'बाह्य शक्तिद्वारा प्रायोजित आत्मसमर्पणवादी शक्तिसँग लड्न एमालेसँग सहकार्य'

'बाह्य शक्तिद्वारा प्रायोजित आत्मसमर्पणवादी शक्तिसँग लड्न एमालेसँग सहकार्य'

A+ A A-

पञ्चायतको आखिरी समयदेखि बहुदल हुँदै गणतन्त्रकालसम्म आफूलाई राजनीतिमा फिट गराएका नेता हुन्– कमल थापा । राजनीतिलाई मसिनो गरी केलाउन सकेका थापाले यी सबै कालखण्डमा प्रशस्त अवसर पाएका गरेका छन् । तर, राजनीतिक करिअरको उत्तरार्धमा आइपुगेका थापा अहिले भने संसदीय राजनीतिबाट ‘ग्रेसफुल एक्जिट’को खोजीमा छन् । त्यसैका लागि उनले एमालेसँग सहकार्य गर्न पुगेका छन् । सकार्यमात्र होइन, एमालेको चुनाव चिह्न नै लिएर चुनावी मैदानमा ओर्लिएका छन् । थापाका कारण एमालेभित्र असन्तुष्टि फैलिएको छ । त्यसले एमालेलाई चुनावी परिणाममा असर पर्ने संकेत पनि देखिएको छ । राप्रपा नेपालका अध्यक्ष तिनै थापासँग शिलापत्रका लागि योगेश ढकालले गरेको संक्षिप्त कुराकानीको सम्पादित अंश :

राजनीतिको उत्तरार्धमा राजनीतिक जीवनका सबै आर्दश र मूल्यमान्यता छोडेर एमालेसँग आत्मसर्पण गर्ने किन पुग्नुभयो ?

यसलाई अस्वभाविक रुपमा लिनुपर्ने जरुरी छैन । एक समययता गठबन्धनको राजनीतिक अभ्यास सुरु भएको छ । एकातिर पाँचदलीय गठबन्धन रहेको छ । अर्कातिर सिंगो एमाले एउटा शक्तिको रुपमा रहेको छ । यो देशमा नैतिकता, आर्दशको कुरा गरेर सानो पार्टीहरूले चुनावमा भाग लिँदा सफलता हासिल गर्ने संभावना न्यून रहेको छ । आर्दश कुरा गर्‍यो अनि चुनावमा हार्‍यो भने हाम्रो कुरा कहीँ पुर्‍याउन सकिँदैन । पार्टीको अस्तित्व संकटमा पर्छ । त्यसकारण यो चुनाव हामीले कुनै पनि हालतमा जित्नुपर्छ भन्ने मान्यताका आधारमा एमालेसँग सहकार्य गरेका हौं । यसलाई आत्मसर्पण भन्न मिन्दैन ।

आफ्नो पार्टीको चुनाव चिह्नप्रतिको अविश्वासले पार्टी गठन नै बेकार रहेछ भन्ने सन्देश पो गयो त ?

सहकार्य गरिसकेपछि राजनीतिक दलसम्बन्धी ऐनले एकल चुनाव चिह्नको सुविधा दिएको छ । दुई वा दुईभन्दा बढी दल मिलेर जाने कुरा भएपछि हामीसँग दुईवटा चुनाव चिह्न भए । एउटा राप्रपा नेपालको तीर चुनाव चिह्न अर्को एमालेको सूर्य । राप्रपा नेपालको चुनाव चिह्न तीर जनताका लागि नयाँ हुन्छ । पहिलोपटक उक्त चिह्नबाट चुनावमा गइरहेका छौं । अर्कोतिर एमालेको सूर्य चिह्न लोकप्रिय छ र जनतामा स्थापित छ । यी दुईमध्ये एक चिह्न लिएर जानुपर्ने भएकोले सूर्य चिह्न लिएको हो । यसलाई नैतिकता, आर्दशबाट विचलित भएको भन्ने ढंगले सोच्नु हुँदैन ।

एमाले र सूर्यको छत्रछायाँमा परेपछि कमल थापाका राजनीतिक एजेण्डामा पनि सकिए होइन् ?

