराएका थिए । विष्टले १२ हजार ४ सय ७७ मत प्राप्त गरेका थिए । विन्दमान पुनः प्रदेशसभा सदस्यमा उम्मेदवार बनेका छन् । उनलाई कांग्रेसको साथ छ ।

दैलेख

दुई निर्वाचन क्षेत्र रहेको दैलेखमा पनि प्रतिनिधिसभामा दुवै एमालेले हात पारेको थियो । क्षेत्र नम्बर १ मा रवीन्द्रराज शर्मा २३ हजार ७ सय ७३ मत प्राप्त गरेर विजयी हुँदा राष्ट्रिय प्रजातन्त्र पार्टीका दीपककुमार शाहीले १७ हजार २ सय ५२ मत ल्याएका थिए । क्षेत्र नम्बर २ मा गठबन्धनका तर्फबाट एमालेका राजबहादुर बुढा २३ हजार ३ सय २३ मतसहित प्रतिनिधिसभामा निर्वाचित हुँदा कांग्रेसका शिवराज जोशीले १६ हजार ६ सय ३४ मत प्राप्त गरेका थिए । शर्मा पुनः उम्मेदवार बनेका छन् ।

प्रदेशसभातर्फ निर्वाचन क्षेत्र १ 'क' मा माओवादीबाट धर्मराज रेग्मी १० हजार ३६१ मतका साथ निर्वाचित हुँदा कांग्रेसका कृष्णकुमार बिसीले ८ हजार ७ सय ६५ मत प्राप्त गरे । तर, निर्वाचित रेग्मी अहिले एमाले प्रवेश गरेका छन् । 'ख' मा एमालेबाट अम्मरबहादुर थापा १२ हजार ५ सय ६७ मत ल्याएर निर्वाचित हुँदा कांग्रेसका जगतजंग थापाले १० हजार ५ सय ८६ मत प्राप्त गरेका थिए । थापा अहिले प्रतिनिधिसभा सदस्यमा गठबन्धनबाट उम्मेदवार बनेका छन् । उनी समाजवादीका प्रदेश अध्यक्षसमेत हुन् ।

क्षेत्र २ 'क' बाट एमालेका सुशीलकुमार थापा ११ हजार ८ सय १९ मत ल्याएर निर्वाचित हुँदा कांग्रेसका मधुरविक्रम खनालले ८ हजार ७ सय ९५ मत ल्याएका थिए । 'ख' मा एमालेका राजबहादुर शाही ११ हजार ४ सय ४५ मत ल्याएर निर्वाचित भएका थिए । कांग्रेसका दिक्पालकुमार शाही ८ हजार ४ सय ६९ मत प्राप्त गरी पराजित भएका थिए ।

रुकुम पश्चिम

माओवादीको आधार इलाका रुकुम पश्चिममा माओवादीका प्रभावशाली नेता एवं अर्थमन्त्री जनार्दन शर्मा ३४ हजार ४ सय २ मत ल्याएर प्रतिनिधिसभा सदस्यमा निर्वाचित भएका थिए । उनले कांग्रेसका गोपालजंग शाहलाई हराएका थिए । शाह १५ हजार ६ सय ५९ मत प्राप्त गरी पराजित भएका थिए । शर्मा पनि पुनः प्रतिनिधिसभाका उम्मेदवार छन् ।

रुकुम पश्चिमका दुवै प्रदेशसभा माओवादीले नै जितेको थियो । 'क' मा माओवादीका रातो कामी १६ हजार ८ सय १० मत ल्याएर निर्वाचित हुँदा कांग्रेसका कृष्णबहादुर रोकायले ८ हजार ५ सय ७७ मत पाएका थिए । 'ख' मा माओवादीकै गोपाल शर्माले १८ हजार ५ सय ८७ मत ल्याउँदा कांग्रेसका खड्कबहादुर डाँगी ८ हजार १ सय २७ मत प्राप्त गरी पराजित भएका थिए ।

