कन्सुलर सेवा विभागले ल्यायो ‘सहज तथा सुलभ कन्सुलर सेवा’, अब पाँच मिनेटमै काम

कन्सुलर सेवा विभागले ल्यायो ‘सहज तथा सुलभ कन्सुलर सेवा’, अब पाँच मिनेटमै काम

A+ A A-

परराष्ट्र मन्त्रालयको कन्सुलर सेवा विभागले सेवाग्राहीलाई ‘सहज तथा सुलभ कन्सुलर सेवा’ दिने भएको छ । यस कार्यक्रमले विभागको सेवा प्रवाह छिटो–छरितो मात्र नभई राजस्व सङ्कलन वृद्धि तथा अन्तर्राष्ट्रिय समुदायमा नेपालका कागजपत्र प्रमाणितका लागि समेत सहयोग पुग्ने विभागले जनाएको छ ।

सबै काजगात चुस्त अवस्थामा रहे कन्सुलरसम्बन्धी कतिपय सेवा पाँच मिनेटभित्रै उपलब्ध गराउने नवीनतम प्रणाली अभ्यासमा ल्याएको विभागका महानिर्देशक धनबहादुर ओलीले जानकारी दिए ।

नयाँ सूचना प्रविधि प्रणाली प्रयोगमा ल्याइएपछि दूरदराजबाट काठमाडौं आएर कागजपत्र नमिलेर फर्कनुपर्ने समस्या हट्नुका साथै जनतालाई पालिका तहबाटै कन्सुलरसम्बन्धी सेवा प्रभावकारी हुने उनको भनाइ छ ।

‘विभागद्वारा प्रदान गरिएका सबै सेवा अनलाइन अभिलेखमा दर्ता छन् । विगतमा पाँच–सात घण्टा लाग्ने केही काम अहिले प्राविधिक हिसाबमा २१ सेकेन्डमा हुन्छ भने समग्रमा पाँच मिनेटभित्र सबै काम नै सम्पन्न हुन्छ,’ उनले भने ।

उनका अनुसार विभागको आफ्नै कार्ययोजना र सिर्जनामा निर्माण गरिएको अनलाइन कन्सुलर सेवा प्रणाली पूर्ण रूपमा सुरक्षित मात्र नभई आवश्यकतानुसार परिमार्जन गर्नसमेत अरु कुनै कम्पनीमा निर्भर हुनु पर्दैन ।

विभागको सेवा लिने क्रममा कुनै समस्या र अल्झन खेप्न नपरोस् भनी निःशुल्क रूपमा टोल फ्रि नम्बर ११५२ सञ्चालनमा ल्याएर केन्द्रसँग जोड्ने काम भएको विभागले जनाएको छ । महानिर्देशक ओली भन्छन्, 'मुलुकभर कन्सुलर सेवालाई जनताप्रति उत्तरदायी बनाउँदै कम समयमा नै सहज र गुणस्तरीय सेवा दिने प्रयास गरिएको छ । त्यसका लागि तत्तत् कार्यालयमा इन्टरनेट र विषयविज्ञ जनशक्ति भने आवश्यक छ ।' विभागको यस कार्यले सेवाग्राहीले अब काठमाडौं आउनुपर्ने स्थितिमा कमी भएको छ ।

विभागले आर्थिक वर्ष २०७८/७९ मा ३ लाख ७८ हजार व्यक्तिलाई कन्सुलर सेवा प्रदान गरी कागज प्रमाणित गरेबापत २२ करोड रुपैयाँ राजस्व सङ्कलन गर्न सफल भएको छ । अघिल्लो आर्थिक वर्षमा भने १ लाख ३४ हजारले मात्र त्यो सेवा प्राप्त गरेका थिए ।

पालिका तहबाट जारी कागजात राष्ट्रिय परिचयपत्र र पञ्जीकरण विभागसँग प्रणालीमा आबद्धता गरी तत्काल नै प्रमाणीकरण हुनेसमेत व्यवस्था गरिएको छ ।

नेपालका अन्य विभाग तथा निकायलाई समेत कन्सुलर प्रणालीमा आबद्धता गर्ने कार्य भइरहेको जानकारी दिइएको छ । कन्सुलर सेवा विभागबाट प्रमाणीकरण भएका सम्पूर्ण काजगातको कन्सुलर सेवा विभागको प्रणालीमा विश्वभरबाट नै अनलाइन रुजु गर्न सक्ने व्यवस्था गरिएको छ ।

प्रकाशित मिति: आइतबार, असोज ३०, २०७९ १३:५८