विगत केही समययता मलाई राजनीतिक रुपमा समाप्त गर्ने विस्थापित गर्ने संगठित रुपमा प्रयास भइरहेको छ । त्यही क्रममा आरोप लगाइएको छ । यो अवस्था मेरो आर्दश, मेरो विश्वास, मेरो मान्यता र सिद्धान्त स्थापित गर्नका निम्ति संसदमा पुग्न जरुरी छ । त्यो आवाजलाई बचाएर राख्नुपर्नेछ । मान्छेले अनेक आरोप लगाउँछन् । आरोप लगाउनेसँग बहस गर्ने कुरा भएन । मैले आफ्नो राजनीतिक करिअर, पार्टी र विचार जोगाउनका निम्ति सहकार्य गरेको हुँ । चुनावपछिका मेरा गतिविधिले त्यसलाई जवाफ दिनेछ ।

एमालेसँग तपाईंको प्रेम खासमा एक थान टिकटका लागि हो भन्ने जस्तो देखिएन र ?

अहिले राजनीति दुई धारमा विभाजित भएको छ । देशमा राष्ट्रियता कमजोर बनाउने योजनाबद्ध र संगठित रुपमा प्रयास भइरहेको छ । देशीविदेशी शक्ति यसमा संलग्न रहेका छन् । अहिलेको अवस्थाको हामीले राष्ट्रवादी शक्तिलाई बलियो बनाउनुपर्नेछ । कतिपयलाई तितो लाग्न सक्छ, अहिलेको अवस्थामा राष्ट्रियताको धारलाई बोक्ने मुल संवाहक एमाले नै हो । कसैलाई चित्त बुझोस् वा नबुझोस् । नाकाबन्दीको बेला केपी ओली र एमालेले लिएको अडान, लिम्पियाधुरा समेटिएको चुच्चे नक्सा प्रकाशित गर्ने कामले राष्ट्रियताको पक्षमा एमाले दृढ छ भन्ने देखिन्छ ।

एमालेको चिह्नबाट चुनाव लड्ने भनेको सांसद हुने सुनिश्चितताजस्तै हो । धेरै लामो संर्घष गरेका, लामो पृष्ठभूमि भएका नेताहरू हुनुहुन्छ । उहाँहरूको अपेक्षा नाजायज पनि होइन । यहिँ मकवानपुरमा त्यस्ता धेरै नेताहरू हुनुहुन्छ ।

अहिले राष्ट्रियतालाई कमजोर बनाउने प्रयास भइरहेको बेलामा सबै राष्ट्रवादी शक्तिहरू एक ठाउँमा आउनुपर्छ । त्यही क्रममा एमालेसँग हाम्रो सहकार्य हो । राष्ट्रवादी शक्तिलाई बलियो बनाउने र वाह्य शक्तिको सहयोग र प्रायोजनमा राष्ट्रियता कमजोर बनाउन भइरहेको प्रयासलाई रोक्न हामीले सहकार्य गरेका हौं ।

खासमा त तपाईंमा देखिएको विचलनले नेता कार्यकर्तामाथि धोका भयो नि ?

त्यो आगामी दिनले देखाउने कुरा हो । त्यसमा अहिले म धेरै केही भन्दिनँ । अहिले मलाई विभिन्न आरोपहरू लगाइएको छ । त्यसलाई अन्यथा रुपमा लिएको छैन । अहिले प्रतिवाद गर्दै हिँड्नेभन्दा पनि आफ्नो मान्यता र लक्ष्यमा दृढ भएर अगाडि बढ्ने हो । यो चुनाव राष्ट्रियता पक्षधर शक्ति र आत्मसर्पणवादी शक्तिबीचको प्रतिष्पर्धा हो । यो चुनाव भनेको अस्थिरता पक्षधर र स्थिरता पक्षधरबीचको प्रतिष्पर्धा हो । त्यसकारण राष्ट्रियता र स्थिरताको पक्षधरसँग समझदारी गरेर अगाडि बढेको हौं ।

तपाईंले टिकट पाउने घनश्याम भुसाल र भीम रावलहरूले टिकट नपाउने स्थिति आयो । त्यो असन्तुष्टि एमालेभित्र भूसको आगोझै भइरहेको छ । अनि, तपाईंकै निर्वाचन क्षेत्रमा पनि एमालेहरू विरोधमा देखिए र कार्यालयमा तालाबन्दीसमेत भयो । त्यो असन्तुष्टिलाई कसरी विश्लेषण गरिरहनुभएको छ ? अनि यस्तो बेला कसरी चुनाव जितिएला त ?

