खबरदारी सभाबाट कांग्रेसकाे संस्थापनइतर समूहले दिन खोजेका ५ सन्देश

कांग्रेस नेता शेखर काेइराला । फाइल तस्वीर ।

A+ A A-

‘समान अवसर र न्यायका निम्ति खबरदारी सभा’ भन्दै कांग्रेसको संस्थापनइतर समूहले शनिबार बानेश्वर बैंक्वेटमा कार्यक्रम गर्दैछ । याे सभालाई चुनावी टिकट बाँडफाँडको किचलाेकाे उत्पादनका रूपमा अर्थ्याइएकाे छ ।

संस्थापन पक्षले न्यायोचित ढंगले समानुपातिक सूची नबनाएकाे भन्दै इतर समूह रूष्ट छ । पार्टी सभापति शेरबहादुर देउवाले शेखर कोइराला समूहलाई पाखा लगाएको बुझाइ इतर समूहकाे छ । खबरदारी सभामा इतर समूहबाट प्रतिनिधित्व गर्ने भ्रातृ तथा शुभेच्छुक संस्थाका नेता कार्यकर्ता उपस्थित हुँदैछन् । खबरदारीपश्चात् पनि निरन्तर आफूहरूलाई पाखा लगाइए सभालाई सशक्त बनाउँदै लगिने तयारी रहेकाे साे समूहका एक नेताले बताए ।

खबरदारी सभामार्फत कांग्रेसभित्रकाे असन्तुष्ट समूहले दिन खाेजेकाे ५ सन्देश :

आन्तरिक एकता

पार्टीभित्र एकता गर्न सकियो भने अर्को पार्टीको वैशाखी नचाहिने तर्क असन्तुष्ट समूहले गर्दै आएकाे छ । उनीहरूको बुझाइमा कांग्रेस हराउने पनि कांग्रेस र जिताउने पनि कांग्रेस नै हो । गठबन्धनमा रहेका दललाई ८०-८५ सिट दिन तयार भए पनि पार्टीभित्र भागबन्डा मिलाउन देउवा तयार नभएकाे साे समूहकाे गुनासाेछ । अरु दलसँग १८ घण्टासम्म मिटिङ गर्ने सभापतिले कांग्रेसमै समूहको नेतृत्व गर्ने नेतालाई १८ मिनेट पनि भेट नदिएकाे इतर समूह भनाइ छ । त्यसैले खबरदारी सभा गर्न बाध्य भएकाे एक नेताले बताए ।

आकाङ्क्षीकाे भेला

प्रदेश र प्रतिनिधिसभा चुनवाको लागि सिफारिस भएका अधिकांश आकाङ्क्षी काठमाडौंमा छन् । नेताहरूको घरदैलोमा टिकटका लागि लबिङमा पुगेका उनीहरू निराश छन् । सो निराशालाई सभामार्फत देखाउने प्रयत्न इतर समूहको छ । बन्दसूची पेस गर्ने क्रममा इतर समूहसँग सल्लाह नगरी सभापति देउवा पक्षले एकपक्षीय रूपमा आयोगमा सूची बुझाएको आरोपलाई सभामार्फत पुष्टि गराउन इतर समूह चाहन्छ ।

देखाउने र सुनाउने प्रयास

समानुपातिकको बन्द सूचीमा पार्टीभित्र असन्तुष्टि छ । सो असन्तुष्टि कस्तो छ भनेर खुलारूपमा संस्थापन पक्षलाई सुनाउन र देखाउन चाहन्छ इतर पक्ष । अन्य दलको आवाज सुन्ने नेतृत्वले आफ्नै पार्टीभित्रको आवाजलाई कसरी दबाइरहेकाे छ, याे देखाउन पनि संस्थापनइतर समूहले खबरदारी सभा गरेकाे हाे ।

४० प्रतिशत माग

१४औँ महाधिवेशनमा सभापतिमा प्रतिस्पर्धा गरेका शेखर काइरालाले ४० प्रतिशत मत पाएको र त्यो तल्लाे तहदेखिको मत रहेकाले अबका पार्टी प्रक्रियामा पनि सो मतको सम्मान हुनुपर्ने इतर समूहको माग छ । योग्य उम्मेदवारको हकमा कुनै माग नराख्ने र संस्थापन पक्षले एकलौटी गरिरहे ४० प्रतिशत मागलाई चर्काउने रणनीति सो समूहको छ ।

सूची सच्याउन दबाब

भेलाले समानुपातिकको सूची सच्याउन दबाब दिने र प्रत्यक्षतर्फको टिकट वितरणमा आफ्नो समूहलाई समेट्न दबाब बढाउने रणनीति लिएको छ । सभापति देउवाले इतर समूहलाई बेवास्ता गरेर अगाडि बढ्ने नीति लिएपछि यसविरुद्ध भेलामार्फत दबाब दिन कार्यकर्ता काठमाडौंमा भएको माैकालाई सदुपयाेग गर्न देखिन्छ । असोज १६ गतेसम्म राजनीतिक दलहरूलाई समानुपातिकको बन्द सूचीमा क्लस्टर नमिलेमा सच्याउने समय दिएको छ ।

प्रकाशित मिति: शनिबार, असोज ८, २०७९ १२:३८