एफवान सफ्टको ग्रुप स्ट्र्याटेजी डाइरेक्टरमा डेनियल डी श्रेष्ठ

A+ A A-

फिनटेक उद्योगमा नेपालकै अग्रणी एफवान सफ्ट ग्रुपको स्ट्र्याटेजी डाइरेक्टरमा डेनियल डी श्रेष्ठ नियुक्त भएका छन् । श्रेष्ठलाई एफवान सफ्ट ग्रुपको सञ्चालक समितिको बैठकले सो पदमा नियुक्त गर्ने निर्णय गरेको हो ।

श्रेष्ठ यसअघि एफवान ग्रुपअन्तर्गतको हेल्थ टेक भर्टिकल कोजेन्ट हेल्थमा सीईओको रूपमा र ई–सेवा मनी ट्रान्सफरमा निर्देशकको रूपमा कार्यरत थिए ।

आफ्नो नयाँ जिम्मेवारी सम्हाल्दै श्रेष्ठले भने, ‘एफवान सफ्ट अन्तर\गतका कम्पनीहरूको अहिलेसम्म जुन कम्पिटेन्सी बनेको छ, यसमा थप नयाँ सिनर्जी ल्याउन र ग्रुप लेबलग्रोथको भिजन प्राप्त गर्ने दिशामा मैले काम गर्नेछु ।’

स्ट्र्याटेजिक म्यानेजमेन्ट र मार्केटिङमा एमबीएसम्म अध्ययन गरेका श्रेष्ठ अब्बल व्यवस्थापकका रूपमा चिनिन्छन् । उनीसँग फिनटेक, हेल्थटेक, रेमिट्यान्सलगायतका क्षेत्रमा उच्च तहमा १३ वर्षभन्दा बढी काम गरेको अनुभव छ ।

सफ्टवेयरको क्षेत्रमा ख्याति कमाएको एफवान सफ्ट कम्पनी नेपालका ठूला आईटी कम्पनीमध्येको एक हो । सन् २००४ बाट सञ्चालनमा आएको एफवान सफ्टले वित्तीय क्षेत्रका सफ्टवेयर निर्माण तथा उत्पादन गर्दै नेपाललगायत विदेशी मुलुकमा समेत बिक्रीवितरण गर्दै आएको छ ।

एफवान सफ्ट ग्रुपअन्तर्गत हाल १३ वटा कम्पनी सञ्चालनमा छन् । एफवान सफ्टअन्तर्गत ई–सेवा, फोनपे, ईसेवा मनी ट्रान्सफर, कोजेन्ट हेल्थ, दियालो टेक्नोलोजिज, बस सेवालगायतका स्थापित कम्पनी छन् ।

नेपालका अधिकांश बैंक तथा वित्तीय संस्थामा एफवान सफ्टले विकास गरेका मोबाइल बैंकिङ, इन्टरनेट बैंकिङ, भाइबर बैंकिङलगायतका सोलुसन प्रयोग हुँदै आएका छन् । एफवान सफ्टकै भगिनी संस्था ई–सेवा नेपालको पहिलो र बजार हिस्सामा पनि नम्बर वान पेमेन्ट गेटवे कम्पनी हो भने पछिल्ला दिनमा निकै सफल मानिएको फोनपेले पनि स्वदेशी र विदेशी भुक्तानीको क्षेत्रमा अन्तरआबद्धताको रूपमा कार्य गर्दै आएको छ ।

नेपालमा क्यूआर भुक्तानीको क्षेत्रमा फोनपेले एक किसिमको क्रान्ति नै ल्याएको छ ।

प्रकाशित मिति: मंगलबार, असोज ११, २०७९ १६:३७