कालीकोट

कालीकोटमा प्रतिनिधिसभामा माओवादीका दुर्गबहादुर रावत २१ हजार १ सय १२ मत ल्याएर निर्वाचित हुँदा कांग्रेसका युवा नेता भुपेन्द्रजंग शाहीले १६ हजार ४ सय ७ मत प्राप्त गरेका थिए । यता प्रदेशसभामा भने वाम गठबन्धनबाट 'क' मा एमालेबाट कुर्मराज शाही ११ हजार ९ सय ३५ मत ल्याएर निर्वाचित भएका थिए । उनका प्रतिद्वन्द्वी कांग्रेसका टेकबहादुर शाहीले ४ हजार ४ सय ८९ मत प्राप्त गरेका थिए । अहिले कुर्मराज समाजवादीमा छन् ।

'ख' मा माओवादीका महेन्द्रबहादुर शाही १२ हजार १ सय ५३ मत ल्याएर निर्वाचित भएका थिए । उनका निकटतम प्रतिद्वन्द्वी कांग्रेसका कालीबहादुर सहकारीले ९ हजार ३ सय ४२ मत प्राप्त गरेका थिए । एमाले फुटपछि समाजवादीमा लागेका कुर्मराज शाही पुन: एमालेमै फर्किएर प्रदेशसभा सदस्यको उम्मेदवार बनेका छन् । मुख्यमन्त्रीसमेत बनेका माओवादीका शाही यसपालि प्रतिनिधिसभामा गएका छन् ।

सल्यान

सल्यानमा प्रतिनिधिसभातर्फ माओवादीका टेकबहादुर बस्नेत ४० हजार ८ सय ९७ मत ल्याएर निर्वाचित हुँदा कांग्रेसका राजेन्द्रबहादुर शाहले २९ हजार ७ सय ६७ मत प्राप्त गरेका थिए । प्रदेशसभाअन्तर्गत 'क' बाट एमालेका गुलाबजंग शाह १९ हजार ६ सय ५८ मतका साथ निर्वाचित हुँदा कांग्रेसका एकराज डाँगीले १० हजार ६ सय १२ मत पाए ।एमालेका शाह पुनः उम्मेदवार छन् ।

यस्तै, 'ख' मा पनि एमालेबाट प्रकाश ज्वाला १९ हजार ८ सय ३६ मत ल्याएर निर्वाचित भएका थिए । समाजवादीका उपमहासचिवसमेत रहेका ज्वालाले कांग्रेसका डिल्लीराज रेग्मीलाई हराएका थिए । रेग्मीले ११ हजार ६ सय ३० मत प्राप्त गरेका थिए ।

डोल्पा

प्रतिनिधिसभामा एमालेका धनबहादुर बुढा ११ हजार ७ सय ६१ मत ल्याएर निर्वाचित हुँदा कांग्रेसका अंगदकुमार बुढा ३ हजार १ सय ६७ मत प्राप्त गरी पराजित भएका थिए । प्रदेशसभा 'क' मा एमालेबाट नन्दसिंह बुढा ५ हजार ४ सय ९० मत प्राप्त गरी विजयी हुँदा कांग्रेसका बेगमसिंह ठकुरीले १ हजार २ सय १३ मत पाएका थिए । 'ख' मा माओवादी केन्द्रका वीरबहादुर शाहीले ६ हजार ४ सय १४ मत प्राप्त गरेका थिए । उनका निकटतम प्रतिद्वन्द्वी कांग्रेसका सुरेशबहादुर शाहीले २ हजार १ सय ५ मत पाएका थिए । 'क' मा विजयी बुढा अहिले समाजवादीमा लागेका छन् ।

जुम्ला

जुम्ला प्रतिनिधिसभामा माओवादीका गजेन्द्रबहादुर महत २२ हजार १ सय ७३ मतसहित निर्वाचित हुँदा कांग्रेसका देवेन्द्रबहादुर शाही १४ हजार १ सय ४९ मत ल्याएर पराजित बनेका थिए । नेमकिपाले २ हजार ७ सय १८ मत प्राप्त गरेको थियो । प्रदेशसभामा 'क' बाट माओवादीका नरेश भण्डारी १२ हजार ५ सय ७४ मतसहित निर्वाचित हुँदा उनका निकटतम प्रतिद्वन्द्वी कांग्रेसका राजु सिंह कठायतले ८ हजार ५ सय ३७ मत प्राप्त गरेका थिए ।

