२०७४ मा लोकप्रिय मतले जितेका गोकुललाई चुनावी अप्ठेराे : न सग्लो एमाले, न छ माओवादीको साथ

२०७४ मा लोकप्रिय मतले जितेका गोकुललाई चुनावी अप्ठेराे : न सग्लो एमाले, न छ माओवादीको साथ

A+ A A-

नेकपा (एमाले) का नेता गोकुल बाँस्कोटा आगामी मंसिर ४ मा हुने प्रतिनिधिसभा र प्रदेशसभा चुनावमा गृहजिल्ला काभ्रे क्षेत्र नम्बर २ बाट लड्दैछन् ।

बाँस्कोटा २०७४ मा पनि सोही क्षेत्रबाट प्रतिनिधिसभा सदस्यका उम्मेदवार थिए । एमाले र माओवादी केन्द्रको संयुक्त उम्मेदवार बनेका बाँस्कोटाले उक्त चुनावमा ५४ हजार ४ सय २७ मत ल्याएर विजयी भएका थिए । त्यतिबेला उनले प्रतिद्वन्दी नेपाली कांग्रेसका उम्मेदवार मधु आचार्यलाई १७ हजार ८ सय ४८ मतले पछि पारेका थिए । बाँस्कोटाले त्यतिबेला ल्याएको मत चर्चाको विषय पनि बन्यो ।

पुन: सोही क्षेत्रबाट चुनाव लड्न लागेका बाँस्कोटालाई यसपालि जित हात पार्न भने सहज छैन । एमाले अध्यक्ष केपी शर्मा ‌ओलीका विश्वासपात्र बाँस्कोटाले आफ्नो क्षेत्रबाट टिकट पाउने केही महिनाअघि नै निश्चित थियो । त्यतिबेला नै उनले काभ्रेमा भातृ संगठनका नेता तथा कार्यकर्तालाई डाकेर गोप्य रूपमा चिन्ता व्यक्त गरेका थिए । 'अघिल्लो चुनावमा जस्तो यसपालि उहाँको जित सहज छैन । पार्टी फुट्नुको असर र त्यसमाथि गठबन्धनको साझा उम्मेदवारसँग भिड्नुपर्ने भएकाले जित्न गाह्रै छ । यही चिन्ता उहाँले पनि व्यक्त गर्नुभएको थियो । अहिल्यैदेखि हामीलाई फिल्‍डमा खटिन आदेश दिनुभएको छ,' बाँस्कोटा निकट अनेरास्ववीयुका एक कार्यकर्ताले दुई महिनाअघि भनेका थिए ।

अहिले बाँस्कोटाले पाँच दलीय गठबन्धनबाट कांग्रेसका उम्मेदवार बनेका शिव हुमागाईंंलाई आफ्नो मुख्य र बलियो प्रतिस्पर्धी ठानेका छन् । दुई कार्यकाल कांग्रेस जिल्ला सभापति भइसकेका हुमागाईं कांग्रेसका पूर्व केन्द्रीय सदस्यसमेत हुन् । वि.सं. २०५६ मा उनले काभ्रेबाट प्रतिनिधिसभा सदस्यमा चुनाव जितेका थिए ।

तर, २०७० मा संविधानसभा सदस्यको चुनावमा भने हुमागाईं पराजित भएका थिए । त्यतिबेला बाँस्कोटा र हुमागाईं फरक-फरक क्षेत्रबाट चुनाव लडेका थिए । बाँस्कोटा ०७० को चुनावमा नेपाली कांग्रेसका कञ्चनचन्द्र वादेसँग पराजित भएका थिए ।

हुमागाईं र बाँस्‍कोटाबीचको प्रतिस्पर्धा भने यो चुनावमा रोचक देखिनेवाला छ । बाँस्कोटाको व्यक्तित्व र चर्चाका कारण उनले जित्ने अनुमान बाहिर गरिएको छ । तर, विवादित छवि र कमजोर संगठनका कारण उनलाई यो चुनाव भारी पर्ने अनुमान जिल्लाका नेताहरूले गरिरहेका छन् ।

