हरिबोलको असन्तुष्टि- चुनाव लड्ने तपाईं नै हो भनेर भित्रभित्र टिकट नदिने तानाबाना बुनिएको रहेछ

हरिबोलको असन्तुष्टि- चुनाव लड्ने तपाईं नै हो भनेर भित्रभित्र टिकट नदिने तानाबाना बुनिएको रहेछ

A+ A A-

सिन्धुली- २ बाट प्रतिनिधिसभाको टिकटका आकांक्षी रहेका माओवादी केन्द्रका उपमहासचिव हरिबोल गजुरेल टिकट नपाएपछि पार्टी नेतृत्वप्रति असन्तुष्ट छन् । उक्त क्षेत्रमा माओवादीले पोलिटब्युरो सदस्य लेखनाथ दाहाल (राजन) लाई प्रतिनिधिसभाको उम्मेदवार बनाएको छ ।

आफूले दाबी गरेको टिकट राजनले उम्काएपछि गजुरेलले प्रचण्डलाई असहमतिपत्र बुझाएका छन् । सुरुमा प्रचण्डले ‘तपाईं नै हो चुनाव लड्ने’ भनेको उनको दाबी छ । ‘तर, अन्तिम समयमा आएर टिकट नदिनुको कारण के हो ?’ उनको प्रश्न छ । राजनीतिक रूपमा सिध्याउने षड्यन्त्र भएकाले पदाधिकारी बैठकमा छलफल हुनुपर्ने माग पत्रमा रहेको गजुरेल बताउँछन् ।

‘किन मैले अन्तिम समयमा आएर टिकट पाइनँ ? मलाई त जानकारी हुनुपर्‍यो । अर्को मसँग तँ नै होस् चुनाव लड्ने भन्ने भित्रभित्र टिकट नदिने तानाबाना बुनेको रहेछन् । त्यही कुरा असहमतिपत्रमा लेखेको छु,’ गजुरेलले शिलापत्रसँग भने, ‘टिकट नपाउनुको कारण पदाधिकारीमा छलफल होस् भन्ने माग गरेको छु ।’

गजुरेल सिन्धुलीबाट दुई पटक निर्वाचित भएका थिए । ‘मलाई पहिला नै तपाईं पार्टी काममा लाग्नुपर्छ । युवालाई अवसर दिउँ भनेर प्रचण्डले छलफल गरेका भए मान्न गाह्रो हुँदैन थियो,’ उनले भने, ‘तर, पहिला चुनावको तयारी गराउन लगाउने अन्तिमा टिकट खोस्दा अपमान गरेको बुझिन्छ ।’

असहमतिपत्र बुझाए पनि प्रचण्डसँग थप कुरा नभएको उनले बताए । ‘आज भेटेर छलफल गर्ने भन्ने भएको छ । म आफ्ना कुरा राख्छु । उहाँले के भन्नु हुन्छ हेरौँ,’ गजुरेलले भने । गजुरेल अहिले जिल्लाका कार्यक्रममा पनि सहभागी छैनन् । प्रचण्डसँग छलफल गरेर मात्रै जिल्ला जाने उनको तयारी छ ।

राजनलाई टिकट दिलाउन जिल्लाका नेता-कार्यकर्ताहरू खुमलटारमा डेलिगेशन नै आएका थिए । १५ असोजमा सिन्धुलीका ९ वटै पालिकाका नेताहरू दाहालको पक्षमा डेलिजेशनमा आएका थिए ।

प्रकाशित मिति: सोमबार, असोज ३१, २०७९ १४:२८