'ख' मा एमालेका पदमबहादुर रोकाय १० हजार ४ सय ५८ मतका साथ निर्वाचित हुँदा कांग्रेसका भीमनिधि हमालले ५ हजार २ सय ८० मत प्राप्त गरेका थिए । गठबन्धनबाट टिकट पाएका समाजवादीका रोकायबाहेक अन्य अनुहारले यसपालि टिकट पाउन सकेनन् ।

जाजरकोट

जाजरकोटमा माओवादीका प्रवाशाली नेता शक्तिबहादुर बस्नेतले ३२ हजार २ सय ८१ मत प्राप्त गरी कांग्रेसका राजीवविक्रम शाहलाई हराएका थिए । शाहले २३ हजार २ सय ८९ मत प्राप्त गरेका थिए । प्रदेशतर्फ 'क' मा माओवादीबाट गणेशप्रसाद सिंह १६ हजार ९ सय ११ मतसहित विजयी हुँदा कांग्रेसका वेदराज सिंह १२ हजार ८७८ मत प्राप्त गरी पराजित भएका थिए ।

प्रदेशसभा 'ख' मा एमालेका करवीर शाही १५ हजार १ सय ८५ मत ल्याएर निर्वाचित हुँदा कांग्रेसका दीपकजंग शाहले १० हजार ३ सय ६० मत ल्याएका थिए । अहिले गठबन्धनतर्फबाट प्रतिनिधिसभामा उम्मेदवार बस्नेत छन् भने प्रदेशभाका लागि कांग्रेसका शाह हुन् ।

हुम्ला

वाम गठबन्धनले टिकट नदिएपछि स्वतन्त्र उम्मेदवारी दिएका हुम्लाका छक्कबहादुर लामाले ८ हजार ४ सय ९१ मत गरी कांग्रेसका मंगलबहादुर शाहीलाई ४७ मतान्तरले पराजित गरेका थिए । शाही ८ हजार ४ सय ४४ मत प्राप्त गरी पराजित भएका थिए । लामा अहिले उनी एमालेबाट प्रदेशसभामा उम्मेदवार बनेका छन् ।

प्रदेशसभातर्फ भने 'क' मा एमालेका दल रावल ७ हजार १ सय ५८ मत ल्याएर निर्वाचित हुँदा कांग्रेसका ठानबहादुर रोकायले ४ हजार ८ सय ११ मत ल्याएका थिए । रावल यसपालि एमालेबाट प्रतिनिधिसभा उम्मेदवार बनेका छन् । 'ख' मा भने ४ हजार ५ सय १९ मत ल्याएर वर्तमान मुख्यमन्त्री कांग्रेसका जीवनबहादुर शाही निर्वाचित भएका थिए । उनका निकटतम प्रतिद्वन्द्वी माओवादीका विजय भण्डारीले ३ हजार ९ सय ९५ मत प्राप्त गरे । गत वैशाख ३० मा सम्पन्न स्थानीय तहको निर्वाचनमा एमालेको पहिलोबाट तेस्रोमा पुगेको छ । ।

मुगु

एक प्रतिनिधिसभामा रहेको मुगुमा वाम गठबन्धनका तर्फबाट एमालेका गोपालबहादुर बम १३ हजार ३४ मत प्राप्त गरी विजयी हुँदा कांग्रेसका हस्तबहादुर मल्ल ९ हजार ८ सय ६१ मत पाएर पराजित भए । बम यसपालि प्रदेशसभामा चुनाव लड्दैछन् । प्रदेशसभामा 'क' मा एमालेका दानसिंह परियार ५ हजार ६ सय ५३ मत ल्याएर निर्वाचित हुँदा कांग्रेसका तिलकबहादुर मल्लले ५ हजार २ सय ९९ मत प्राप्त गरेका थिए ।

'ख' मा एमालेकै चन्द्रबहदुर शाहीले ६ हजार ८ सय ४५ मत ल्याएर निर्वाचित हुँदा कांग्रेसका खड्ग शाहीले ४ हजार ६ सय १२ मत प्राप्त गरे । शाही भने अहिले समाजवादीमा छन् ।

प्रकाशित मिति: बिहीबार, कात्तिक ३, २०७९ १५:३६