एक शिक्षकको कर्तुतः लोकसेवा परीक्षामा सेटिङ, हाजिर नपाउँदा तोडे विद्यालयको ताला

एक शिक्षकको कर्तुतः लोकसेवा परीक्षामा सेटिङ, हाजिर नपाउँदा तोडे विद्यालयको ताला

A+ A A-

दसैँ लागेसँगै गत १० असोजदेखि विद्यालयहरू बिदा भएका छन् । तर, पोखरामा एउटा विद्यालयको व्यवस्थापन समिति अध्यक्षले विद्यालयको प्रशासनिक कक्षको ताला फोडेर महिनौँदेखि गयल विवादित शिक्षकलाई हाजिर गराएका छन् ।

पोखरा–२४ कास्कीकोटको कालिका माध्यमिक विद्यालयको व्यवस्थापन समिति अध्यक्ष चन्द्रेश्वर बस्ताकोटीले शनिबार प्रशासनिक कक्षको ताला फोडेर मावि तहका विज्ञान शिक्षक दीपेन्द्र बस्ताकोटीको गयल हुँदाको हाजिर गराएका हुन् । शिक्षक बस्ताकोटीले शनिबार अपराह्न ४ बजे ढोकाको ताल्चा फोडेर गत २९ भदौदेखि ९ असोजसम्मको गरी १० दिनको हाजिर गरेको पाइएको छ ।

उनी विद्यालयको सहायक प्रधानाध्यापक पनि हुन् । उनको छवि निकै विवादित छ । शिक्षक बस्ताकोटी लोकसेवा आयोगको परीक्षामा नक्कली परीक्षार्थी लगाएर परीक्षा दिने सेटिङ गरेको घटनामा संलग्न भएको आरोपमा गत जेठमा पक्राउ परेका थिए । त्यो कुरा बाहिरिएपछि उनलाई विद्यालय व्यवस्थापन समितिले १९ जेठदेखि २९ भदौसम्म निलम्बन गरेको थियो ।

मकवानपुर कारागारबाट छुटेपछि जिल्ला शिक्षा समन्वय इकाइबाट पत्र लिएर शिक्षक बस्ताकोटी विद्यालयमा हाजिर गर्न पुगेका थिए । विद्यालयका प्रधानाध्यापक ईश्वरीप्रसाद बस्ताकोटीले हाजिर गर्न दिएनन् । त्यसपछि शिक्षक दीपेन्द्रले विद्यालय व्यवस्थापन समिति अध्यक्षसँग मिलेर विद्यालयको प्रशासनिक कक्षको ताला फोडेर १० दिनको हाजिर गरेका हुन् । ‘विवादित कुरा आएपछि उहाँलाई अर्को विद्यालयमा पठाउने कुरा थियो । उहाँले यहीँ पढाउँछु भन्नुभयो,’ प्रअ बस्ताकोटीले भने, ‘विद्यार्थीलाई कतै लैजान नपाइने भन्ने प्रतिबद्धता गराएर हाजिर गराउने कुरा थियो । त्यो प्रतिबद्धता गर्नुभन्दा पहिल्यै अध्यक्षसँग आएर शिक्षक स्वयंले ताला फोडेर हाजिर गर्नुभएछ ।’

ताला फोड्ने व्यवस्थापन समिति अध्यक्ष बस्ताकोटी बैठक भएको, रंगरोगनको काम गर्न आफू शनिबार पनि विद्यालय गएको दाबी गर्छन् । तर, प्रधानाध्यापकले चाबी नदिएपछि आफूले ताला फोडेको उनी बताउँछन् । ‘उहाँले पढाएको दिनको हाजिर गर्नुभएको हो । व्यवस्थापन समितिको बैठकमा उहाँलाई हाजिर गर्न दिऔँ भनेको हो,’ अध्यक्ष बस्ताकोटीले भने, ‘प्रअले कि म विद्यालयमा म रहन्न, कि उहाँ रहनुहुन्न भन्नुभयो । त्यस्तो भनेर विद्यालयलाई सिध्याउन पाइन्छ ?’ ताला तोडेर शिक्षकलाई हाजिर गराएको विषयमा भने उनले बोलेनन् ।

दीपेन्द्रले कालिका माविका विद्यार्थीलाई लोकसेवा आयोगको परीक्षामा नक्कली परीक्षार्थी बनाएर लैजाने गरेको रहस्य गत चैतमा बाहिरिएको थियो । सक्कली परीक्षार्थीबाट लाखौँ पैसा लिएर सेटिङमा आफ्ना विद्यार्थीलाई परीक्षामा सहभागी गराउने गरेको खुलेको थियो । उनले विद्यालयका विद्यार्थीलाई भने हाजिरीजवाफ प्रतियोगितामा सहभागी हुन जानुपर्ने बताउँथे । गत १८ चैतमा पनि उनले विद्यार्थीसँगै आफ्नी श्रीमतीलाई पनि हेटौँडा लगेका थिए । ‘सुरुमा काठमाडौँ भन्नुभएको थियो । पछि हेटौँडा सर्‍याे भनेर त्यता लैजानुभयो,’ कालिका माविकी एक छात्राले गत असारमा पत्रकारसँग भनेकी थिइन्, ‘परीक्षा दिएर आएपछि नतिजाबारे सोध्दा आउँछ भन्नुहुन्थ्यो । जेठ १५ गतेपछि उहाँलाई सोध्दा केही बोल्नुभएन । त्यसपछि विद्यालय नै आउनुभएन ।’

गत चैतमा मकवानपुर लगेका एक परीक्षार्थी समातिएपछि अनुसन्धानमा शिक्षक बस्ताकोटी पनि तानिएका थिए । सफाइ पाएपछि पढाउनलाई विद्यालय फर्किएका थिए । तर, विद्यालयभित्र आन्तरिक विवाद हुँदा उनले हाजिर गर्न पाएनन् । त्यसपछि शिक्षक बस्ताकोटीले आफन्त पर्ने विद्यालय व्यवस्थापन समिति अध्यक्षसँग मिलेर गयल हुँदाको हाजिर गरेका हुन् ।

विद्यालयले जिल्ला प्रहरी कार्यालय कास्की, जिल्ला प्रशासन कार्यालय कास्कीलाई तोडफोड भएको घटनाका संलग्नलाई कारबाही गर्न माग गर्दै आइतबार पत्र लेखेको छ । विद्यालयको पत्रमा व्यवस्थापन समिति अध्यक्ष र शिक्षकलाई कारबाही गर्न माग गरिएको छ । कास्कीकोटका स्थानीयले भने अध्यक्षले राजीनामा दिनुपर्ने र शिक्षकको सरुवा हुनुपर्ने माग गरेका छन् ।

प्रकाशित मिति: आइतबार, असोज १६, २०७९ २०:२३