बहादुरसिंह लामाको दाबी– योपटक म लड्छु, अघिल्लो चुनावमै केसीसँग भद्र सहमति भएको थियो

बहादुरसिंह लामाको दाबी– योपटक म लड्छु, अघिल्लो चुनावमै केसीसँग भद्र सहमति भएको थियो

A+ A A-

२०७४ को निर्वाचनमा जसले जुन क्षेत्र जितेको हो, सो पार्टीले पाउने गठबन्धनको प्रारम्भिक सहमतिअनुसार नुवाकोटमा क्षेत्र नं १ मा माओवादी र एमालेले जितेको क्षेत्र नं २ मा दोस्रो भएको कांग्रेसले टिकट पाउने देखिन्छ । दुईमध्ये एक क्षेत्र मात्र कांग्रेसले पाउँदा कांग्रेसभित्र आकांक्षी व्यवस्थापन गर्न गाह्रो हुने देखिएकाे छ ।

क्षेत्र नं १ मा कांग्रेस प्रवक्ता डा प्रकाशशण महत उम्मेदवार बन्न आकांक्षी देखिएका छन् । जसका लागि उनले माओवादीका सांसद हितबहादुर तामाङसँग वार्ता गर्नेदेखि माओवादी अध्यक्ष पुष्पकमल दाहाल प्रचण्डसम्म भेट गरेका छन् । तर, उनकाे नाम समानुपातिकको बन्दसूचीमा पनि समावेश छ । जबकि उनी पार्टीको प्रत्यक्षतर्फ १ नम्बरमा सिफारिस भएका थिए । समानुपातिक सिफारिसमा थिएनन् ।

क्षेत्र नं २ बाट नेता अर्जुन नरसिंह केसी समानुपातिक सूचीमा थिए । कांग्रेसले निर्वाचन आयोगमा बुझाएको बन्दसूचीमा उनको नाम छैन । नेता केसी प्रत्यक्ष चुनाव लड्न चाहान्छन् । सो क्षेत्रबाट अर्को नेता बहादुरसिंह लामा पनि प्रत्यक्ष चुनाव लड्न चाहन्छन् ।

२०७४ को चुनावमा नेता केसी प्रत्यक्ष निर्वाचन लडेका थिए भने लामा समानुपातिक कोटाबाट सांसद बनेका थिए । २०७४ मा पनि लामा र केसीबीच कांग्रेसबाट काे चुनाव लड्ने भन्ने विवाद भएको थियो । ‘०७४ मा उहाँले अन्तिम पटक म उठ्छु उमेर पनि भयो मलाई छोड्नु भन्नुभएको थियो । तीन निर्वाचन क्षेत्रबाट दुई निर्वाचन क्षेत्रमा झरिसकेपछि आदरणीय नेताले भनेपछि मान्नुपर्छ भनेर मानेकै थिएँ,’ लामाले शिलापत्रसँग भने, ‘भद्र सहमतिअनुसार म २०७४ मा पछि हटेर समानुापतिकमा बसेको हुँ । त्यसअनुसार यसमा समस्या नहोला ।'

तत्कालीन समयमा तीनवटा निर्वाच क्षेत्र रहँदा केसी पहिले क्षेत्र नं ३ र पछि १ बाट चुनाव लड्ने गर्थे । क्षेत्र नं ३ बाट लामाले चुनाव लड्दै आएका थिए ।

२०७४ मा पराजित भएपछि अर्को चुनावको तयारी गर्न केसीले आफूलाई भनेको लामा बताउँछन् । ‘०७४ को चुनावपछि पनि यो क्षेत्र तिम्रै हो तिमी नै अघि बढ भन्नुभएको थियो । उहाँले आफ्नो कुरा कर्यान्वयन गर्नहुन्छ । बाहिरी रूपमा टिप्पणी भएको मात्र हो उहाँ अभिभावक भएर बुझ्नुहुन्छ होला,' लामाले भने ।

प्रकाशित मिति: सोमबार, असोज १०, २०७९ १५:३७