कोइराला पक्षको कुरा देउवाले माने, ‘किचन क्याबिनेट’ले मानेन

A+ A A-

नेपाली कांग्रेसले समानुपातिकको बन्दसूचीमा परेका उम्मेदवारको नामावली सच्याउने गृहकार्य गरिरहेको छ । कांग्रेसले असोज ३ मा बुझाएको बन्दीसूचीमा ७० देखि ७५ प्रतिशत नाम संशोधन गर्ने तयारी गरेको छ । पिछडिएको क्षेत्रबाहेकका नाम संशोधन गर्ने तयारी रहेको एक नेताले शिलापत्रलाई जानकारी दिए ।

इतर समूहका दोस्रो तहका नेताहरूले ‘समान अवसर र न्यायका लागि’ अभियानमा चलाइरहेका छन् । उनीहरूले काेइराला समूहले ४० प्रतिशत हिस्सा नपाए विद्राेह गर्ने चेतावनी दिँदै आएका छन् । नेता शेखर कोइरालाले बाहिर संघर्ष जारी राख्न र पार्टीभित्र आफूहरूले संघर्ष जारी राख्ने बताएका थिए । इतर समूहको असन्तुष्टिपछि सभापति शेरबहादुर देउवा बन्दसूची हेरफेर गरेर नाम पठाउन तयार भए । अन्तिम सूचीमा शेखर कोइराला पक्षका १७ जना पर्ने दाबी छ । ‘यसअघि बुझाएको सूचीमा कोइराला पक्षका १३ जनाको नाम थियो,' काँग्रेसका एक नेताले भने, '४ जना थप्न देउवा सहमत हुनु भएको छ ।’

कोइराला पक्षले प्रतिनिधिसभाको समानुपातिकतर्फ आफ्नो पक्षका कम्तीमा १२ जना सदस्य निर्वाचित हुनुपर्ने भनेको छ । सूची सच्याउन सभापति देउवा तयार भए पनि उपसभापति पूर्णबहादुर खड्का भने तयार छैनन् । ‘उपसभापतिसहित पार्टी प्रवक्ता डा प्रकाशशरण महत लगायतका नेताहरू सूची सच्याउन तयार देखिएका छैनन्,’ ती नेताले भने ।

सोही कारणले शुक्रबार टुंगिनुपर्ने समानुपतिकतर्फका उम्मेदवारको सूची शनिबार पनि टुंगिन सकेको छैन । देउवाको ‘किचन क्याबिनेट’ मा रहेका पार्टी नेताहरूले असहमति जनाएका छन् । नाम टुंग्याउन कांग्रेसका नेताहरू बालुवाटारमा छन् । भाेलिसम्म समानुपातिक बन्दसूची सच्याउने समय छ ।

मञ्जु खाँण बाहिरिने, आरजु सुरक्षित

समानुपातिक सूचीमा गृहमन्त्री बालकृष्ण खाँणकी पत्नी मञ्जु खाँणको नाममा धेरै विवाद छ । गौर हत्याकाण्डमा जेल परेका पूर्वमन्त्री मोहम्मद अफताव आलमको नाममा पनि विवाद भएको छ । प्रदेशसभाको समानुपातिक सूचीमा भने सामान्य हेरफेर बाहेक असन्तुष्टि छैन । रुपन्देहीबाट प्रत्यक्षमा चुनाव लड्ने भएपछि खाँणले पार्टीमा विवाद हुँदा श्रीमतिको नाम फिर्ता लिन तयार भएका छन् । मञ्जु भने सो विषयमा सहमत छैनिन् ।

प्रत्यक्षमा ५ ठाउँबाट सिफारिसमा परेकी सभापति देउवा पत्नी अरजु राणा देउवाको नाममा भने विवाद छैन । प्रत्यक्षतर्फ सिफारिस भएकी आरजु समानुपातिकमा बसेकी छन् । प्रत्यक्षतर्फ २०७४ मा पराजित आरजु योपटक समानुपातिक सुचीमा बसेकी हुन् ।

प्रकाशित मिति: शनिबार, असोज १५, २०७९ १५:५६