चाडपर्व लक्षित कर्णाली सुरक्षा रणनीति लागू गर्दै प्रहरी

A+ A A-

दसैं, तिहार र छठ पर्व लगायतका चाडपर्वलाई लक्षित गर्दै कर्णाली सुरक्षा रणनीति लागू गरिने भएको छ । कर्णाली प्रदेश प्रहरी कार्यालय सुर्खेतले चाडपर्वका अवसरमा आपराधिक गतिविधिबाट हुनसक्ने सम्भावित घटनाको न्यूनीकरणका लागि पूर्व सुरक्षा रणनीतिक योजना २०७९ लागू गर्न लागेको हो ।

भोलिदेखि लागू हुने सुरक्षा रणतीतिमा आम नागरिको जनजीवन सामान्य तुल्याउन, बैंक तथा वित्तीय संघसंस्थाहरूमा हुने कारोबार सुरक्षित गराउन, महँगी, कालोबजारी नियन्त्रण, विभिन्न गन्तव्यसम्म जाने यात्रुलाई पूर्ण सुरक्षाको प्रत्याभूति तथा कुनै पनि किसिमको अप्रिय घटना हुन नदिन योजनाबद्ध प्रहरी परिचालन, अनुगमन र नियन्त्रण गर्न मातहतका निकायहरूलाई निर्देशन दिइएको छ । जसका लागि प्रदेशभर ४ हजार एक सय ४१ जना प्रहरी जनशक्ति परिचालित हुनेछन् भने, आपराधिक गतिविधि हुनसक्ने सम्भावित स्थानमा तालिम प्राप्त प्रहरीसहित खानतलासी गरिने छ ।

यस्तै १ सय २५ वटा नियमित क्युआरटी (क्वीक रेसपोन्स टिम) सहित ३१ स्थानमा नियमित चेक पोइन्ट स्थापना हुनेछन् । ५३ स्थानमा प्रहरी र ट्राफिक प्रहरीको संयुक्त चेकिङ, चोरी, तस्करी, लागुऔषध कारोबार लगायतका अवैध गतिविधि नियन्त्रण गर्न १८ स्थानमा निगरानीको व्यवस्था गरिने छ ।

यस्तै, झै–झगडा, जुवा तास, चोरी लुटपाट, मादक पदार्थ सेवन नियन्त्रणका लागि ८६ स्थानमा निगरानीसहित २६ ठाउँमा नागरिक सहायता कक्ष स्थापना गरिने कार्यालयले जनाएको छ ।

सुरक्षा योजनाअन्तर्गत हरेक जिल्ला सदरमुकाम, व्यापारिक केन्द्र र बैंक तथा वित्तीय संघसंस्थामा प्रहरी परिचालन गरिने छ । मुख्य बजार क्षेत्र, बढी किनमेल हुने क्षेत्र र नाकामा साधा पोशाकमा समेत प्रहरी परिचालन गर्न मातहतका निकायलाई निर्देशन दिइएको छ ।

त्यस्तै घटनाको तत्काल रेस्क्यु गर्न २४ सैं घण्टा सुरक्षाकर्मीहरू तयारी अवस्थामा राखिएको छ । अति संवेदनशील मानिएका र भीआईपी क्षेत्रमा मोवाइल टोली र साधा पोशाकका सुरक्षाकर्मी खटाइने छ ।

त्यस्तै राजमार्गमा ट्राफिक प्रहरी, बसपार्क तथा बस स्टेशनमा नागरिक हेल्प डेस्क र मुख्य राजमार्गमा चेक जाँचलाई समेत कडाइ गर्ने प्रहरीको योजना छ ।

जुवातास खेल्ने÷खेलाउने क्षेत्रमा विशेष निगरानी बढाउन विशेष सुरक्षा परिचालन गरिने जनाइएको छ । गुण्डागर्दी, चोरी, लुटपाट, ग्याङ्फाईट, जुवातास जस्ता आपराधिक घटना तथा ट्राफिक नियमको उल्लङ्घन एवं सवारी दुर्घटना महिला तथा बालबालिकामाथि हुन सक्ने दुव्र्यवहार लागुऔषध बेचबिखन तथा ओसार पसार, भन्सार तस्करी, अवैध हातहतियार ओसार पसार तथा सोको प्रयोगबाट हुने गम्भीर प्रकृतिका घटनालाई नियन्त्रण गर्ने रणनीतिमा प्रहरी रहेको कर्णाली प्रदेश प्रहरी कार्यालयका प्रवत्ता एवम् प्रहरी वरिष्ठ उपरीक्षक माधवप्रसाद श्रेष्ठको भनाइ छ ।

कर्णाली भित्रिने मुख्य नाका भेरीगंगा नगरपालिकाको बबई, पञ्चपुरी नगरपालिकाको कुईनेमा विशेष सुरक्षा योजना लागू गरिने छ । भारत लगायत तेस्रो मुलकबाट कर्णाली भित्रिने र बाहिरिने राजस्व छली लगायतका अवैध सामाग्रीमा विशेष निगरानी राखिने छ ।

चाडपर्वमा आवश्यक पर्ने खाद्य तथा अन्य सामाग्रीको कालोबजारी, कृतिम अभाव, महँगी, अखाद्य वस्तु विक्रिवितरणमा समेत रोक लगाइएको छ ।

विभिन्न कारणले अलपत्र परेका नागरिको उद्दार गरी गन्तव्यसम्म पुर्‍याउन सहयोग गरिने सुरक्षा रणनीतिमा उल्लेख गरिएको छ ।

प्रकाशित मिति: शनिबार, असोज ८, २०७९ १६:४४