नेपाल टेकेँ है आमा, भोलि घर पुग्छु

A+ A A-

झापा (झापा) बजारका दीपक अधिकारी विदेशबाट दसैँ मनाउन बिहीबार दिउँसाे त्रिभुवन अन्तर्राष्ट्रिय विमानस्थलमा उत्रिए । विमानस्थलबाट बाहिरिनासाथ उनले आमालाई 'दसैँ मनाउन फर्किएँ, भोलि घर आइपुग्छु’ भन्दै फोन गरेँ । उनी पाँच वर्षपछि मलेसियाबाट दसैँ मनाउन स्वदेश फर्किएका रहेछन् ।

अब मलेसिया नफर्किने गरी आएका दीपक यो सालको दसैँ परिवारसँग बसेर मज्जाले मनाउने तयारीमा छन् । दसैँको महत्त्व विदेश गएपछि मात्र थाहा भएको उनी बताउँछन् ।

‘हामी त विदेश पैसा कमाउन गएका हौँ । तर, जति पैसा कमाए पनि आफ्नो देशमा जस्तो रमाइलो कहाँ हुन्छ र विदेशमा ? विदेशमा चाडपर्व खल्लो हुन्छ,’ उनले भने, ‘५ वर्ष मलेसिया बस्दा कैयौँ वर्ष बसेजस्तो भएको छ । आफ्नो देश भनेको आफ्नै हो । पैसा नभए पनि दसैँ मनाउन सकिन्छ । त्यही भएर दसैँमा बिदा मिलाएर आएको हुँ ।’

साहुले बिदा नदिएपछि दसैँ मनाउन नै भनेर कम्पनीसँग करार तोडेर आएको उनको भनाइ छ । उनको करार अझै ६ महिना बाँकी थियो ।

दीपकले मलेसियामा मासिक ६० हजार रुपैयाँ कमाउँदा रहेछन् । उनले एउटा ल्यापटप, पाँचवटा घडी र परिवारका लागि तीनवटा मोबाइल ल्याएका थिए ।

अधिकारीजस्तै भोजपुर पौवादुङमा गाउँपालिकाकी रञ्जना गुरुङ (राई) हातमा सुटकेश डोर्‍याउँदै विमानस्थलबाट बाहिरिँदै थिइन् । उनी ४ वर्षपछि दसैँ मनाउन साइप्रसबाट स्वदेश फर्किएकी हुन् ।

जहाजबाट तल हेर्दा आफ्नो घर पुगेजस्तो लागेको राई बताउँछिन् । आकाशबाटै नेपाल त स्वर्गजस्तै लाग्छ । दसैँ मनाउन घर आउने भनेपछि एक महिनादेखि राम्ररी निद्रा पनि नलागेको उनले बताइन् ।

‘दसैँ ४ वर्षपछि मनाउँदै छु । विदेशमा कामले गर्दा दसैँ मनाउन पाइएन । यो साल दसैँ–तिहार परिवारसँग बसेर मज्जाले मनाउने हो,’ उनले भनिन्, ‘कहिले घर पुगौँजस्तो भएको छ । गाडी पाइयो भने आजै घर जाने हो । एक दिन भए पनि परिवारसँग बढी बस्न पाइन्छ ।’

राई साइप्रासबाट दुई महिनाको बिदामा दसैँ मनाउन स्वदेश फर्किएकी हुन् । उनी साइप्रसको एक प्राइभेट क्लिनर कम्पनीमा कार्यरत छिन् । मासिक ७० हजार रुपैयाँ नेपाली कमाउँदै आएको उनले जानकारी दिइन् ।

देशभित्र रोजगारी पाए त विदेश नजाने सोच उनको छ । तर के गर्नु, स्वदेशमा काम नपाएपछि विदेशिनुपरेको गुनासो उनी गर्छिन् । राईले पनि साइप्रसबाट श्रीमान्‌का लागि एउटा फोन र छोरालाई एचपीको ल्यापटप लिएर आएको बताइन् ।

राई र अधिकारीजस्तै धनकुटाका धिरेन गुरुङ पनि कोरियाबाट ५ वर्षपछि दसैँ मनाउन स्वदेश फर्किएका छन् । उनीपनि सुटकेश डोर्‍याउँदै विमानस्थलबाट बाहिरिँदै थिए ।

स्वदेश फर्किएपछि दसैँ आएको जस्तो लागेको उनले बताए । ‘पाँच वर्षपछि दसैँ मनाउन स्वदेश फर्किएको हुँ । लामो समयपछि परिवारसँग बसेर दसैँ मनाउन पाउँदा धेरै खुसी लागेको छु । दसैँमा घर फर्किन कम्पनीले बिदा र टिकट दिन मान्दैन । जबरजस्ती गरेर आउनुपर्छ’, उनले भने, ‘दसैँमा घर आउने भनेपछि कहिले घर पुगाैँ जस्तो हुन्छ । त्यही भएर दुई साताअघि नै झोला तयार पारेर बसेकाे थिएँ । तीन महिनाको छुट्टी मा आएको हुँ ।’

कोरियाको जुत्ता कम्पनीमा कार्यरत गुरुङले मासिक साढे २ लाख रुपैयाँ सम्म कमाउने गरेको जानकारी दिए । गुरुङले एउटा क्यामेरा, ल्यापटप र दुईवटा मोबाइल परिवारका लागि लिएर आएको बताए ।

दसैँ, तिहार जस्ता ठूला चाडपर्व नजिकिएसँगै नेपालका दुईवटा अन्तर्राष्ट्रिय विमानस्थलमा विदेशबाट फर्किने नेपालीहरूको भीडभाड बढ्न थालेको छ । उनीहरू आफनो देश फर्किँदा धेरै खुसी देखिन्छन् ।

वैदेशिक रोजगारीमा गएका, अध्ययन र विदेशमै विभिन्न पेसा गरी बस्दै आएका नेपाली दसैँ मनाउन फर्किन थालेका हुन् । उनीहरू विदेशबाट फर्किँदा परिवार, आफन्त र साथीभाइलाई उपहार लिएर आउने गर्छन् ।

दसैँमा घर फर्किनेले करिब ३ अर्ब रुपैयाँ बराबरको टीभी र मोबाइल भित्र्याउने गरेको श्रम मन्त्रालयको एक प्रतिवेदनमा उल्लेख छ । दसैँ–तिहारमा दैनिक रूपमा एक हजारभन्दा धेरै टेलिभिजन सेट तथा ३ हजारभन्दा बढी मोबाइल सेट भित्रिने गरेको उक्त अध्ययनले औँल्याएको छ । यी सामानको औसत दाम गणना गर्दा मासिक दुई अर्बमाथि पुग्ने गरेको पाइएको छ ।