५० हजार रुपैयाँकाे लोभमा मोहरम मियाँले भारतबाट काठमाडौं पुर्‍याएका थिए पेस्तोल

५० हजार रुपैयाँकाे लोभमा मोहरम मियाँले भारतबाट काठमाडौं पुर्‍याएका थिए पेस्तोल

A+ A A-

लाल मोहम्मदलाई गोली हान्न हतियार व्यवस्थानपनको काममा पर्साका मोहरम मियाँ प्रयोग भएको खुलेको छ । प्रहरीको उपत्यका अपराध अनुसन्धान कार्यालयको टोलीले उनलाई ८ असोजमा वीरगञ्जबाट पक्राउ गरेको थियो ।

प्रहरीले उनीसहित मोहम्मदको हत्या योजनामा सघाउने अरु २ जनालाई समेत पक्राउ गरेको छ । हत्याका मुख्य योजनाकार र सुटरलाई भने प्रहरीले पक्राउ गर्न सकेको छैन । उनीहरू भारत भागेको प्रहरीको प्रारम्भिक अनुसन्धानबाट खुलेको छ । हत्यामा संलग्न मुख्य आरोपीहरू भारतीय नागरिक हुन् ।

प्रहरीको अनुसन्धानबाट हाल पक्राउ परेका मोहरमलाई उनीहरूले वीरगञ्जबाट हतियार काठमाडौं पुर्‍याएबापत ५० हजार रुपैयाँ दिने सर्तमा हतियार काठमाडौं मगाएको खुलेको छ ।

सम्बन्धित समाचार

नितेन खानले बनाएका थिए लाल मोहम्मदको हत्या योजना, हत्यारा वीरगञ्ज नाकाबाट भारत छिरेको प्रहरीको दाबी

अनुसन्धानमा संलग्न एक प्रहरी अधिकारीले भने, ‘अहिले पक्राउ परेका तीन जना नै पहिलो लियरका आरोपी मात्रै हुन् । उनीहरूलाई लाल मोहम्मदको हत्या योजना कसले किन गर्‍यो केही थाहा छैन । मोहरमले पर्साबाट पेस्तोल ल्याएर गोंगबु माछापोखरीमा बब्लु भन्ने मान्छेलाई दिएको देखिन्छ । त्योबाहेक उनको कनेक्सन केही देखिँदैन ।’

सामाजिक सञ्जाल ह्वाट्सएपमार्फत कुरा गरेर उनले माछापोखरीमा बब्लु भन्नेलाई हतियार दिएको खुलेको छ । उनी सार्वजनिक गाडी चढेर काठमाडौं पुगेको र त्यही साँझ फर्किएका थिए ।

पक्राउ परेका अन्य दुई व्यक्तिको भूमिकाका बारेमा भने प्रहरीले अनुसन्धान जारी राखेको छ । पक्राउ परेका आरोपीलाई उपत्यका अपराध अनुसन्धान कार्यालयको टोलीले विभिन्न युनिटमा राखेर अनुसन्धान थालेको छ ।

४ असोजमा काठमाडौं गोठाटारस्थित आफ्नै ‘एभेन्जर इन्टरप्राइजेज वर्ल्ड बेस्ट गार्मेन्ट’ अगाडि गोली हानी हत्या गरेका थिए । सर्लाही हरिवनका लाल मोहम्मदको हत्याका प्रमुख योजनाकार नितेन मदान खान रहेको प्रहरीको निष्कर्ष छ ।

उनी खुँखार अपहरणकारी भारतका अर्जुन भन्ने उदय सेट्ठीको प्रमुख सहयोगी भएको समेत भएको खुलेको छ ।

सम्बन्धित समाचार

गोठाटार गोलीकाण्ड : मोहम्मद हत्यामा संलग्न तीन जना वीरगञ्जबाट पक्राउ

भारत हरिणाका नितेन पछिल्लो समय नेपाल बस्दै आएका थिए । उनी वसन्तपुरमा कोठा भाडा लिएर आमा र दाजु भाउजुसँग बस्दै आएको प्रहरीको अनुसन्धानले देखाएको छ । यसअघि प्रहरीले उनको दाईलाई समेत पक्राउ गरेको थियो । तर, उनको कुनै कनेक्सन नदेखिएपछि उनी छुटेका थिए ।

मोहम्मदको हत्याबाहेक एक वर्षअघि काठमाडौंको विशालबजारका व्यापारी गुलाब खानको ७० लाख रुपैयाँ लुटेको अभियोग उनीमाथि छ । सो अभियोगमा प्रहरीले नितेन मदानको खोजीमा सक्रिय थियो ।

प्रहरीका अनुसार हुण्डीदेखि क्यासिनोमा भारतीयलाई जुवा खेलाउने भूमिकामा समेत उनको संलग्नता देखिएको प्रहरीको दाबी छ।

सम्बन्धित समाचार