कांग्रेसबाट दलितले टिकट नपाएपछि प्रकाश स्नेहीले भने– कांग्रेसले भोट माग्न जाँदा यसको जवाफ दिनुपर्छ

कांग्रेसबाट दलितले टिकट नपाएपछि प्रकाश स्नेहीले भने– कांग्रेसले भोट माग्न जाँदा यसको जवाफ दिनुपर्छ

A+ A A-

नेपाली कांग्रेसबाट प्रतिनिधिसभामा ९१ जना उम्मेदवारले मनोनयन दर्ता गराउँदा दलितकाे संख्या शून्य जस्तै छ । गठबन्धन गर्दा माओवादी केन्द्रकाे भागमा परेकाे रुकुम पश्चिममा एक दलित नेताले उम्मेदवारी दर्ता गराएका छन् ।

त्यसमा पनि उनी कांग्रेसका एकल उम्मेदवार हाेइनन् । रुकुम पश्चिममा केन्द्रीय सस्दय मानबहादुर नेपाली र शिव आचार्यकाे उम्मेदवारी परेको छ । एक त पार्टीकाे भागमै नपरेकाे क्षेत्रमा एक दलितले टिकट पाए । त्यसमा पनि अर्कालाई पनि टिकट दिँदा याे उम्मेदवारी विवादमा छ ।

संघ र प्रदेशको २७५ उम्मेदवारमा कांग्रेसबाट दलित उम्मेदवार छैनन् । केन्द्रीय सदस्य तथा निवर्तमान प्रतिनिधिसभा सदस्य प्रकाश स्नेही रसाइली बझाङबाट सिफारिसमा परेका थिए । अन्तिममा उनले टिकट पाएनन् ।

कांग्रेस केन्द्रीय सदस्य मीन विश्वकर्मा पनि सुनसरी १ बाट सिफारिसमा परेका थिए । उनले पनि टिकट पाएनन् । पार्टीभित्र दलित समुदायले टिकट पाउनुपर्छ भन्दै पार्टी मुख्यालयमा अनशनमा तयारी गरेका थिए । तर, डेंगी संक्रमणका कारणले उनले अनशन बस्न पाएनन् ।

स्नेहीले दलितले टिकट नपाएपछि असन्तुष्टि शिलापत्रसँग यसरी राखे :

४५ हजार क्रियाशील सदस्य रहेको कांग्रसले एक जना दलित उम्मेदवारलाई संघ र प्रदेशमा टिकट दिएन । एक जनालाई पनि टिकट नदिनु संविधान, पार्टीको विधान र समग्र देशभरका दलितहरूकाे अपमान हो । दलित भएकै कारणले मलाई टिकट दिइएन । मेरो घोर आपत्ति छ यसमा । कांग्रेसले भोट माग्न जाने बेला दलितलाई टिकट नदिनुको कारणबारे जवाफ दिनुपर्छ ।

मीन विश्वकर्माले के कारणले टिकट नपाउने ? प्रकाश स्नेहीले के कारणले टिकट नपाउने ? तल्ला तहबाट सिफारिस भएर आएको छ । १६५ निर्वाचन क्षेत्रमा जुन ठाउँमा टिकट दिनुहुन्छ त्यहीँ लड्छु भनेर सभापति शेरबहादुर देउवालाई आधा दर्जनभन्दा बढी पटक भेटेको छु । पार्टीका शीर्ष नेता सबैलाई घेटेर मेरो कुरा सुनाएको छु । राजनीतिको सबै दूरी पार गरेर आएको हुँ । नेविसंघको केन्द्रीय सदस्य, दलित संघको महासचिव, सांसद हुँदै पार्टीको केन्द्रीय सदस्य भएको आएको हुँ । संसदमा पनि राम्रो भूमिका खेलेको हुँ ।

मिनेन्द्र रिजाल दाईले पन टिकट पाउनुभएन । त्यो सभापतिसँगको इगो थियो होला अर्को पाटो भयो । तर हाम्रो समुदाय हो नि । ८ लाख त्रियाशील सदस्यमा ४५ हजार दलित क्रियाशील छन् । त्यो समुदायले टिकट नपाउने भन्ने हुन्छ कहिँ ?

नेतृत्वले दलितहरूले टिकट नदिए पनि हुन्छ मागिखाने जात हो समानुपातिकमा अलि अलि दिएजस्तो पुगिहाल्छ भन्ने देखियो । परिवर्तनको भावनालाई अंगिकार गर्न नचाहेको देखियो । उहाँहरू अझै पनि राणा शासनमै हुनुहुन्छ । शासन प्रणाली फरक भयो तर मानसिकता र समुदाय त्यही भयो । आफूलाई पुगुन्जेलसम्म आफूलाई राख्ने, आफ्नो पेट भरिएपछि दिने हो । उहाँहरू आफैँलाई पुगेन । तर, डेमोक्रेसीमा मेरो र शेरबहादुर देउवाको मतको मूल्य बराबर हो नि । पाँचपटक प्रधानमन्त्री भएको कांग्रेस सभापति भनेर उहाँले ५० पटक भोट हाल्न पाउनुहुन्छ र ? म दलिको छोरो दमाइ कामी भनेर एकपटक भोट हाल्न पाउने हो र ? १३‍.८ प्रतिशत दलितको जनसंख्याको मतको मूल्य र अन्य समुदायको मतको मूल्य बराबर होइन डेमोत्रेसीमा ?

म २३ गते अनशन बस्ने भनेको थिएँ १७ गतेदेखि डेगीं संक्रमित भएपछि हलचल गर्न नसक्ने भएँ । सभापति देउवासहित मेरो गुटको नेता शेखर कोइराला, रामचन्द्र पौडेल, शशांक कोइराला सबै नेताहरूलाई बालुवाटारदेखि घर–घर गएर भेटेको छु । यहाँ डिजाइन गरेर गठबन्धन गर्दा नै दलितका सम्भावित टिकट पाउने ठाउँमा अर्काे पार्टीलाई दिइहाल्ने भयो । मीन विश्वकर्माको क्षत्रे माओवादीलाई दिइयो मेरो क्षेत्र एकीकृत समाजवादीलाई दिए । सभापति देउवाले एकपटक भन्नुपर्थ्याे नि त्यहाँ हाम्रो दलितको नेतृत्व विकास भएको छ त्यहाँ दिन सकिन्न । पर्दैन ? भन्नुभएन उहाँले । दलितलाई जे गरे पनि हुन्छ भन्ने मनोविज्ञान भयो ।

प्रकाशित मिति: सोमबार, असोज २४, २०७९ १५:१५