कर्णालीका अधिकांश सडक अवरुद्ध, वीरेन्द्रनगरको दक्षिणी भाग जलमग्न

A+ A A-

बुधवारदेखि परेको अविरलका वर्षाका कारण पहिरो झरेपछि कर्णाली प्रदेशका पहाडी र हिमाली जिल्ला जोड्ने अधिकंश सडक अवरुद्ध भएका छन् । निरन्तर वर्षाका कारण पहिरो खस्दा सुर्खेत–कोहलपुर जोड्ने रत्न राजमार्ग अवरुद्ध भएको छ । यो राजमार्गको छिन्चु–सुब्बाकुना खण्डको पैसठ्ठीमा पहिरो झरेपछि सडक अवरुद्ध भएको जिल्ला प्रहरी कार्यालय सुर्खेतका प्रवक्ता सुरज कार्कीले जानकारी दिए ।

यस्तै छिन्चु–जाजरकोट खण्डको जाजरकोटको शिवालय गाउँपालिका क्षेत्र, सुर्खेत खण्डको पोखरे र जुम्ली भिरमा पहिरो खस्दा सडक अवरुद्ध रहेको प्रवक्ता कार्कीले जनाए ।

जिल्ला प्रहरी कार्यालय दैलेखका डीएसपी भुवनेश्वर साहका अनुसार कर्णाली राजमार्गको पाल्तडा र सुर्खेत–दैलेख सडक खण्डको घोडाबासमा पहिरो खसेको छ । पाल्तडामा सडक सुचारु गर्न डोजर परिचालन गरिएको छ ।

कर्णाली प्रदेश प्रहरी कार्यालयका प्रवक्ता माधव श्रेष्ठकाअनुसार जाजरकोट–डोल्पा, दाङ–सल्यान लोकमार्ग पनि अवरुद्ध रहेको छ । अवरुद्ध सडक खुलाउने प्रयास जारी रहे पनि निरन्तर वर्षाका कारण समस्या उत्पन्न भएको प्रहरीले जनाएको ।

यस्तै निरन्तर वर्षाका कारण प्रदेश राजधानीसमेत रहेको सुर्खेको वीरेन्द्रनगर अन्तर्गत रत्न राजमार्गको दक्षिणी भागका धेरै क्षेत्र डुवानमा परेका छन् ।

वीरेन्द्रनर नगरपालिका–९ र १० नम्बर वडाको सीमनामा पर्ने बर्डिगाडदेखि वीरेन्द्रनगरको पानी निकास हुने मुख्य क्षेत्र अलाय चौरससम्म डुवान परेको एपीएफको रक्तकाली गण बाङ्गेसिमल सुर्खेतका एसपी विमल डाँगीले जानकारी दिए। उनकाअनुसार उद्धारका लागि सशस्त्र प्रहरी बल लगायतको टोली डुवान क्षेत्रमा खटिएको छ ।

यसैबीच सुर्खेतका प्रमुख जिल्ला अधिकारी खगेन्द्रप्रसाद रिजालले डुवान क्षेत्रको अनुगमन गरेका छन् । प्रजिअ रिजालले विपद्पछिको खोज, उद्दार र राहतमा कमी हुन नदिन सुरक्षा निकायलाई निर्देशन दिएका छन् ।

प्रकाशित मिति: शुक्रबार, असोज २१, २०७९ १४:२५