आफ्नै गृहनगरमा कमजोर बाँस्कोटा

मण्डनदेउपुर नगरपालिका बाँस्कोटाको गृहनगर हो । यो काभ्रे क्षेत्र नम्बर २ मा पर्छ । गत वैशाखको स्थानीय चुनावलाई आधार मानेर प्रतिनिधिसभाको चुनावको आँकलन गर्ने हो भने बाँस्कोटा आफ्नै नगरमा कमजोर देखिएका छन् ।

गत चुनावमा उनको नगरमा प्रमुख र उपप्रमुखमा गठबन्धनका उम्मेदवार विजयी बनेका थिए । नगरप्रमुखमा गठबन्धनबाट एकीकृत समाजवादीका टोकबहादुर वाइबा विजयी भएका थिए । उनी एकीकृत समाजवादीका जिल्ला अध्यक्षसमेत हुन् । उपमेयरमा कांग्रेसका विष्णुमणि नेपाल विजयी भएका थिए । नगरप्रमुखमा वाइबा एक हजार ५५ र उपप्रमुखमा नेपाल ४ हजार ३ सय ८१ मतान्तरले विजयी भएका थिए ।

प्रमुख र उपप्रुख मात्र होइन १२ वटा वडामध्ये ४ वटामा मात्रै एमालेका वडाध्यक्षका उम्मेदवार विजयी भएका थिए । बाँकी ८ वटा वडामा गठबन्धनका उम्मेदवार विजयी बनेका थिए । बाँस्कोटाको आफ्नै गृहनगरमा एमाले कमजोर देखिनुले प्रतिनिधिसभाको चुनावमा पनि यसको असर देखिने जिल्लाका नेताहरूको अनुमान छ ।

पालिकाहरूमा कमजोर परिणाम

काभ्रे- २ मा भुम्लु गाउँपालिका, मण्डनदेउपुर नगरपालिका, पाँचखाल नगरपालिका, बनेपा नगरपालिका, धुलिखेल नगरपालिकाका १-७ सम्मका वडा, पनौतीका १, २, ३, ११ र १२ वडा तथा बेथानचोक गाउँपालिकाका ६ वटा वडा पर्छन् ।

यी पालिकाहरूमा स्थानीय तहको चुनावी मत परिणाम हेर्ने हो भने गठबन्धन बलियो देखिन्छ ।

चुनावमा वडाध्यक्षले पाएको मत हेर्दा कांग्रेसले ४५ हजार ४५६ मत प्राप्त गरेको थियो । एमालेले ४५ हजार ५१४ प्राप्त गरेको थियो । एकीकृत समाजवादीले ८ हजार ६७६ मत प्राप्त गरेको थियो । माओवादीले ६ हजार ३७० मत प्राप्त गरेको थियो । गठबन्धन गर्ने पार्टीको मत जोड्दा ६० हजार ५०२ मत हुन्छ ।

पालिका प्रमुखमा यो क्षेत्रमा एमालेले धुलिखेल नगरपालिकाको प्रमुख मात्र जितेको थियो । उपप्रमुख ३ पालिकामा जितेको थियो । कांग्रेसले ३ प्रमुख र २ उपप्रमुख जितेको थियो । बाँकी पालिका गठबन्धकै उम्मेदवारले जितेका थिए ।

पार्टी विभाजनको असर

अघिल्लो निर्वाचनमा बाँस्कोटाले फराकिलो मतान्तरमा जित्नुमा माओवादीसँगको गठबन्धन थियो । साथै हाल अलग पार्टी बनेको एकीकृत समाजवादीसहितका नेताहरूको सहयोग थियो । अहिले परिस्थिति उल्टिएको छ ।

एमाले फुटेपछि जिल्लाका प्रभावशाली मानिने नेताहरू एकीकृत समाजवादीमा लागेका छन् । जसले गर्दा बाँस्कोटाले प्राप्त गर्ने मतमा ठूलो असर पर्ने देखिन्छ । त्यतिबेला एमालेसँग गठबन्धन गरेको माओवादी अहिले कांग्रेस र एकीकृत समाजवदीसँगको गठबन्धनमा छ । बाँस्कोटाको लागि यो मुख्य चुनौती हो ।

