बागमतीमा प्रहरीको ५२ वटा यात्रु सहायता कक्ष, बसमै चढेर प्रहरीको गस्ती

A+ A A-

विजया दशमी, दीपावली र छठ पर्वलाई लक्षित गरी बागमती प्रदेश प्रहरी कार्यालय हेटौँडाले प्रदेशभर ५२ वटा यात्रु सहायता कक्ष स्थापना गरेको छ ।

चाडपर्वमा सर्वसाधारणको चहलपहल बढी हुने र सम्भावित दुर्घटनालाई रोक्न प्रदेश प्रहरीले १० वटा जिल्लामा (उपत्यकाको काठमाडौं, भक्तपुर, ललितपुरबाहेक) यात्रु सहायकता कक्षा खडा गरेको हो । यात्रुहरूको सुरक्षाका लागि मकवानपुरहित १० जिल्लामा यात्रु सहायता कक्ष स्थापना गरिएको प्रदेश प्रहरी कार्यालयका प्रहरी वरिष्ठ उपरीक्षक दिपक रेग्मीले जानकारी दिए ।

प्रहरीले मकवानपुरमा ८, चितवनमा ४, धादिङमा ६, नुवाकोटमा ६, रसुवामा ६, काभ्रेमा ९, सिन्धुपाल्चोकमा ५, दोलखामा १, रामेछाप २ र सिन्धुलीमा ५ वटा यात्रु तथा नागरिक सहायता कक्ष एकैपटक सञ्चालनमा ल्याइएको रेग्मीले बताए । स्थापना भएका यात्रु तथा नागरिक सहायता कक्षमा ट्राफिक तथा महिला प्रहरीसहित १ सिफ्टमा १ सय ५६ जना प्रहरी हुने गरी चौबिसै घण्टा प्रहरी परिचालन गरिएको रेग्मीले जनाए ।

प्रदेशअन्तर्गतका व्यस्त बसपार्क, यात्रुको भिडभाड र आवतजावत हुने स्थानहरूमा ट्राफिक प्रहरीसहितको सहायता कक्ष स्थापना गरिएको हो । यसैगरी, प्रदेश मुकाम रहेको मकवानपुरमा जिल्ला प्रहरी कार्यालयले पनि चाडपर्व लक्षित सुरक्षा योजना बनाएर काम सुरु गरेको छ । जिप्रका मकवानपुरले सुरक्षित यात्रामा सहयोग गर्न रात्रि बसमा हतियारसहित गस्ती गर्ने भएको छ ।

मकवानपुरको सीमामा पर्ने पश्चिममा लोथरदेखि दक्षिणमा चुरियामाई मन्दिरसम्म ६ वटा प्रहरी टोलीले यात्रुबाहक बसमा रातिको समयमा हतियारसहित गस्ती गर्ने जनाएको छ । यो क्षेत्रमा चाडपर्वको समयमा लुटपाट हुनसक्ने आकलन गर्दै यात्रुसँगै गस्ती गर्ने भएको मकवानपुरका प्रहरी प्रमुख प्रहरी उपरीक्षक बामदेव गौतमले जानकारी दिए ।

जिल्लामा पिकेट, क्युआरटी, सादा पोशाक, मोबाइल गस्ती, साइकलमा गस्तीलाई २४ घण्टे बनाई चाडपर्व लक्षित सुरक्षा योजनामा ५ सय ७६ जना प्रहरी परिचालन गरिने प्रहरी उपरीक्षक गौतमले बताए । जिल्लाको चारै क्षेत्रको नाकामा र जिल्लाभित्र रहेका ६२ वटै प्रहरी युनिटबाट पैदल, साइकल मोटरसाइकलमार्फत प्रहरी टोली परिचलन हुने जनाइएको छ । जिल्लाभर दैनिक रूपमा सवारी चालकहरूको मादक पदार्थ र लागुपदार्थ सेवनको परीक्षण गर्ने व्यवस्था प्रहरीले गरेको छ ।

प्रकाशित मिति: मंगलबार, असोज ११, २०७९ ११:१२