दोस्रोपटक संसद छिर्ने दाउमा सिलवाल, सर्वेन्द्र खनाल र रमेश खरेलले जित्लान् चुनाव ?

दोस्रोपटक संसद छिर्ने दाउमा सिलवाल, सर्वेन्द्र खनाल र रमेश खरेलले जित्लान् चुनाव ?

A+ A A-

प्रहरी सेवामा रहँदा चर्चामा रहेका पूर्वआईजीपी सर्वेन्द्र खनाल, पूर्वडीआईजी रमेश खरेललगायत छजना प्रहरी अधिकृत चुनावी मैदानमा छन् । पूर्वआईजीपी खनाल एमाले प्रवेश गरेर काठमाडौं क्षेत्र नम्बर ६ बाट प्रतिनिधिसभा सदस्यको उम्मेदवार बनेका छन् भने पूर्वडीआईजी खरेल भने आफ्नै दल सुशासन पार्टी नेपालबाट काठमाडौं क्षेत्र नम्बर १ बाट उठेका छन् । खनाल र खरेलबाहेक अवकाशप्राप्त अन्य सुरक्षाकर्मीहरू कांग्रेस, राप्रपालगायत दलहरूबाट चुनावमा होमिएका छन् ।

यी हुन् चुनावी मैदानमा उत्रिएका सुरक्षाकर्मी

पूर्वआईजीपी सर्वेन्द्र खनाल

नेकपा एमालेले काठमाडौं क्षेत्र नम्बर ६ बाट पूर्वआईजीपी सर्वेन्द्र खनाललाई उम्मेदवार बनाएको छ । खनाल केही समयअघि मात्रै एमाले प्रवेश गरेका थिए । काठमाडौं ६ बाट टिकट पाउने पक्का भएपछि खनाल एमाले प्रवेश गरेका हुन् ।

खनाल उम्मेदवार बनेको काठमाडौं ६ मा सत्ता गठबन्धनबाट कांग्रेसका भीमसेनदास प्रधान चुनावी मैदानमा छन् । अघिल्लोपटक वाम गठबन्धन हुँदा पनि सांसदमा निर्वाचित भएका प्रधानलाई योपटक माओवादी केन्द्र र एकीकृत समाजवादीकाे साथ छ । त्यसैले एमालेबाट उम्मेदवार बनेका खनाललाई प्रधानमाथि जित निकाल्न निकै गाह्रो पर्ने देखिन्छ । काठमाडौं ६ मा जनमतका हिसाबले कांग्रेसको बलियो पकड छ ।

पूर्वडीआईजी रमेश खरेल

सुशासन पार्टी नेपालका अध्यक्ष पूर्वडीआईजी रमेश खरेल पनि चुनावी प्रचारप्रसारमा व्यस्त छन् । काठमाडौं १ बाट प्रतिनिधिसभा सदस्यको उम्मेदवार बनेका खरेलले सत्ता गठबन्धनबाट उम्मेदवार बनेका प्रकाशमान सिंह, राप्रपाका वरिष्ठ उपाध्यक्ष रवीन्द्र मिश्र र स्वतन्त्र उम्मेदवार पुकार बमसँग प्रतिस्पर्धा गर्नुपर्नेछ ।

अघिल्लोपटक यो क्षेत्रबाट कांग्रेसका प्रकाशमान सिंह नै निर्वाचित भएका थिए । त्यतिबेला सिंहले विवेकशील साझाबाट उम्मेदवार बनेका मिश्रलाई हराएका थिए । योपटक पनि यो क्षेत्रमा सिंह र मिश्रबीच नै मुख्य प्रतिस्पर्धा हुने देखिन्छ । प्रहरी सेवामा रहँदा चर्चा कमाएका खरेलले सिंह र मिश्रलाई चुनौती दिने आकलन गरिएको छ । तर, जित नै निकाल्न भने खरेललाई गाह्रो पर्ने देखिन्छ ।

पूर्वएआईजी ठाकुरमोहन श्रेष्ठ

सशस्त्र प्रहरीका पूर्वएआईजी ठाकुरमोहन श्रेष्ठ पनि योपटक काठमाडौं– ४ बाट प्रतिनिधिसभा सदस्यको उम्मेदवार बनेका छन् । श्रेष्ठ राप्रपाबाट उम्मेदवार बनेका हुन् । काठमाडौं ४ कांग्रेस महामन्त्री गगन थापा र एमाले नेता राजन भट्टराईको निर्वाचन क्षेत्र हो ।

