आचारसंहिता उल्लंघन गर्नेलाई कारबाही गर्न हात नकमाउनूस्ः आयुक्त भण्डारी

A+ A A-

निर्वाचन आयोगले निर्वाचन आचारसंहिता उल्लंघन गर्नेलाई तत्काल कारबाही गर्न प्रमुख जिल्ला अधिकारीहरूलाई निर्देशन दिएको छ ।

सोमबार गृह मन्त्रालयमा देशभरका प्रमुख जिल्ला अधिकारीहरूसँगको भर्चुअल बैठकमा निर्वाचन आयोगका आयुक्त रामप्रसाद भण्डारीले आचारसंहिता उल्लंघन गरेको पाइए तत्काल कारबाही गर्न निर्दशन दिएका हुन् ।

केन्द्रीय निर्वाचन आचारसंहिता अनुगमन समितिका संयोजकसमेत रहेका भण्डारीले आचारसंहिता उल्लंघनको प्रमाण भेटिए तत्काल नियन्त्रणमा लिन कञ्जुस्याईं नगर्न आग्रह गरे ।

‘निर्वाचनको सन्दर्भमा कसैले कसुर गर्छ भने कसुरजन्य क्रियाअन्तर्गत अनुसन्धानको विषय हुन्छ । सरकारी वकिल र प्रहरीले छानबिन गरेर अदालतमा मुद्दा चलाउनुपर्ने हुन्छ । निर्वाचनलाई प्रतिकुल असर पार्ने गरी कुनै हुलदंगा गर्ने, निर्वाचन विथोल्ने कामहरू हुन्छन् भने त्यसलाई नियन्त्रण गर्नलाई स्थानीय प्रशासनले तत्काल आदेश जारी गर्नसक्ने अवस्था विद्यमान छ,’ भण्डारीले भने, ‘आचारसंहितामा उल्लेख गरेका बाहेक कुनै पनि दलका कार्यक्रमहरू छन् भने ती कार्यक्रमहरूमा आचारसंहिता उल्लंघन भएको छ भने तत्काल नियन्त्रण गर्नलाई कुनै पनि कञ्जुस्याईं बाँकी नराख्नुस् ।’

मुख्य निर्वाचन अधिकृत व्यस्त भएको अवस्थामा उनको क्षेत्राधिकार प्रमुख जिल्ला अधिकारीले प्रयोग गर्नसक्ने उनको भनाइ थियो । आचारसंहिता तर्जुमा गर्दा प्रमुख जिल्ला अधिकारीहरूको भूमिकालाई स्पष्ट रूपमा उल्लेख गरिएको उनको भनाइ छ ।

‘प्रमुख जिल्ला अधिकारीज्यूहरूको टड्कारो भूमिका नदेखिँदाखेरी आचारसंहिता उल्लंघन नियन्त्रण गर्नलाई अलि कठिनाइ भएको आयोगले महशुस गरेको छ । यदि मुख्य निर्वाचन अधिकृत व्यस्त भएको अवस्थामा पनि सहसंयोजक तपाईं प्रमुख जिल्ला अधिकारीज्यूहरू भएको नाताले उहाँहरू व्यस्त भए पनि त्यो क्षेत्राधिकार सम्पूर्ण प्रयोग गरेर त्यसलाई तत्काल नियन्त्रण गर्न प्रमुख जिल्ला अधिकारीज्यूहरू सक्षम हुनुहुन्छ भन्ने आयोगले विश्वास र ठहर गरेको छ,’ भण्डारीले भने, ‘हामीले यहाँहरूको स्पष्ट भूमिकासमेत उल्लेख गरेर आचारसंहिता तर्जुमा गरेको यहाँ कमीकमजोरी र अफ्ठ्यारो छन् भन्ने मलाई लाग्दैन । यसलाई तत्काल कार्यान्वयन गर्न यहाँहरु सक्षम हुनुहुन्छ ।’

घरदैलो कार्यक्रममा दलहरूले आचारसंहिता उल्लंघन गरेको उजुरीहरू आएकोतर्फ गम्भीर ध्यानाकर्षण गराउँदै त्यसलाई तत्काल नियन्त्रण गर्न भण्डारीले निर्देशन दिए । आचारसंहिता पालना भएको नभएमा कठोरतापूर्वक कारबाही गर्नुपर्ने उनको भनाइ थियो ।

प्रकाशित मिति: सोमबार, असोज ३१, २०७९ १८:५१