दलबहादुर माओवादी प्रवेश गर्दा आईपीलाई तनाव, एसको साथ लिएर चुनाव जित्ने रत्नकाे दाउ

दलबहादुर माओवादी प्रवेश गर्दा आईपीलाई तनाव, एसको साथ लिएर चुनाव जित्ने रत्नकाे दाउ

A+ A A-

नेकपा एकीकृत समाजवादीका पोलिटब्युरो सदस्य एवं लुम्बिनी प्रदेश सहइन्चार्ज दलबहादुर सुनार माओवादी केन्द्रमा प्रवेश गरेपछि बाँके- ३ को चुनावी प्रतिस्पर्धा नयाँ मोडमा पुगेको छ ।

बाँके- ३ मा सत्तारुढ गठबन्धनका तर्फबाट कांग्रेस सहमहामन्त्री किशोरसिंह राठौरको प्रतिनिधिसभा सदस्यमा उम्मेदवारी छ । प्रदेश (क)मा गठबन्धनका तर्फबाट माओवादी केन्द्रका आईपी खरेल र (ख)मा कांग्रेसका बादशाह कुर्मी उम्मेदवार छन् । गठबन्धनमा नेकपा (एस)ले भाग नपाएको भन्दै बाँके ३ (क)बाट स्वतन्त्र उम्मेदवारी दिएका सुनारको दलबदलले माओवादी केन्द्रभित्र ठूलो असन्तुष्टि उत्पन्न गरेको छ ।

आफू गठबन्धनको आधिकारिक उम्मेदवार बन्ने गरी माओवादी केन्द्र प्रवेश गरेको नेता सुनारको दाबी छ । ‘प्राविधिक रूपमा पार्टीकै चुनाव चिह्न नभए पनि आईपीजीलाई निष्क्रिय बनाएर सघाउने वचन नेताहरूले दिनुभएको छ,’ सुनारले शिलापत्रसँग भने, ‘केही दिनभित्रै म गठबन्धनको औपचारिक उम्मेदवार हुनेछु ।’

स्थानीय कमिटीबाट सिफारिसमै नपरेका नेता आईपी खरेलले बाँके ३ (क)बाट टिकट पाएपछि माओवादी केन्द्रभित्र तीव्र विवाद थियो । वडादेखि प्रदेश कमिटीका दर्जनभन्दा बढी नेता–कार्यकर्ताले खरेलको उम्मेदवारीप्रति विरोध जनाउँदै राजीनामा गरेका थिए । त्यसैको प्रतिक्रियास्वरुप स्वतन्त्र उम्मेदवारी दिएका सुनारलाई पार्टी प्रवेश गराएर आधिकारिक उम्मेदवार बनाउने केही नेताको रणनीति छ ।

सुनारलाई माओवादी केन्द्रमा प्रवेश गराउन स्थायी कमिटी सदस्य पूर्णाकुमारी सुवेदी र खजुरा गाउँपालिका अध्यक्षसमेत रहेका नेता डम्बर बिक ‘तुफान’को मुख्य भूमिका थियो । पार्टी प्रवेशमा अर्का नेता अशोक रोकाय पनि उपस्थित थिए । यी नेताहरूले आधिकारिक उम्मेदवारलाई हराउन चुनावको मुखमा बखेडा झिकेको आरोप खरेल पक्षको छ ।

पार्टी प्रवेशपछि नेतृ सुवेदीले पार्टीको आधिकारिक उम्मेदवार को हुने भन्ने केही दिनमा टुंगो लगाउने बताएकी छिन् । जबकि खरेल आधिकारिक उम्मेदवारका रूपमा गठबन्धनका अन्य उम्मेदवारसँगै भोट माग्न घरदैलो गरिरहेका छन् । सुनारलाई पार्टी प्रवेश गराउनासाथ माओवादी केन्द्रको एउटा समूहले उनी नै आधिकारिक उम्मेदवार हुने भन्दै प्रचारप्रसार गरेपछि खरेलले खण्डन गरेका छन् ।

