निजी आवास पुनर्निर्माण: ४ लाख २४ हजार घरको पुनर्निर्माण, २ लाख १४ हजार बन्दै

A+ A A-

१२ वैशाख २०७२ र त्यसपछिका परकम्पबाट प्रभावित ४ लाख २४ हजार ९७७ लाभग्राहीले अनुदान लिई घर निर्माण सम्पन्न गरेका छन् । थप २ लाख १४ हजार ३ सय १४ लाभग्राहीका घर पुनर्निर्माण भइरहेका छन् ।

पुनर्निर्माण सम्पन्न र बनाउँदै गरेकासहित कुल ६ लाख ४४ हजार २ सय ९१ घर पुनर्निर्माणको प्रक्रियामा छन्, जुन पुनर्निर्माण गर्नुपर्ने घरको संख्याको ८३ प्रतिशत हो ।

पुनर्निर्माण प्राधिकरणका अनुसार अनुदान सम्झौता गरेका लाभग्राहीको संख्या ७ लाख ७३ हजार ४ सय ४७ छ ।

राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले चालू आर्थिक वर्षभित्रै निजी आवास पुनर्निर्माणको मुख्य कार्य सम्पन्न गर्ने बताए ।

‘गुनासा, जोखिममा परेका वर्ग र बस्ती स्थानान्तरणमा अर्को आर्थिक वर्षमा पनि कम हुन सक्छ, अरु सबै यही आर्थिक वर्षमै सम्पन्न गर्छौं,’ उनले भने ।

प्राधिकरणका सहसचिव एवं प्रवक्ता पीताम्बर घिमिरेका अनुसार अनुदान सम्झौता गरेकामध्ये ७ लाख ६५ हजार २२१ ले पहिलो किस्ता बुझेका छन् । यस्तै, ५ लाख ९९ हजार ४ सय ३९ ले दोस्रो किस्ता बुझिसकेका छन् । तेस्रो किस्ता बुझ्ने लाभग्राहीको संख्या ४ लाख ७४ हजार ११९ छ ।

आइतबार आयोजित समीक्षा कार्यक्रममा दिइएको जानकारीअनुसार पुनर्निर्माण भएका घरमध्ये सबैभन्दा धेरै सिन्धुपाल्चोकमा छन् । त्यहाँ ६७ हजार ८ सय ३४ घर पुनर्निर्माण भएका छन् । त्यसैगरी, दोस्रो धेरै नुवाकोटमा ५२ हजार ६ सय १३ घर पुनर्निर्माण भएका छन् । धादिङमा ४८ हजार ४ सय ५४, दोलखामा ४४ हजार ५ सय ३३ र गोरखामा ४४ हजार २ सय ३१ घर पुनर्निर्माण भइसकेका छन् ।

कम प्रभावित जिल्लामा पनि निजी आवास पुनर्निर्माण सम्पन्न हुने गति बढेको छ । कम प्रभावित जिल्लामध्ये तनहुँमा सबैभन्दा धेरै १० हजार ५ सय २५ घर पुनर्निर्माण भएका छन् ।

जिल्लागत रुपमा पुनर्निर्माण सम्पन्न भएका घरको संख्या

सिन्धुपाल्चोक– ६७, ८३४

नुवाकोट– ५२,६१३

धादिङ– ४८,४५४

दोलखा– ४४,५३३

गोरखा– ४४,२३१

काभ्रेपलाञ्चोक– ३०,८७७

रामेछाप– ३०,७११

ओखलढुंगा– १५,७७२

मकवानपुर– १३,०७०

सिन्धुली– १२,५८२

काठमाडौं– ११,५४२

रसुवा– १०,४१८

तनहुँ– १०,५२५

भक्तपुर– ८,४२०

ललितपुर– ४,२१६

लमजुङ– ३२००

चितवन– २,९८२

खोटाङ – २,९२८

सोलुखुम्बु– २,३०२

पाल्पा– १,४३५

भोजपुर– १,२६८

धनकुटा– १,२०३

बागलुङ– ८,८२

स्याङ्जा– ७०७

पर्वत– ६७६

नवलपरासी– ६२०

गुल्मी– ३२७

कास्की– ३२४

म्याग्दी– २७१

अर्घाखाँची– ५४

सम्झौता नगर्नेको नाम हट्दै

निजी आवास पुनर्निर्माणका लागि लाभग्राहीमा परी २१ असार २०७६ सम्म सम्झौता नगर्नेको नाम लाभग्राही सूचीबाट हटाउने प्रक्रिया सुरु भएको छ । त्यस्तै, २०७६ असार मसान्तसम्म पहिलो किस्ता नलिनेहरु पनि लाभग्राहीको सूचीबाट हट्ने भएका छन् ।

लाभग्राहीमा सूचीकृत भए पनि करिब ५७ हजारले अनुदान सम्झौता गरेका छैनन् । त्यस्तै, अनुदान सम्झौता गरेर पनि पहिलो किस्ता नलिने लाभग्राहीको संख्या साढे ५ हजार छ ।

प्रकाशित मिति: सोमबार, साउन २०, २०७६ २०:३७