आहा रारा गोल्डकपको आयव्यय : १ लाख ४९ हजार मात्र बचत

A+ A A-

पोखरामा सम्पन्न भएको १७औं संस्करणको आहा रारा गोल्डकप फुटबलको आयव्यय सार्वजनिक गरिएको छ। सार्वजनिक गरिएको विवरणअनुसार १७औं संस्करणको आहा रारा गोल्डकप २०७५ बाट जम्मा १ लाख ४९ हजार ३ सय २६ रुपैयाँ बचत भएको देखिएकाे छ ।

गत फागुन ९ देखि १८ गतेसम्म पोखरा रंगशालामा सञ्चालन भएको प्रतियोगिताबाट १ लाख ४९ हजार ३ सय बचत भएको शनिबार आयोजित आयव्यय सार्वजनिक कार्यक्रममा सहारा क्लब पोखराले जानकारी गराएको हो।

अघिल्लो संस्करणकाे प्रतियाेगितामा क्लबले कूल २३ लाख ७६ हजार ९७ रुपैयाँ बचत गरेको थियो। १५औं संस्करणमा २७ लाख बढी बचत भएको थियो । तर, १७औं संस्करणको आहा रारा गोल्डकको समयमा पोखरा रंगशालाको भौतिक संरचना निर्माणको क्रममा रहेको अवस्थामा अस्थायी संरचना तयार पारी सञ्चालन गरिएका कारण बचत घटेकाे बताइएकाे छ ।

क्लबका कोषाध्यक्ष एवं अर्थ संकलन उपसमितिका सह-संयोजक राजु लालचनले १७औं आहा रारा गोल्ड कपबाट ७० लाख ७८ हजार ७ सय ८६ रुपैयाँ आम्दानी भएको बताए । उनका अनुसार प्रतियोगिता सम्पन्न गर्न ६९ लाख २९ हजार ४ सय ६० रुपैयाँ खर्च भयाे ।

गेट टिकटबाट १५ लाख ५० हजार २ सय ६५ रुपैयाँ आम्दानी भएको छ भने व्यानर तथा आर्थिक सहयोगबाट १८ लाख ५५ हजार ४ सय ५० रुपैयाँ आम्दानी भएको कोषाध्यक्ष लालचनले जनाए ।

मुख्य प्रायोजक हिमश्री फुड्स प्रालिको उत्पादन आहा रारा तयारी चाउचाउबाट १३ लाख ५१ हजार रुपैयाँ आम्दानी भएको उनले बताए । राखेप र गोर्खा ब्रुअरी नेपालबाट ४ र ४ लाख, हिमांश एजुकेसन कन्सल्टेन्सीबाट ४ लाख १ हजार आम्दानी भएको थियो ।
त्यसैगरी, खेलाडीहरुको दैनिक भ्रमणमा २३ लाख १३ हजार ६ सय ४१ रुपैया खर्च भएको छ भने पुरस्कार एवं प्रोत्साहन शीर्षकमा १३ लाख २२ हजार, प्रचार प्रसारमा ४ लाख ९७ हजार २ सय ५७ रुपैया खर्च भएको थियो ।

यस्तै, रेफ्रि खर्चमा २ लाख ७८ हजार ८ सय १० रुपैयाँ, मैदान, स्टेज, प्याराफिट व्यवस्थापन र अतिथि सत्कारमा ८ लाख ७७ हजार ४ सय २७ रुपैयाँ खर्च भएको कोषाध्यक्ष लालचनले जनाए ।

पोखरा रंगशालाको भौतिक संरचना निर्माणका क्रममा रहेका कारण बिना प्यारापिट प्रतियोगिता सञ्चालन भएको हुँदा कम दर्शक भित्रँदा आम्दानी निकै कम भएको क्लबका अध्यक्ष केशवबहादुर थापाले बताए ।

सहारा एकेडेमीमा आहा राराको बचत रकमले खर्च व्यवस्थापन गर्दै आएको क्लबले यस वर्षबाट भने सहारा एकेडेमी अक्षयकोषको रकम प्रयोग गर्ने भएको छ । कोषमा हालसम्म करिब एक करोड २० लाखभन्दा बढी रकम संकलन भएको उनले जनाए । उक्त रकमको बैंक ब्याजवापत प्राप्त हुने पैसाले एकेडेमीमा हुने खर्च व्यवस्थापन गरिने क्लबले जनाएको छ ।

प्रकाशित मिति: आइतबार, साउन १९, २०७६ ०१:१२