कर्णाली: चुनावी मैदानमा आमनेसामने भएका पूर्वसहकर्मीहरूकाे राेचक प्रतिस्पर्धा

कर्णाली: चुनावी मैदानमा आमनेसामने भएका पूर्वसहकर्मीहरूकाे राेचक प्रतिस्पर्धा

A+ A A-

आगामी मंसिर ४ गते हुने प्रतिनिधिसभा र प्रदेशसभा निर्वाचनमा एउटै पार्टीमा रहेर काम गरेका पूर्वसहकर्मीहरू आमनेसामने हुने भएपछि यसपटकको चुनावी प्रतिस्पर्धा निकै रोचक हुने भएको छ । नेकपा एमालेमा लामो समय सहकार्य गरेका नेताहरू आसन्न निर्वाचनमा फरक फरक दलबाट एकअर्काका चुनौती बनेर उभिएका छन् ।

तत्कालीन एमालेबाट विभाजित भएर बनेको माधव नेपाल नेतृत्वको नेकपा एकीकृत समाजवादी पहिलोपटक प्रतिनिधिसभा र प्रदेशसभा निर्वाचनमा होमिँदै छ । कर्णालीमा (नेपाली कांग्रेस, नेकपा माओवादी केन्द्र र समाजवादी) गठबन्धन बनाएर अगाडि बढेका छन् भने एमाले एक्लैले गठबन्धनलाई चुनौती दिँदैछ । सुर्खेत, दैलेख, सल्यान, डोल्पा, मुगु, हुम्ला, कालीकोट र जुम्लामा उनै पूर्वसहकर्मीहरूबीच चुनावी भिडन्त हुने भएको हो ।

गठबन्धनमा सिट बाँडफाँटमा ३ प्रतिनिधिसभा र २ प्रदेशसभामा पाएको समाजवादीले प्रतिनिधिसभामा गठबन्धनमै रहने तर, प्रदेशसभामा भाग नपाएको क्षेत्रमा पनि चुनाव लड्ने भन्दै उम्मेदवार खडा गरेको छ । दैलेख प्रतिनिधिसभा क्षेत्र नम्बर १, सल्यान र डोल्पा समाजवादीको भागमा परेका क्षेत्र हुन् भने, प्रदेशसभाअन्तर्गत जुम्ला प्रदेशसभा (ख), मुगु प्रदेशसभा (क) हुन् । यसबाहेक अन्य क्षेत्रमा समाजवादीले उठाएका उम्मेदवारले एमाले र गठबन्धनसँगै प्रतिस्पर्धा गर्नेछन् ।

एमाले सुर्खेतले निर्वाचन क्षेत्र नम्बर २ (क) मा एमाले स्थायी कमिटी सदस्य एवम् प्रदेश इन्चार्ज यामलाल कँडेललाई उम्मेदवार बनाएको छ ।

कँडेललाई पूर्वसहकर्मीसमेत रहेका समाजवादीका जिल्ला इन्चार्ज शिवप्रसाद उपाध्यायले चुनौती दिएका छन् । २०७० मा सम्पन्न संविधासभा सदस्य निर्वाचनमा उनै उपाध्यायले कँडेलविरुद्ध बागी लडेपछि कँडेल पराजित भएका थिए । कँडेल दोस्रोपटक प्रदेशसभामा चुनाव लड्दैछन् भने उपाध्याय पनि कँडेललाई दोस्रोपटक हराउने दाउमा छन् । क्षेत्र नम्बर २ का दुवै प्रदेशसभामा समाजवादी गठबन्धन बाहिर छ, भने गठबन्धनका तर्फबाट प्रदेशसभा (क) मा कांग्रेसका कालीप्रसाद शाक्य र प्रदेशसभा (ख) मा माओवादीका विन्दमान विष्ट उम्मेदवार बनेका छन् ।

यस्तै क्षेत्र नम्बर २ (ख) मा पनि पूर्वसहकर्मी नै चुनावी मैदानमा छन् । एमालेले ताराकेशर गौतमलाई उम्मेदवार बनाएको छ भने, समाजवादीले मोहन बडुवाललाई उम्मेदवार बनाएको छ । बडुवाल समाजवादीका जिल्ला अध्यक्षसमेत हुन् । गौतम र बडुवाल संगठन निर्माणमा लामो समय एमालेको मुख्य भूमिकामा रहेर काम गरेका नेता हुन् ।