यो मैलेभन्दा पनि एमाले र एमालेको नेतृत्वले व्यवस्थापन गर्ने कुरा हो । यो अस्वभाविक होइन, किनकी एमाले ठूलो पार्टी हो । त्यहाँ टिकटका आकांक्षीहरू धेरै हुन्छन् । एमालेको चिह्नबाट चुनाव लड्ने भनेको सांसद हुने सुनिश्चितताजस्तै हो । धेरै लामो संर्घष गरेका, लामो पृष्ठभूमि भएका नेताहरू हुनुहुन्छ । उहाँहरूको अपेक्षा नाजायज पनि होइन । यहिँ मकवानपुरमा त्यस्ता धेरै नेताहरू हुनुहुन्छ । म एमालेसँगको सहकार्यमा चुनाव लड्ने भएपछि उहाँहरूलाई असर परेको छ । तर, राष्ट्रिय परिस्थितिलाई दृष्टिगत गर्दै एमालेको जिल्ला तहको नेतृत्वले यो कुरालाई महसुस गर्नुहुनेछ र केन्द्रीय नेतृत्वले पनि त्यसलाई व्यवस्थित गर्नुहुनेछ । मलाई खुसी लागेको छ कि पहिला केही असन्तुष्टि थियो अहिले त्यो समाप्त भइसकेको छ ।

पञ्चायतदेखि राजनीति गरेको नेताले आफ्नो एउटा निर्वाचन क्षेत्र पनि सुरक्षित गर्न नसकेको जस्तो देखियो । यसमा कुनै ग्लानी त छैन ?

निश्चय पनि त्यसमा केही कमजोरी रहे । संसदमा हाम्रो आवाज पुर्‍याउनका लागि एमालेसँग सहकार्य गर्नु आवश्यक थियो । र,त्यो आवश्यकताका लागि भएको सहकार्यका लागि अन्य विभिन्न जोडकोणबाट विश्लेषण गर्न आवश्यक छैन ।

तपाईंको आफ्नै पुराना सहयात्री दीपक सिंह पनि प्रतिष्पर्धामा हुनुहुन्छ । अलिक नमिठो त लागिरहेको होला होइन् ?

प्रतिष्पर्धा गठबन्धनसँगै हो । उम्मेदवार त धेरै छन् । तर, एमाले र सत्ता गठबन्धनबीच हुने हो । त्यसमा को प्रतिष्पर्धी छ वा छैन भन्ने मुल कुरा होइन ।

खासमा तपाईं अहिले के चुनावी एजेण्डा लिएर गइरहनुभएको छ ?

मुख्य चुनावी एजेण्डा भनेको राष्ट्रियताको संरक्षण र लोकतन्त्रको सुदृढीकरण, सुशासन र आर्थिक समृद्धि हो । मकवानपुर जिल्लाको हकमा वागमती प्रदेशको राजधानी बनाउने क्रममा महत्वपूर्ण योगदान गरेको छु । अब हेटौँडालाई सातवटै प्रदेशको नमुनालायक राजधानी बनाउने प्राथमिकता रहनेछ । हेटौँडा–काठमाडौं जोड्ने सुरुङ मार्ग, हेटौँडा वरिपरिको ६३ किमी चक्रपथको निर्माण, हेटौँडा अस्पतालको स्तरोन्नती र मकवानपुरमा एउटा विश्वविद्यालय स्थापना मेरो प्राथमिकता रहेका छन् ।

प्रकाशित मिति: शनिबार, असोज २९, २०७९ १६:०१