१ सय किशोरीले गर्दैछन् १ सय संस्थाको नेतृत्व

A+ A A-

प्लान इन्टरनेसनलले ‘गर्ल्स टेक ओभर’ अर्थात् बालिका तथा किशोरीलाई पद हस्तान्तरण कार्यक्रम सुरु गरेको छ ।

यस वर्ष संघीयस्तरका संघसंस्थाहरू, सरकारी निकाय, मिडिया, दूतावास, शैक्षिक संस्थालगायतका संस्थाहरूमा प्रमुखको कार्यभार एक दिनका लागि किशोरीलाई हस्तान्तरण गरिनेछ ।

आज अन्तर्राष्ट्रिय बालिका दिवस, अक्टोबर ११ को अवसरमा प्लान इन्टरनेसनलले उक्त कार्यक्रम सुरु गरेको हो । अक्टुबर र नोभेम्बर महिनाभरि कार्यक्रम सञ्चालन हुनेछ ।

यस वर्ष विभिन्न नौ जिल्लाका संघसंस्थाहरूका १०० वटा पद किशोरीहरूले सम्हाल्नेछन् । नेपालमा बालिकाकेन्द्रित विभिन्न नागरिक समाजहरूसँगको हातेमालो र ‘हामी दाजुभाइ’ संस्थाको प्राविधिक सहयोगमा यस वर्ष संघीय र जिल्लास्तरमा गर्ल्स टेक ओभर अभियान सञ्चालन गरिन लागेको हो ।

यस अभियानअन्तर्गत पहिलो चरणमा अक्टोबर ११ र १२ मा राष्ट्रिय बाल अधिकार परिषद्को सदस्यसचिव, त्रिभुवन विश्वविद्यालय लैङ्गिक अध्ययन विभागको विभागीय प्रमुख, प्लान इन्टरनेसनल नेपालको राष्ट्रिय निर्देशक, नेपाल पत्रकार महासंघको प्रमुखलगायतको भूमिकामा एक दिनका लागि विभिन्न जिल्लाबाट आएका किशोरीहरूले नेतृत्व लिनेछन् ।

प्लान इन्टरनेसनल नेपालका राष्ट्रिय निर्देशक राम किसनका अनुसार किशोरीहरूलाई सशक्त महसुस गराउन हरेक वर्ष 'गर्ल्स टेक ओभर' कार्यक्रम सञ्चालन गर्ने गरिन्छ । भन्छन्, ‘गर्ल्स टेक ओभर किशोरीहरूका लागि उत्कृष्ट अवसर हो । यसले बालिका तथा किशोरीहरूलाई निर्णायक भूमिकामा राखी उनीहरूको विचार तथा जीवनमा भोगेका चुनौतीका बारेमा जानकारी लिन संघसंस्थाहरूलाई सहयोग गर्छ । यसले बालिका तथा किशोरीहरूका साझा सवालमा निर्णयकर्ता, नेता तथा परिर्वतनका संवाहकहरूको दृष्टिकोण परिवर्तन गर्दछ ।

गत वर्ष कालीकोट, जुम्ला, सिन्धुली, बाँके, बर्दिया र मकवानपुरका किशोरीहरूले मेयर र उपमेयरको जिम्मेवारी सम्हालेका थिए । किशोरीहरूमा नेतृत्वको विकास, अनलाइन हिंसाबाट कसरी जोगिने भनेर एक दिनका लागि स्थानीय सरकारको नेतृत्वमा उनीहरूलाई ल्याइएको थियो । यसका लागि प्लान इन्टरनेसनल नेपालले सहजीकरण गरेको हो ।

यस वर्ष किशोरीमाथि लगानी, समावेशितामा आधारित किशोरीलक्षित कार्यक्रम र किशोरी तथा युवा महिलाको नेतृत्वका बारेमा संस्थाको प्रतिबद्धता हुनुपर्ने कुरामा छलफल हुनेछ ।

प्रकाशित मिति: मंगलबार, असोज २५, २०७९ १६:०७