माइती नेपाललाई सहयोग गर्न खुल्यो माइती क्याफे

A+ A A-

चेलीबेटी बेखबिखनविरुद्ध क्रियाशील माइती नेपालमा आश्रितलाई सघाउन बानेश्वर चोकमा माइती क्याफे सञ्चालनमा आएको छ ।

विदेशबाट फर्किएका युवाले स्थापना गरेको आफ्नो नेपाल नामक संस्थाले विदेशी दातृ संस्था फ्रि गर्लको संयाेजकत्व र माइती नेपालसँगको सहकार्यमा माइती क्याफे सञ्चालनमा ल्याएको हो ।

यस क्याफेबाट प्राप्त नाफाको ५१ प्रतिशत रकम माइती नेपाललाई दिइने आफ्नो नेपालसँग आबद्ध समीर पन्थीले बताए ।

नाफाको बाँकी ४९ प्रतिशत रकमसमेत यही क्याफेको व्यवस्थापन र अन्य सामाजिक काममा प्रयोग गरिने उनको भनाइ छ । क्याफेबाट हुने आम्दानीले माइती नेपाललाई दातामै निर्भर रहनुपर्ने बाध्यता न्यूनीकरण गर्ने अपेक्षा क्याफे सञ्चालकको छ ।

माइती क्याफेमा माइती नेपालमा आश्रित चेलिबेटीहले रोजगारी पाएका छन् ।

‘माइती नेपालको संरक्षणमा रहेका नेपाली चेलीबेटीको पुनर्जीवनका लागि पनि यो क्याफे महत्त्वपूर्ण माध्यम हुन सक्छ भन्ने हामीले विश्वास लिएका छौं, माइती नेपालमा रहेका चेलीलाई यस क्याफेमा संलग्न गराएर उनीहरुलाई सिप सिकाउने, आत्मबल बढाउने, समाजमा अन्तर्घुलन गराउने र आत्मनिर्भर गराउने उद्देश्य क्याफेले लिएको छ,’ पन्थीले भने ।

आफ्नो नेपालको नेतृत्व गरेका युवा उद्यमी तथा अभियन्ता पन्थीले अमेरिकामा विभिन्न व्यवसाय सञ्चालन गरेका थिए । देशमै केही गर्नुपर्छ भन्ने भावनाका साथ नेपाल फर्किएर उनले सामाजिक अभियान र व्यावसायिक काम गर्दै आएका छन् । उनलाई उपेन्द्रबहादुर श्रेष्ठ, प्रविरशमशेर राणा र मनिष कोइरालाले साथ दिएका छन् । आफ्नो नेपालको माइती क्याफे पहिलो प्रोजेक्ट हो ।

क्याफेमा नेपाली र विदेशी विभिन्न परिकार पाइनेछ । यहाँको परिकाकारे मूल्य पनि निकै सस्तो राखिएको पन्थीले दाबी गरे । क्याफेको मेनुमा समेत माइती नेपालका सामाजिक कामको जानकारी राखिएको छ ।

प्रकाशित मिति: सोमबार, साउन २०, २०७६ २३:३१