क-कसले जिते एनएफपीजेकाे फाेटाे पत्रकारिता पुरस्कार ?

A+ A A-

नेपाल फोटो पत्रकार समूह (एनएफपीजे) ले विभिन्न विधामा फोटो पत्रकारहरूलाई सम्मान र पुरस्कार प्रदान गरेको छ । आफ्नो २५औँ वार्षिकोत्सवको अवसरमा बिहीबार साँझ काठमाडौंमा आयोजित विशेष समारोहमा एनएफपीजेले अर्थमन्त्री जनार्दन शर्मा र युवा तथा खेलकुदमन्त्री महेश्वर गहतराजको हातबाट फोटो पत्रकारहरूलाई सम्मान अर्पण र पुरस्कार वितरण गरेको हो ।

यस वर्षको एनएफपीजे नेपाल लाइफटाइम एचिभमेन्ट अवार्ड बाट वरिष्ठ फाेटाे पत्रकार हरिगोपाल प्रधान नगद ५० हजार राशिसहित सम्मानित भए । तर आफूले पाएको नगद राशि प्रधानले पत्रकारहरूकै कोषमा राख्ने घोषणा गरी चेक हस्तान्तरण गरे ।

यसैगरी फरक-फरक विधाका लागि मनोनयनमा परेका नाममध्ये हरेक विधाबाट एक/एक जना फोटो पत्रकारलाई पुरस्कृत गरियो । नेपाल टेलिकम दैनिक जीवन फोटो पत्रकारिता विधाको अवार्ड सुनिल शर्माले जिते । हरिससिंह नगालले खेलकुद फोटो पत्रकारिता विधाको पुरस्कार लगे । यसैगरी पञ्चकन्या ग्रुप महिला फोटो पत्रकारिता विधामा अनन्ता भण्डारी, पर्यटन तथा संस्कृति फोटो पत्रकारिता विधाका लागि हरि मर्हजन, ग्लोबल आईएमई बैंक आर्थिक फोटो पत्रकारितातर्फ अशोक दुलालले अवार्ड पाए । राजनैतिक फोटो पत्रकारिता विधातर्फ नवीनबाबु गुरुङ, कृषि विकास बैंक स्वतन्त्र फोटो पत्रकारिता विधाका लागि दीपेन्द्र मर्हजनले अवार्ड तथा प्रमाणपत्र पाए ।

कुन प्रदेशबाट कसले जिते अवार्ड ?

एनएफपीजेले प्रदेशगत फोटो पत्रकारिता पुरस्कार पनि दियो । उत्कृष्ट फोटो पत्रकारिता विधामा प्रदेश १ बाट गुरु ढकाल, मधेस प्रदेशबाट जियालाल प्रसाद साह, बागमतीबाट सन्तोष श्रेष्ठ, गण्डकीबाट प्रेम थापा, लुम्बिनीबाट मनोज पौडेल, कर्णालीबाट वसन्तप्रताप सिंह र सुदूरपश्चिम प्रदेशबाट विनोद विष्टले अवार्ड जिते ।

पुरस्कृत फोटो पत्रकारहरूको नाम उनीहरूले खिचेका विधागत तस्वीरका आधारमा वरिष्ठ फोटो पत्रकारहरू मीनरत्न वज्राचार्य, राजभाइ सुवाल र राजन काफ्लेले छानेका हुन् ।

एनएफपीजेको वार्षिकोत्सव समारोहमा हरिगोपाल फोटोपत्रकारिता पुरस्कार तथा सम्मानअन्तर्गत साहसिक फोटो पुरस्कार झापाका नेत्रविक्रम विमलीलाई प्रदान गरियो भने खेलकुदतर्फ विनयकुमार बानियाँ, पर्या-पर्यटनतर्फ प्रदीपकुमार श्रेष्ठ, संस्कृति-सम्पदातर्फ किरण आचार्य, मनोरञ्जनतर्फ अजय मर्हजनलाई पुरस्कार दिइयो । डिआईजी माधव थापा जोखिमपूर्ण फोटोपत्रकारिता पुरस्कार आर्यन धिमाललाई नगद १० हजार रुपैयाँसहित प्रदान गरियो ।

कार्यक्रममा एनएफपीजेका संस्थापकसहित वरिष्ठ फोटो पत्रकार, फोटोग्राफरलाई सम्मान गरियो । संस्थाले राष्ट्रिय फोटोपकार आपतकालीन राहतकोषमा आर्थिक सहयोग गर्ने दाताहरूलाई प्रशंसापत्र प्रदान गर्‍यो ।

कार्यक्रमका अवसरमा एनएफपीजेले कोरोनाकालमा फोटो पत्रकारहरूले खिचेका तस्वीरहरूको संकलन गरी ‘लकडाउनमा नेपाल’ नामक फोटो पुस्तक पनि सार्वजनिक गर्‍यो । उक्त अवसरमा बङ्गलादेशका फोटो पत्रकारहरूले खिचेका फोटोहरू पनि प्रर्दशनी गरिएको थियो ।

संस्थाका अध्यक्ष प्रदिपराज वन्तको अध्यक्षतामा सञ्चालन भएको समारोहमा अर्थमन्त्री शर्मा विशेष अतिथि थिए भने युवा तथा खेलकुदमन्त्री महेश्वर गहतराज विशेष अतिथि थिए । बङ्गलादेश फोटो जर्नलिस्ट संगठनका वरिष्ठ उपाध्यक्ष नसिम सिक्दरलगायत १२ जना बङ्गलादेशी फोटो पत्रकार पनि कार्यक्रममा उपस्थित थिए । यसैगरी अल इन्डिया ओर्किङ न्युज क्यामेराम्यान एसोसिएसनका अध्यक्ष एनएस सिन्हा पनि कार्यक्रमममा देखिए । कार्यक्रममा विदेशी फोटोपत्रकारलाई प्रमुख अतिथि जनार्दन शर्माबाट सम्मान गरियो ।

प्रकाशित मिति: शनिबार, असोज ८, २०७९ ०५:३३