'७० करोड प्रकरण'ले धमिलिएको छवि

२०७४ सालमा चुनाव लड्दा बाँस्कोटा विवादमा मुछिएका थिएनन् । हुन त जिल्लामा चर्चित भए पनि पार्टीमा अहिलेजस्तो प्रभावशाली पनि उनी थिएनन् । लोकप्रिय मत ल्याएर चुनाव जित्नुमा विवादरहीत छवि पनि उनको लागि कारक थियो ।

चुनाव जितेलगत्तै बनेको सरकारमा उनी सुरुमा सञ्चार तथा सूचना प्रविधि राज्यमन्त्री भए । त्यसपछि उनी 'फुल' मन्त्री भए । सञ्चारमन्त्री हुँदाताका नै बाँस्कोटाका अभिव्यक्तिहरू विवादित हुने गर्थे । निकै कडा शैलीमा बोल्ने उनको समर्थन र विरोध दुवैमा सामाजिक सञ्जालहरूमा पर्याप्त टिप्पणीहरू हुने गरेका छन् ।

०७६ फागुनमा सेक्युरिटी प्रिन्टिङ प्रेस खरिदमा ७० करोड रूपैयाँ कमिसन मागेको अडियो बाहिरिएपछि बाँस्कोटाले मन्त्री पदबाट राजीनामा दिएका थिए । त्यसयता उनलाई ७० करोड घुस मागेको आरोप लाग्ने गरेको छ । आरोप पुष्टि नभए पनि यो प्रकरणले उनको छविलाई भने विवादित बनायो । आगामी चुनावमामा बाँस्कोटाको मतमा यो घटनाले प्रभाव पार्न सक्ने आँकलन पनि गरिएको छ ।

सोही क्षेत्रबाट बाँस्कोटाविरुद्ध फिल्म निर्देशक मनोज पण्डितले पनि उम्मेदवारी दिएका छन् । ७० करोड प्रकरणमा मुछिएर पनि बाँस्कोटाले विवादित अभिव्यक्तिहरू सार्वजनिक रूपमा दिएपछि पण्डित रुष्ट बनेका थिए । उनले केही महिनाअघि गोकुल प्रवृत्तिविरुद्ध काभ्रे- २ बाट चुनाव लड्ने घोषणा गरेका थिए । पण्डितले पनि बाँस्कोटाका केही भोट काट्न सक्ने अनुमान कतिपयको छ ।

यद्यपि, आफ्नो निर्वाचन क्षेत्रमा बाँस्कोटाले विकास निर्माणका थुप्रै परियोजनाहरू पारेकाले जनताको मत आउने दाबी एमाले जिल्ला नेताहरूको छ ।

'उहाँ सांसद र मन्त्री भएपछि आफ्नो क्षेत्रमा थुप्रै विकासका काम भएका छन् । सडक घरघरमा पुगेका छन् । शिक्षा तथा पूर्वाधारका क्षेत्रमा बजेट परेका छन् । त्यसकारण उहाँलाई जनताको स्वस्फूर्त भोट आउँछ,' बाँस्कोटानिकट एक नेता भन्छन् । जिल्लामा एमालेका भातृ संगठनहरू भने अरु पार्टीको तुलनामा सक्रिय र क्रियाशील छन् ।

बाँस्कोटाका बलिया प्रतिष्पर्धी गठबन्धनका साझा उम्मेदवार हुमागाईं भने अहिलेसम्म उस्तो विवादित बनेका छैनन् । त्यो उनको निम्ति 'प्लस पोइन्ट' हो । तर, क्षेत्र नं २ मा कांग्रेसका नेता मधु आचार्य यसपालि टिकटको दौडधुपमा थिए । पार्टीले टिकट उनको साटो हुमागाईंलाई दिएपछि उनी रुस्ट बनेका थिए ।

'मधुले असहयोग गर्ने हल्ला पार्टीभित्र छ । उहाँले असहयोग गर्नुभयो भने मतमा असर गर्न सक्छ,' कांग्रेस काभ्रेका एक नेताले भने ।

प्रकाशित मिति: बुधबार, असोज २६, २०७९ २०:०२