दसैँमा लामो दूरीको यात्रामा यसरी ठगिन्छन् यात्रु, बढी पैसा तिरे अगाडिकै सिट

दसैँमा लामो दूरीको यात्रामा यसरी ठगिन्छन् यात्रु, बढी पैसा तिरे अगाडिकै सिट

A+ A A-

काठमाडौं बस्ने मोरङकी पवित्रा तामाङले दसैँमा घर जान टिकटका लागि सप्तकोसी हाइसमा फोन गरिन् । काउन्टरले टिकट भएको तर २५ सय लाग्ने जवाफ दिएपछि उनी अचम्ममा परिन् ।

‘सधैँ १५ सय रुपैयाँमा जाने गरेकी छु भन्दा दसैँका लागि बढेको हो भन्यो । बरु अगाडिकै सिट मिलाइदिऊँला तर यतिमा नजाने भए अरु गाडीमा जानुस् पो भन्छ,' पवित्रा भन्छिन्, 'के गर्नु, जानुपरिहाल्यो । नाम टिपाएँ ।’

उक्त गाडीले नाम टिपाए पनि टिकट भने नदिने रहेछ । हाल काठमाडौंबाट मोरङको लेटाङसम्मको भाडा १ हजार ६ सय ५६ छ । यो हिसाबले हेर्दा उक्त गाडीले पवित्रासँग ८ सय ४४ रुपैयाँ बढी लिएको छ ।

यातायात व्यवसायी राष्ट्रिय महासंघ भने सरकारले तोकेको भन्दा बढी भाडा लिनु गैरकानुनी रहेको स्वीकार गर्छ । त्यस्तो पाइए हेल्प डेस्कमा उजुरी दिन महासंघका अध्यक्ष विजय स्वाँर आग्रह गर्छन् ।

‘सरकारले तोकेको भन्दा धेरै भाडा लिनु गैरकानुनी हो । कसैलाई यस्तो परे तुरुन्त उजुरी दिनुपर्छ,' स्वाँरले शिलापत्रसँग भने, 'त्यस्ता सवारीलाई तत्काल कारबाही हुन्छ ।’

उपभोक्ता अधिकारकर्मी माधव तिमल्सिना सरकारले तोकेभन्दा बढी भाडा लिन खोज्ने यातायात व्यवसायीको प्रतिवाद गर्नुपर्ने तर्क गर्छन् । तोकिएभन्दा बढी भाडा असुल्नु संविधानको मर्मविपरीत भएकाले कसैले यस्तो गर्न खोजे यात्रुले प्रतिवाद गर्नुपर्ने तिमल्सिनाको तर्क छ ।

‘यस्तो समयमा भाडा धेरै लिने, पछाडिको सिट मात्रै छ भन्ने, दुई थरी टिकट बनाउनेलगायत धेरै समस्या देखिन्छन्, जसका बारेमा प्रशासनलाई जानकारी नहुन सक्छ,’ उनले भने, ‘यस्तो अवस्थामा यात्रुले तुरुन्त यात्रु सहायता कक्षमा जानकारी दिनुपर्छ ।’

चाडपर्वलाई लक्षित गर्दै ट्राफिक प्रहरीले विशेष अभियान चलाएको काठमाडौं उपत्यका ट्राफिक प्रहरी कार्यालयका प्रवक्ता राजेन्द्रप्रसाद भट्ट बताउँछन् । ‘कुनै यात्रु भाडामा ठगिए १००, १०३ वा हेल्प डेस्कमा सम्पर्क गरे सम्बन्धित सवारीसाधन वा कम्पनीलाई तुरुन्त कारबाही हुन्छ,’ उनले भने ।

यात्रु ठगिनबाट जोगाउन साझा पोशाकमा प्रहरी परिचालन पनि गरिएको उनले जानकारी दिए । त्यस्तै, यात्रुको सुरक्षाका लागि ट्राफिक प्रहरीले सवारीसाधनको अवस्था जाँच्न प्राविधिकद्वारा परीक्षण, मापसे परीक्षण, ओभरलोड परीक्षणजस्ता कार्य पनि गरिरहेको भट्टले जानकारी दिए ।

‘अवस्था ठीक नभएका हिजो १५ वटा र आज १६ वटा सवारीसाधन नियन्त्रणमा लिएका छौँ । त्यस्ता सवारीसाधनले दुर्घटना निम्त्याउने भएकाले यो अभियान जारी राख्छौँ,’ उनले भने ।

प्रकाशित मिति: सोमबार, असोज १०, २०७९ १८:१३