२ प्रतिनिधिसभा क्षेत्र रहेको दैलेखमा क्षेत्र नम्बर १ मा गठबन्धनका तर्फबाट समाजवादीका प्रदेश अध्यक्ष अम्मरबहादुर थापा र एमाले जिल्ला अध्यक्ष रवीन्द्रराज शर्माबीच चुनावी प्रतिस्पर्धा हुँदैछ । उनीहरू एमालेमा लामो समय सहकार्य गरेका र एउटै भूगोलमा मिलेर राजनीति गरेका नेताहरू हुन् । २०७४ को निर्वाचनमा शर्मा प्रतिनिधिसभा र थापा प्रदेशसभा सदस्यमा विजयी भएका थिए । सांगठनिक रूपमा कमजोर मानिए पनि थापा गठबन्धनको बलमा शर्माका लागि भारी हुन सक्ने आकलन गरिएको छ ।

यस्तै, दैैलैख क्षेत्र नम्बर २ (ख) मा पनि पूर्व एमालेहरू नै मुख्य प्रतिस्पर्धी बनेका छन् । एमालेबाट विनोदकुमार शाह र गठबन्धनका तर्फबाट माओवादी केन्द्रका योगन्द्र शाही प्रतिस्पर्धी बनेका छन् । एमालेका पुराना नेता शाह एमाले प्रदेश अध्यक्ष हुन् । शाहका प्रतिस्पर्धी शाही पूर्वएमाले हुन् । एमालेको केन्द्रीय अर्थ विभागका सचिवसमेत रहेका शाहीलाई एमालेले टिकट नदिएपछि माओवादीमा लागेका थिए । शाही माओवादीमा प्रवेश गरेपछि माओवादीले उपेन्द्र रावतलाई ब्याक गराएर शाहीलाई टिकट दिएको थियो । शाही युवापुस्ताले रुचाइएका नेता हुन् भने शाह बलियो जनाधार भएका पुराना नेता हुन् ।

यस्तै, कालीकोटमा पनि पूर्वसहकर्मीबीच नै लडाइँ हुनेछ । १ प्रतिनिधिसभा रहेको कालीकोटमा प्रदेशसभा (ख) मा एमालेका वीरेन्द्रबहादुर बोगटी र समाजवादीका विश्वराज बमबीच प्रतिस्पर्धा हुनेछ । गठबन्धनका तर्फबाट कांग्रेसका हिक्मतबहादुर विष्ट उम्मेदवार बनेका छन् । कर्णालीका भौतिक पूर्वाधार मन्त्रीसमेत रहेका समाजवादी जुम्लाका पदमबहादुर रोकाया र एमालेका टेकराज पछाईबीच प्रदेशसभा (ख) मा चुनावी भिडन्त हुनेछ । गठबन्धनका तर्फबाट माओवादीकी गोमा गौतम (कुँवर) उम्मेदवार बनेकी छन् । जुम्लामा प्रतिनिधिसभा सिट एक मात्र रहेको छ ।

नेकपा फुटको बीजारोपण गरेका समाजवादीका पार्टी उपमहासचिवसमेत रहेका सल्यानका प्रकाश ज्वालालाई एमालेका रवीन्द्रवीर रायले चुनौती दिँदैछन् । ज्वाला कर्णाली प्रदेशका आर्थिक मामिला तथा योजना मन्त्रीसमेत बनिसकेका छन् । राय केही समयअघि राप्रपाबाट एमाले प्रवेश गरेका थिए ।

एक प्रतिनिधिसभा सिट रहेको मुग प्रदेशसभा (क) मा समाजवादीबाट गोपालबहादुर बम उम्मेदवार छन् । एमाले फुटपछि समाजवादी रोजेका बम र एमालेका जितबहादुर मल्लबीच प्रतिस्पर्धा हुँदैछ । यसअघि प्रतिनिधिसभा सदस्य रहेका बम प्रदेशसभामा झरेका हुन् । बमलाई अहिले कांग्रेस र माओवादी केन्द्रको साथ छ ।

डोल्पामा पनि पूर्वएमालेहरू नै लड्ने भएका छन् । निवर्तमान ठूलीभेरी नगरपालिकाका प्रमुख एमालेका गणेशबहादुर शाही र समाजवादीका धनबहादुर बुढाले प्रतिस्पर्धा गर्नेछन् । बुढा यसअघिका प्रतिनिधिसभा सदस्यसमेत हुन् । हुम्ला प्रदेशसभा (क) मा पूर्वसहकर्मी एमालेका दल फडेरा र समाजवादीका हस्तबहादुर शाही उम्मेदवार बनेका छन् । कर्णालीमा प्रतिनिधिसभाका १२ र प्रदेशसभाका २४ सिट छन् ।

प्रकाशित मिति: बुधबार, कात्तिक २, २०७९ २१:४१