हेटौँडा–काठमाडौं चल्ने टाटासुमोको दादागिरी, दोब्बर भाडा लिएर ठगी

A+ A A-

हेटौँडा–काठमाडौं जोड्ने छोटोमार्गमा सञ्चालन हुने साना सवारी टाटासुमोका सञ्चालकहरूको दादागिरीले सोझा यात्रु ठगिँने गरेका छन् । हेटौँडा नगरभित्र ट्राफिक व्यवस्थापनलाई समेत अस्तव्यस्त बनाउँदै सञ्चालन भइरहेका टाटासुमो काउन्टरहरूबाट सोझासाझा यात्रु ठगिने गरेका हुन् ।

चाडपर्व बाहेकको समयमा सीमित यात्रुलाई राज्यबाट तोकिएको निश्चित भाडा लिएर हेटौँडा–काठमाडौं ओहोरदोहोर गर्ने टाटासुमोहरूले विगतमा जस्तै यसपालीको विजया दशमीमा पनि 'मौकामा चौका' हानेका छन् । दसैँमा यात्रुहरूको बाक्लिँदो चापलाई टाटासुमोहरूले कमाउ धन्दाको रूपमा मौका मारेका हुन् । दसैँअगाडि काठमाडौंबाट हेटौँडा आउने यात्रुहरू धेरै हुन्छन् । दसैँपछि हेटौँडाबाट काठमाडौं जाने यात्रुहरूको काउन्टरमा भिड लाग्छ । सोझा यात्रुहरूलाई ठगेर चाँडै धनी बन्ने सोच बोकेका टाटासुमो सञ्चालकहरूले दसैँअगाडि काठमाडौंबाट हेटौँडा आउने यात्रुहरूलाई ठगी गर्ने गरेका छन् ।

यात्रुहरूले बढी भाडा दिन नमाने टाटासुमो लुकाएर सञ्चालकहरूले कृतिम अभाव बनाउने गर्छन् । जसकारण यात्रुहरू बढी तिरेर गन्तव्यमा आउनुपर्ने बाध्यता हुन्छ । यसैगरी, दसैँपछिको समयमा हेटौँडाबाट काठमाडौं जाने यात्रुहरूलाई पनि हेटौँडाका टाटासुमो सञ्चालकहरूले ठगी गर्ने गरेका छन् । मंगलबार हेटौँडाको सुभयात्रा कम्पनीको ना १ ज ६४११ नम्बरको टाटासुमो जिल्ला ट्राफिक प्रहरीको फेला पर्‍यो ।

यात्रुहरूलाई तोकिएको भन्दा बढी भाडा लिएको गुनासोको आधारमा टाटासुमोका चालक मनहरी–७ बस्ने रामप्रसाद खड्कालाई नियन्त्रणमा लिइएको मकवानपुरका ट्राफिक प्रहरी प्रमुख मुनेन्द्र थापाले बताए । खड्कालाई कारबाहीका लागि जिल्ला प्रहरी कार्यालयमा पठाएको थियो । जिल्ला प्रहरीले जरिवाना तिराएर छोडेको छ ।

विजया दशमीकै बीचमा सातवटा टाटासुमोलाई यात्रुहरूलाई ठगी गरेको आरोपमा कारबाही गरिएको जिल्ला ट्राफिक प्रहरी कार्यालय मकवानपुरले जानकारी दिएको छ । कारबाहीमा परेका टाटासुमोहरूलाई यात्रुको भाडा फिर्ता गराउनेदेखि जरिवाना लिएर छोडिएको थियो । हेटौँडाबाट काठमाडौं लैजाने यात्रुलाई ७ सयदेखि १ हजार ५ सय रुपैयाँसम्म भाडा लिएर ठगी गर्ने गरेको यात्रुहरूले प्रहरी समक्ष गुनासो गरेको ट्राफिक प्रहरीले जनाएको छ ।

हेटौंडा–काठमाडौंको भाडा साढे ६ सय रुपैयाँ तोकिए पनि टाटासुमोले यात्रु हेरेर ठगी गर्ने गरेको पाइएको हो । मंगलबार प्रहरीले नियन्त्रणमा लिएको टाटासुमोले नै तीन जना यात्रुसँग फरक–फरक भाडा लिएको थियो । सोझा यात्रु भेटे १ हजार देखि १ हजार ५ सय रुपैयाँसम्म भाडा लिने गरेको जिल्ला ट्राफिक प्रहरी कार्यालयले जनाएको छ । यात्रु ठगी गर्ने दोषिलाई भने प्रहरीले पर्याप्त कारबाही गरेको देखिँदैन ।

यात्रुहरूलाई निरन्तर ठगी गरे पनि प्रहरीले जरिवानासम्म मात्रै तिराएर पठाउने गरेको छ । जरिवाना मात्रै तिराउँदा टाटासुमो सञ्चालकहरूले यात्रुहरूलाई पटक–पटक ठगी गर्दै जरिवाना तिर्दै आइरहेको प्रहरी अनुसन्धानबाट खुल्छ । यात्रुकै कारण प्रहरीले पनि तनाव खेप्नु परेको देखिएको छ । यात्रुहरूले नै टाटासुमोलाई जोगाउन सत्य कुरा बोल्न नचाहने र प्रमाणसहित लिखित उजुरी दिन नमान्ने गरेको ट्राफिक प्रहरी कार्यालयले जनायो ।

दसैँको घटस्थापनादेखि यात्रु ठग्न थालेका टाटासुमोहरूले मकवानपुर प्रशासनको मौनताको फाइदा उठाउँदै दसैँ सकिँदासम्म पनि ठगी गर्न नछोडेका हुन् । नियमनकारी निकाय जिल्ला प्रशासन कार्यालय कानमा तेल हालेर बस्दा यात्रुहरू दैनिक ठगिन बाध्य भएको गुनासो गर्छन् । टाटासुमोको कृतिम अभाव सिर्जना गरेर १ हजार ५ सय रुपैयाँसम्म भाडा लिँदा पनि प्रशासनले गम्भीर रूपले कारबाही नगरेको देखिएको छ ।

प्रशासनले प्रभावकारी रूपमा टाटासुमोले यात्रु ठगेको विषयमा अनुगमन गर्ने र कारबाही गरेको छैन । ठगिएको विषयमा आफूलाई जानकारी नभएको र प्रमाणसहित उजुरी गर्न मकवानपुरका प्रमुख जिल्ला अधिकारी राजेन्द्रदेव पाण्डेले आग्रह गरे । दसैँपछि काठमाडौंबाट हेटौंडा आउने यात्रुको चाप पातलो हुने गरे पनि टाटासुमोको कृतिम अभाव सृजना गरेर ठगि गरेको बागमती प्रदेशको सामाजिक विकास मन्त्रालयका एक कर्मचारीले गुनासो गरिन् ।

टाटासुमोले काठमाडौंबाट हेटौँडा आउँदा १ हजार ३ सय रुपैयाँ लिएको उनले बताइन् । यात्रुलाई टिकट भने तोकिएको भाडाकै थमाउने गरिएको छ । कतिपय टाटासुमोले यात्रुहरूलाई टिकटसमेत नदिने गरेको यात्रुहरूले गुनासो गरेका छन् ।

प्रकाशित मिति: बुधबार, असोज २६, २०७९ १२:४८