देउवालाई बागी महादेवको जवाफ : जनतासँग न्याय माग्छु, कारबाही गरे गर्नुस्

A+ A A-

आगामी चुनावका लागि कास्कीका तीन प्रतिनिधिसभा क्षेत्रमा गत २३ असोजमा ५३ जनाको उम्मेदवारी परेको थियो । त्यसमा दुई नेताले दिएको उम्मेदवारीले आधिकारिक उम्मेदवारलाई नै झस्कायो । कास्की २ मा गठबन्धनविरुद्ध नेपाली कांग्रेसका नेता महादेव गुरुङ र कास्की ३ मा नेकपा एमालेका जगन्नाथ बास्तोलाले दिएको स्वतन्त्र उम्मेदवारी दलका आधिकारिक उम्मेदवारका लागि टाउको दुखाइको विषय बने ।

उम्मेदवारी फिर्ता लिने दिन बुधबार एमालेका बास्तोलाले कास्की ३ मा आधिकारिक उम्मेदवार दामोदर पौडेललाई सघाउने निधो गरे । कांग्रेस नेता गुरुङले भने आफ्नो उम्मेदवारी कायमै राखेका छन् । कास्की २ मा गठबन्धनबाट एकीकृत समाजवादीका श्रीनाथ बराल उम्मेदवार हुन् । तर, महादेवले आफ्नो क्षेत्र कास्की ३ छोडेर कास्की २ बाट उम्मेदवारी हालेका छन् र प्रधानमन्त्री तथा कांग्रेस सभापति शेरबहादुर देउवाले उम्मेदवारी फिर्ता लिन गरेको आग्रह अस्वीकार गरेका छन् ।

व्यक्ति नभई गठबन्धनविरुद्ध आफूले स्वतन्त्र उम्मेदवारी दिएको महादेवले बताए ।

निर्वाचन आयोगले उम्मेदवारी फिर्ता लिन बुधबार दिउँसो १ बजेसम्मको समय दिएको थियो । मध्यान्ह १२ बजे कांग्रेस सभापति शेरबहादुर देउवाले महादेवलाई फोन गरेका थिए । कारबाही स्वीकार्ने तर पछि नहट्ने जवाफ आफूले सभापतिलाई दिएको नेता गुरुङले बताए । ‘अवसर पाउनुहुन्छ भन्नुभयो । मैले पद र पैसाका लागि राजनीति गरिनँ । जनतासँग न्याय माग्न जाँदै छु । मलाई केही पर्दैन भनेँ,’ उनले शिलापत्रसँग भने, ‘उहाँले कारबाही हुन्छ भन्ने कुरा गर्नुभयो । मैले गरे गर्नुस् भनिदिएँ ।’

महादेव सभापति देउवाको ज्यादती र गठबन्धनविरुद्ध आफूले स्वविवेक प्रयोग गरेको बताउँछन् । ‘मैले विवेक र अन्तरहृदयको निर्णय गरेको हुँ । कांग्रेस भएको ५२ वर्ष भएछ । मैले पद र पैसाको राजनीति कहिल्यै गरिनँ,’ ६६ वर्षीय महादेवले भने, ‘कांग्रेसमा शेरबहादुरको ज्यादती भयो । ५२ वर्षसम्म पनि संघर्ष सकिएको रहेनछ । फेरि संघर्ष गर्नुपर्ने आवश्यकता देखेँ ।’

महादेव पूर्व राज्यमन्त्री र पार्टी कास्की जिल्ला समितिको पूर्वसभापति पनि हुन् । उनले उम्मेदवारी हालेको थाहा पाउनेबित्तिकै श्रीनाथले फोन गरेका थिए । उनले गठबन्धनविरुद्ध आफ्नो लडाइँ भएकाले केही सहयोग गर्न नसक्ने जवाफ दिएका थिए ।

कास्की २ मा अब १७ जना उम्मेदवारबीच प्रतिस्पर्धा हुनेछ । १८ जनाको उम्मेदवारी परेकोमा एक जनाले बुधबार फिर्ता लिएका छन् ।

कास्की २ मा एमालेले विद्या भट्टराईलाई मैदानमा उतारेको छ । स्व. रवीन्द्र अधिकारी पत्नी विद्या २०७६ सालको उपनिर्वाचनमा उक्त क्षेत्रबाट कांग्रेसका खेमराज पौडेललाई हराएर संसद प्रवेश गरेकी थिइन् ।

प्रतिनिधिसभाका ३ क्षेत्रमा उम्मेदवारी दिएकामध्ये ७ जनाले बुधबार फिर्ता लिएका छन् । अब कास्कीका ३ क्षेत्रबाट ४६ जनामध्ये तीन जना प्रतिनिधिसभा सदस्य निर्वाचित हुने छन् । २०७४ सालमा तीनवटै क्षेत्र तत्कालीन एमाले–माओवादी वाम गठबन्धनले जितेको थियो ।

प्रकाशित मिति: बुधबार, असोज २६, २०७९ १७:२५