कर्णालीका मुख्यमन्त्री शाहीलाई च्यालेन्ज दिँदै हुम्लाका छक्कबहादुर

A+ A A-

कर्णालीका वर्तमान मुख्यमन्त्री जीवनबहादुर शाहीलाई हुम्ला प्रदेश निर्वाचन क्षेत्र नम्बर ख मा निर्वतमान स्वतन्त्र सांसद छक्कबहादुर लामाले चुनौती दिने भएका छन् । लामाले मुख्य निर्वाचन अधिकृतको कार्यालय हुम्लामा उम्मेदवारी दर्ता गराएसँगै प्रदेशसभा सदस्यमा शाही र लामाको भिडन्त हुने पक्का भएको छ ।

२०४८ सालमा तत्कालिन जनमोर्चाको तर्फबाट प्रतिनिधिसभा सदस्यमा चक्रबहादुर शाहीलाई ८ मतले पराजित गरेका लामाले २०७४ सालमा मंगलबहादुर शाहीलाई ४७ मत अन्तरले पराजित गरेका थिए । संविधानसभाको दोस्रो निर्वाचनमा तत्कालीन नेकपा माओवादीका तर्फबाट उम्मेदवार बनेका लामा पार्टीभित्रकै असहयोगका कारण मुख्यमन्त्री जीवनबहादुर शाहीसँग पराजित भएका थिए ।

लामा २०७० मा भएको संविधानसभा सदस्य निर्वाचनमा कांग्रेसका जीवनबहादुर शाहीसँग व्यहोर्नुपरेको हारको बदला लिने दाउमा छन् । २०१६ साल वैशाख १२ गते बुबा टाक्पा छेदेन लामा र आमा नाक्दार्मा लामाको सन्तानका रूपमा जन्मिएका लामा नेकपा माओवादीको हेटौँडा माहधिवेशनबाट माओवादीमा समाहित भएका थिए ।

२०३१ सालबाट वाम राजनीति सुरु गरेका छक्कबहादुर २०३८ मा अखिल नेपालको छैटो केन्द्रीय सदस्य भएका थिए । विद्यार्थीकालदेखि नै वामपन्थी राजनीतिमा संलग्न लामाले २०४२ सालमा नेकपा एकता केन्द्रको हुम्ला इन्चार्जको भूमिका निर्वाह गरेका थिए ।

दशवर्षे ‘जनयुद्ध’मा भूमिगत नभएका लामाकी छोरी ‘जनयुद्ध’मा ‘शहीद’ भएपछि माअ‍ेवादीलाई अप्रत्यक्ष सहयोग गरेका लामा राजा ज्ञानेन्द्रको प्रत्यक्ष शासनकाल २०६१ मा स्थानीय विकास सहायक राज्यमन्त्री र पछि भौतिक योजना तथा निर्माण राज्यमन्त्री बनेका थिए ।

आगामी मंसिर ४ गते हुने प्रदेशसभा निर्वाचनमा लामाले एमालेबाट उम्मेदवारी दर्ता गराएका छन् । हुम्लामा लोकप्रिय नेताका रूपमा परिचित नेता लामा जनताको मागले आफू पुनः उम्मेदवार बनेको बताए ।

कर्णालीका मुख्यमन्त्री जीवनबहादुर शाहीले पनि निर्वाचन अधिकृतको कार्यालय हुम्लामा प्रदेशसभा निर्वाचन क्षेत्र ख मा उम्मेदवारी मनोनयन दर्ता गराएका छन् । शाहीले वारेसमार्फत उम्मेदवारी दर्ता गराएका हुन् ।

२०७० मा हुम्ला जिल्लाबाट नेपाली कांग्रेसका तर्फबाट उनी संवधिानसभा सदस्यमा लामालाई हराएर निर्वाचित भएका थिए । २०७० देखि २०७४ सम्म संसदको विकास समिति सदस्य र कर्णाली विकास उपसमितिमा संयोजक रहेर काम गरेका थिए ।

२०७४ सालमा हुम्ला निर्वाचन क्षेत्र ख बाट प्रदेशसभा सदस्यमा निर्वाचित उनी प्रदेशभरकै प्रत्यक्ष निर्वाचित एक मात्र कांग्रेस उम्मेदवार हुन् ।

त्यसअघि उनी २०७३ मा नेपाल सरकारको संस्कृति पर्यटन तथा नागरिक उड्डयन मन्त्री र खानेपानी तथा सरसफाइमन्त्री बनेका थिए । २०४९ मा नेपाली कांग्रेसको तर्फबाट जिल्ला विकास समिति सभापतिको उम्मेदवार, २०५५ देखि २०७४ सम्म जिल्ला विकास समिति महासंघ केन्द्रीय सदस्य, २०५५ मा कांग्रेसको तर्फबाट जिल्ला विकास समितिको सभापति, २०६४ मा संविधानसभा सदस्य उम्मेदवार बनेका थिए ।

प्रकाशित मिति: आइतबार, असोज २३, २०७९ १७:१८