कोरला नाका खोल्न पोखरामा छलफल, चिनियाँ पक्ष सकारात्मक

A+ A A-

चीनसँग सीमा जोडिएको प्रमुख नाकाका रुपमा रहेको मुस्ताङको कोराला नाका खोल्ने विषयमा आइतबार पोखरामा गण्डकी प्रदेश र चिनियाँ प्रतिनिधिबीच छलफल भएको छ ।

प्राध्यपाक वाइ ड्युङ लिउको नेतृत्वमा रहेको चिनियाँ टोलीले कोराला नाका खोल्न सम्भावना र प्रदेश सरकारको धारणाबारे भेटमा जिज्ञासा राखेका छन् । नाका खुलेपछि हुने आर्थिक र धार्मिक गतिविधि वृद्धिको सम्भावनाबारे समेत टोलीले चासो राखेको छ ।

जवाफमा प्रदेश प्रतिनिधिमण्डलका नेतृत्व गरेका भौतिक पूर्वाधारमन्त्री रामशरण बस्नेतले नाका खोल्न प्रदेश सरकार तत्पर रहेको र संघ सरकारलाई अनुरोध गरिएकाे जानकारी गराए । उनले नाका खोल्न सकिए व्यापारिक, धार्मिक र बहुपक्षीय र¿पमा दुवै देशले फाइदा लिन सक्नेतर्फ चिनियाँ पक्षको ध्यानाकर्षण गराएका थिए ।

कोराला नाकामा बाटोको ट्रयाक बनिसकेको र भौगोलिक रुपमा पोखरा–काठमाडौं र लुम्बिनीसँग नजिक रहेकोले यसबाट व्यापारिक र धार्मिक रुपमा फाइदा पुग्ने उनको भनाइ छ । चिनियाँ प्रतिनिधिमण्डल प्रमुख प्राध्यापक लिउले आफूहरु कोराला नाका खोल्ने प्रक्रिया अगाडि बढाउन इच्छुक रहेको र नेपाली पक्ष सहमत भएमा चाँडै विस्तृत सम्भाव्यता अध्ययन गर्ने बताएका थिए ।

छलफलमा प्रदेश नीति तथा योजना आयोगका उपाध्यक्ष डा. गिरिधारी शर्मा पौडेलले यो नाकाबाट सबैभन्दा छोटो दूरीमा भारतीय नाकामा जोडिने भएकोले यसले त्रिदेशीय व्यापारिक गतिविधिलाई बढाउन मद्दत पुग्ने बताए ।

मुस्ताङमा पर्ने कोराला नाका खुलाउन सकिए यो चीनसँगको व्यापार आदान प्रदानका लागि सहज हुने भन्दै गण्डकी प्रदेशले कोराला नाका खोल्ने विषयमा अग्रसर हुने केन्द्र सरकारलाई आग्रह गरेको शर्माले जानकारी दिए ।

प्रकाशित मिति: सोमबार, साउन २०, २०७६ ०२:३०