गोदावरीको याे घरमा किन जान्छन् गर्भवती ?

A+ A A-

रत्नपार्कबाट करिब १४ किलोमिटरको दूरीमा छ टौखेल । टौखेल हुँदै बग्छ गोदावरी खोला । टौखेल हुँदै बग्ने गोदावरी किनारमा बस्ती छैन् । खोला आसपासमा धेरै ठाउँमा जग्गा खण्डीकरण गरिएकाे छ । धेरै क्षेत्रमा व्यवसायिक कृषि खेति पनि छ । त्यसैले यो क्षेत्रमा तरकारी खेतिका लागि बनाईएका टनेल जताजतै देखिन्छन् ।

टौखेलबाट गोदावरीतर्फ जाने सडकको बायाँतर्फ १ किलोमिटर तल झरेपछि एउटा आलिसान घर देखिन्छ । तरकारी खेतिका लागि बनाइएका टनेललाई गिज्याउँदै बनेजस्तो देखिन्छ यो भव्य संरचना । रातो टायलले सजिएको घर झट्ट हेर्दा रिर्सोटजस्तो लाग्छ । तर, रिर्सोट भने हाेइन ।

‘रिर्सोट होइन भने कुनै धनि मानिसको फार्म हाउस होला,’ हामीले अनुमान गर्यौं ।

तर, हाम्रो अनुमान गलत सावित भयो, जब हामीले यसबारे साधीखाेजी गर्याैं ।

घरसम्म पुग्ने सडक छैन् । खेतको आली हुँदै पुग्नुपर्छ ।

सडक नपुगेको । सहजै आउजाउ गर्न नसिकने यो घरमा आवतजावत गर्ने भने अधिकांश महिला हुँदा रहेछन् ।

महिलाहरु आउँछन, केही महिना बस्छन अनि जान्छन् । निरन्तर महिलाहरु आइरहेको देख्छन् घर छेउमै तरकारी खेति गर्नेहरु । उनीहरुलाई लाग्छ यो कुनै सामाजिक ‘संस्था’ हो ।

सहरबाट टाढा । सामान्य सेवा सुविधाको पहुँचबाट पर । एकान्तमा चलाइने कस्तो संस्था हो यो ?, हामीमा उत्सुकता बढ्याे ।

‘त्यस्तै महिला आउँछन् यहाँ,’ घरसँगै जोडिएको जग्गामा तरकारी खेति गरिरहेकी एक महिलाले भनिन् ।

‘कस्ता महिला आउँछन् दिदी ?’ हामीले प्रश्न गर्यौ । हामीसँग संवाद गरिरहेकी महिलालाई हामी तरकारी सप्लायर हाैं भनेका थियाैं । हाम्रो परिचय र प्रश्नको तालमेल त्यति नमिलेकाले हुनुपर्छ ती महिलाले हामीलाई एकछिन नियालिन् ।

‘पेट बोकेका केटी आउँछन् । बच्चा जन्माउँछन अनि जान्छन् ।’ सानो स्वरमा हडबडाउँदै उनले जवाफ दिइन्, ‘यस्तै महिलाका लागि काम गर्ने संस्था हो भन्छन्, मलाई पनि थाह छैन ।’ यति भनेर उनले हामीलाई इग्नोर गर्दै टमाटरको बोटमा डोरी बाँध्न थालिन् ।

तरकारी खेती गरिरहेकी दिदीको कुरा सुनेपछि हामी थप आश्चर्यमा पर्यौ । हिलाम्य बाटो छिचाेल्दै हामी त्याे घरतर्फ लाग्यौं ।

शंका र डर बोक्दै गेट खोलेर भित्र छिर्यौं । ढोकामा पुग्नेबित्तिकै तीन जना पुरुष देखिए ।

तीमध्ये एक अधवैंसेले साेधे, ‘के थियो ? कसलाई भेट्न आउनुभाकाे ?’

उनको प्रश्न सुनेपछि हामीले प्रतिप्रश्न गर्याैं, ‘तपाई नै हो यहाँको मान्छे ?’ अधवैंसेले हो भन्दै टाउको हल्लाए ।

‘तपाईंसँग पर्सनल कुरा गर्नु थियो,’ हामीले भन्यौँ ।

‘हुन्छ,’ भन्दै उनले ढोका खोलेर भित्र आउन आग्रह गरे ।

भित्र छिर्नासाथ ‘रिसेप्सन’ लेखेको देखियो । त्यसको छेउकाे ढोकामा ‘अफिस’ लेखिएको थियो ।

हामीलाई भित्र लगेर सोफामा बस्न आग्रह गरे, ती व्यक्तिले । गुलावी रंगको टेबल वरिपरि सजिएका रंगीन सोफामा हामीलाई बसाएपछि उनले आउनुको कारण सोधे । हामीले कारण बतायौँ ।

एकछिन कुरा गरेपछि उनले हामीलाई घर देखाउन लगे । विभिन्न नाम दिइएका कोठा देखाए । बडेमानको भान्सा कोठा देखाउँदै भन्न थाले, ‘यो फर्निचर सबै मलेसियाबाट मगाएको हो ।’

भुई तल्लासहित दुई तल्लाको यो घर ३ हजार ९ सय २८ वर्गफुट क्षेत्रफलमा फैलिएको छ ।

घरबाट बाहिर निस्कँदै गर्दा सानो किताब -याक देखियो । किताब -याकमाथि अलपत्र थियो ‘बर्थ एटलस’ लेखिएको ठूलो किताब ।

(गर्भवती जाने त्यो घरको खुलासा अर्को श्रृंखलामा)

बच्चा जन्माउने घर तर अस्पताल होइन

जन्मनेबित्तिकै बच्चा छोडेर कहाँ जान्छन् आमा ?

प्रकाशित मिति: शनिबार, साउन १८, २०७६ ०३:०९