समानुपातिकतर्फको चारवटा प्रदेशको छापियो मतपत्र, कुन प्रदेशका लागि कति छापियो ?

समानुपातिकतर्फको चारवटा प्रदेशको छापियो मतपत्र, कुन प्रदेशका लागि कति छापियो ?

A+ A A-

निर्वाचन आयोगले ४ मंसिरमा हुने चुनावका लागि चारवटा प्रदेशको समानुपातिकतर्फको मतपत्र छपाइको काम सकेको छ । आयोगको मुद्रण शाखाका अनुसार प्रदेश १, मधेस प्रदेश, बागमती र गण्डकी प्रदेशको मतपत्र छपाइ सकिएको छ ।

प्रदेश १ को लागि ३८ लाख १३ हजार, मधेस प्रदेशका लागि ३७ लाख ९३ हजार, बागमती प्रदेशका लागि ३८ लाख ९३ हजार गण्डकी प्रदेशका लागि २० लाख ४२ हजार मतपत्र छपाइ भएको आयोगले जनाएको छ । प्रदेश १ र मधेस प्रदेशको प्याकिङको काम पनि सकिएको छ ।

अहिले कर्णाली र सुदूरपश्चिम प्रदेशको मतपत्र छपाइको काम भइरहेको छ । कर्णालीका लागि ११ लाख ३६ हजार मतपत्र छाप्नु पर्नेमा आजसम्म ५ लाख ७३ हजार छपाइ सकिएको छ । कर्णालीका लागि अब ५ लाख ६३ हजार मतपत्र छाप्न बाँकी छ ।

त्यसैगरी लुम्बिनीका लागि ३६ लाख ४९ हजार छाप्नुपर्नेमा १० लाख ९४ हजार मतपत्र छपाइ सकिएको छ । सुदूरपश्चिम प्रदेशका लागि १८ लाख ५८ हजार छाप्नु पर्नेछ । लुम्बिनी र कर्णालीको सकिएपछि सुदूरपश्चिमको मतपत्र छपाइ हुनेछ । प्रदेशको समानुपातिकतर्फ जम्मा २० करोड १८ लाख ४ हजार मतपत्र छपाइ हुने आयोगले जनाएको छ ।

निर्वाचन आयोगले प्रदेश र प्रतिनिधिसभा निर्वाचनका लागि प्रत्यक्ष र समानुपातिकतर्फ गरी ८ करोड मत्रपत्र छाप्ने जनाएको छ । ‘प्रत्यक्षतर्फ ४ करोड र समानुपातिकतर्फ पनि ४ करोड नै मतपत्र छाप्ने योजना छ,’ आयोगका प्रवक्ता शालिग्राम शर्मा पौडेलले भने ।

गत २० असोजबाट जनक शिक्षा सामग्री केन्द्रमा समानुपातिकतर्फको मतपत्र छाप्न सुरु गरिएको हो । प्रवक्ता पौडेलका अनुसार समानुपातिकतर्फ २१ लाख नमुना मतपत्र छपाइ सकिएको छ ।

प्रकाशित मिति: बुधबार, असोज ५, २०७९ १६:०५