‘माओवादी केन्द्रको आधिकारिक उम्मेदवार म नै हो,’ उनले भने, ‘पार्टीको अन्तरविरोधलाई चुनावको बेलामा उछालेर आधिकारिक उम्मेदवारलाई कमजोर बनाउन खोजिएको छ । त्यो सफल हुन्न ।’ स्वतन्त्रलाई ल्याएर आधिकारिक उम्मेदवार बनाउने कुरा प्राविधिक, कानुनी र व्यावहारिक रूपमै नमिल्ने उनले बताए । उम्मेदवार खरेलले ‘भ्रमबाट मुक्त भई अध्यक्ष प्रचण्डको गठबन्धन जिताउने निर्णयको पालना गर्न’ भन्दै सामाजिक सञ्जालबाट आह्वान गरेका छन् ।

खरेल २०७४ सालमा सोही क्षेत्रबाट लुम्बिनी प्रदेशसभा सदस्य निर्वाचित भएका थिए । तत्कालीन माओवादी केन्द्रमा उनी नेता रामबहादुर थापा बादलनिकट मानिन्थे । एमाले–माओवादी एकतापछि बनेको नेकपाको बाँके जिल्ला अध्यक्षको जिम्मेवारीसमेत उनैले पाएका थिए । तर, बाँके ३ मा खरेल, बिक र सुवेदीबीच हार्दिक सम्बन्ध नहुँदा हरेक निर्वाचनमा अन्तरविरोध चर्किने गरेको छ । वैशाखको स्थानीय निर्वाचनमा खरेलले बिकलाई नसघाएको आरोप पनि छ ।

गठबन्धनका तर्फबाट माओवादी केन्द्रले पाएको क्षेत्रमा उम्मेदवारको किचलो रहिरहे त्यसको फाइदा मुख्य प्रतिस्पर्धी ठानिएका एमालेका उम्मेदवार रत्न खत्रीले उठाउने विश्लेषण गरिएको छ । आफ्ना नेताको माओवादी पलायनपछि निराश बनेका नेकपा (एस)का नेताकार्यकर्ताको साथ आफूले पाउनेमा खत्री आशावादी छन् ।

तत्कालीन एमालेभित्रको अन्तरसंघर्षमा उनी माधव नेपालनिकट थिए । पार्टी विभाजन हुने स्थितिमा मात्र उनी एकताको पक्षमा उभिएका थिए । प्रतिनिधिसभा सदस्यको आकांक्षी खत्रीलाई एमालेले प्रदेशसभा सदस्य उम्मेदवार बनाएको छ । उनी २०७० मा एमालेबाट दलबहादुर सुनारले चुनाव जित्दा त्यो क्षेत्रको चुनावी कमाण्डर थिए ।

माओवादी केन्द्रले आफूलाई गठबन्धनको आधिकारिक उम्मेदवार नबनाए धोका हुने स्वतन्त्र उम्मेदवार सुनार बताउँछन् । पार्टीले खरेलको उम्मेदवारी निष्क्रिय पार्नेमा उनी आशावादी छन् । त्यसो नभएमा पनि आफ्नो उम्मेदवारीले निरन्तरता पाउने उनले बताए । बाँके ३ (क)मा हरेक चुनावमा भेगीय नारा चल्छ । त्यसैले पनि मुख्य प्रतिस्पर्धी उम्मेदवारहरूका लागि यसपटकको निर्वाचन पेचिलो बनेको छ ।

बाँके ३ मा एमालेले प्रतिनिधिसभा सदस्यमा जिल्ला अध्यक्षसमेत रहेका किस्मतकुमार कक्षपति, प्रदेश (क)मा खत्री र (ख)मा भीम ओलीलाई उम्मेदवार बनाएको छ ।

प्रकाशित मिति: मंगलबार, कात्तिक १, २०७९ २०:०३