गोविन्द पोखरेल–स्वर्णिम वाग्लेलाई एमाले र रवी लामिछानले चुनाव लड्न गरेका थिए अफर

गोविन्द पोखरेल–स्वर्णिम वाग्लेलाई एमाले र रवी लामिछानले चुनाव लड्न गरेका थिए अफर

A+ A A-

नेपाली कांग्रेसबाट टिकट नपाउने निश्चित भएपछि राष्ट्रिय योजना आयोगका पूर्वउपाध्यक्षद्वय डा. गोविन्दराज पोखरेल र स्वर्णिम वाग्लेलाई एमाले र राष्ट्रिय स्वतन्त्र पार्टीले जुन क्षत्रेबाट चुनाव लडे पनि सघाउने भन्दै चुनावमा उठ्न आग्रह गरे । प्रतिनिधिसभामा यी दुवैको आवश्यकता रहेको एमाले र रवी लामिछानेकाे रास्वपाको प्रस्ताव थियो । तर, दुवै जनाले ती प्रस्ताव अस्वीकार गरे ।

उनीहरू कांग्रेसको घोषणापत्र लेखनमा सक्रिय छन् । शुक्रबार कांग्रेसको घोषणापत्र कार्यसम्पादन समितिबाट सुझावसहित पारित भयो । वाग्ले र पोखरेल घोषणापत्रलाई अन्तिम रुप दिन लागि परेका छन् । कांग्रेस केन्द्रीय सदस्यसमेत रहेका पोखरेलको प्युठानबाट र वाग्लेको चितवन, काठमाडौ वा गोरखाबाट चुनाव लड्ने चर्चा थियो । प्युठान गठबन्धन गर्दा राष्ट्रिय जनमोर्चाको भागमा पर्‍यो । वाग्लेको टिकट बाँड्ने समयसम्म क्षेत्रको चर्चा चलिरहेको थियो ।

‘तपाईंहरू संसदमा आवश्यक छ । एमालेले काठमाडौं ७ मा उठ्नुभयो भने हाम्रो उम्मेदवार उठाउँदैनौ । कांग्रेसको उम्मेदवार थिएन । एमालेको अफरलाई मैले धन्यवाद भने,’ वाग्लेले शिलापत्रसँग भने, ‘काठमाडौ २ बाट रवी लामिछानेको पार्टीबाट अफर आएको थियो । उहाँहरूको बुझाइ ठिकै हो । धन्यवाद ज्ञापन गरियो ।’

एमालेको प्रस्ताव रणनीतिक हुन सकने भन्दै यसबारे थप टिप्पणी नगर्ने बताए । पोखरेललाई दाङ १ बाट चुनाव लड्न एमालेको प्रस्ताव थियो । ‘एमालेबाट र रवी लामिछानेबाट तपाईंहरू उठ्नु हुन्छ भने हाम्रो सहयोग हुन्छ भनेर फोन आएका हो,’ पोखरेलले शिलापत्रसँग भने, ‘कुनै स्वार्थ राखेर आएको होइन । संसदमा तपाईंहरू आवश्यक छ भनेर आएको हो ।’ पार्टीमा आउन अफर भने नगरेको पाेखरेलले बताए ।

राजनीतिक विश्लेषकको नजरमा भने एमाले र रास्वपाको प्रस्ताव सिद्धान्तविहीन राजनीतिको निरन्तरता रहेको देखियो । ‘राजनीतिक पार्टीमा व्यक्तिको महत्व कसैलाई थाहा छैन, सबैलाई आ–आफ्नो शक्ति बलियो बनाउनु छ,’ राजनीतिक विश्लेषक डम्बर खतिवडाले शिलापत्रसँग भने, ‘गठबन्धनले एमाले छाडेका घनश्याम भुसाल र प्रभु साहलाई समर्थन गरे । त्यसैले काउन्टर रणनीति को रुपमा बुझ्न सकिन्छ ।’ पाेखरेल र वाग्लेले अस्वीकार गरेर अहिलेको अवस्थामा सही निर्णय गरेको खतिवडाले बताए ।