कांग्रेसका थापाले २०७० र २०७४ मा यही निर्वाचन क्षेत्रबाट निर्वाचित भएका थिए । २०७४ सालको निर्वाचनमा थापाले वाम गठबन्धनका तर्फबाट उम्मेदवार बनेका एमालेका राजन भट्टराईलाई पराजित गरेका थिए । योपटक पनि कांग्रेसबाट थापा र एमालेबाट भट्टराई चुनावी मैदानमा उत्रिएका छन् । त्यसैले पनि उनीहरूलाई श्रेष्ठले हराउने सम्भावना कमै छ ।

पूर्वसैनिक अधिकृत प्रणयशमशेर राणा

काठमाडौं–५ बाट पूर्वसैनिक अधिकृत डा. प्रणय शमशेर राणाले उम्मेदवारी दिएका छन् । राष्ट्रिय स्वतन्त्र पार्टीबाट उम्मेदवार बनेका राणाले कांग्रेसका प्रदीप पौडेल र एमाले वरिष्ठ उपाध्यक्ष ईश्वर पोखरेलसँग प्रतिस्पर्धा गर्नुपर्नेछ । अघिल्लोपटक यो क्षेत्रबाट एमालेका पोखरेल निर्वाचित भएका थिए । उनले कांग्रेस नेता डा. प्रकाशशरण महतलाई पराजित गरेका थिए । यसपटक पनि यो क्षेत्रमा मुख्य प्रतिस्पर्धा एमालेका पोखरेल र कांग्रेसका पौडेलबीच नै हुने देखिन्छ ।

पूर्वएसएसपी विक्रमसिंह थापा

कपिलवस्तु २ ‘क’ बाट प्रदेशसभा सदस्यको उम्मेदवार बनेका छन् पूर्व एसएसपी विक्रम सिंह थापा । कांग्रेस महाधिवेशनमा प्रतिनिधिसमेत रहेका थापा गठबन्धनका तर्फबाट प्रदेशसभा सदस्यको उम्मेदवार बनेका हुन् । उनको प्रतिस्पर्धामा एमालेका नवराज लामिछाने र राप्रपाका गितेन्द्रमणि शुक्लासँग हुनेछ ।

प्रदेश सदस्यमा कांग्रेसका थापा र एमालेका लामिछानेबीच नै मुख्य प्रतिस्पर्धा हुने आकलन गरिएको छ । सत्ता गठबन्धनबाट उम्मेदवार बनेकाले थापालाई चुनाव जित्न केही सहज देखिन्छ ।

दोहोरिने दाउमा सिलवाल

प्रहरीका पूर्वडीआईजी नवराज सिलवाल प्रतिनिधिसभा सदस्यमा पुन: दोहोरिने दाउमा छन् । आईजीपीको दौडमा रहेका सिलवाललाई सरकारले आईजीपीमा नियुक्त नगरेपछि उनी राजीनामा दिएर राजनीतिमा होमिएका थिए । राजीनामा दिएलगत्तै २०७४ सालको निर्वाचनमा एमालेले ललितपुर १ बाट सिलवाललाई उठाएको थियो । उक्त निर्वाचनमा कांग्रेसका उदयशमशेर राणालाई पराजित गर्दै सिलवाल निर्वाचित भएका थिए । अघिल्लोपटक वाम गठबन्धनबाट उम्मेदवार बनेका सिलवाल योपटक अन्य दलको साथ छैन ।

अघिल्लो पटक सिलवाललाई सहयोग गरेको माओवादी केन्द्रले यो पटक कांग्रेसका उदयशमशेर राणालाई समर्थन गरेको छ । राणालाई माओवादी केन्द्रसँगै एकीकृत समाजवादीको पनि साथ छ । सिलवाल सत्ता गठबन्धनका उम्मेदवार राणालाई पराजित गर्दै दोस्रोपटक संसद छिर्ने दाउमा छन् । तर, योपटक सिलवाललाई जित निकाल्न सहज भने छैन । सत्ता गठबन्धनको बलमा सिलवालसँग योपटक हारको बदला लिने रणनीतिमा छन् राणा ।

पूर्वआईजीपी ध्रुवबहादुर प्रधान

राप्रपाबाट पूर्वआईजीपी ध्रुवबहादुर प्रधान पनि नवलपरासी २ बाट प्रतिनिधिसभा सदस्यमा उम्मेदवार बनेका छन् । यो क्षेत्रमा कांग्रेसबाट देवेन्द्रराज कँडेल र एमालेबाट दीपेन्द्र अधिकारी उम्मेदवार बनेका छन् । त्यसैले यो क्षेत्रमा कांग्रेस र एमालेबीच नै प्रतिस्पर्धा हुने आकलन गरिएको छ । राप्रपाका प्रधान यसअघि २०६४ र २०७० सालको निर्वाचनमा नवलपरासी–४ बाट उठेका थिए । तर, दुवै निर्वाचनमा प्रधानले हार ब्यहोरेका थिए ।

प्रकाशित मिति: मंगलबार, कात्तिक १, २०७९ १४:२२