कांग्रेसमा च्याँखे दाउ थाप्नेदेखि अन्तर्घातको डरसम्मः यी हुन् समानुपातिकमा बसेका नेता

कांग्रेसमा च्याँखे दाउ थाप्नेदेखि अन्तर्घातको डरसम्मः यी हुन् समानुपातिकमा बसेका नेता

A+ A A-

सत्तारुढ दल नेपाली कांग्रेसले मंसिर ४ गते हुने प्रतिनिधिसभा र प्रदेशसभा चुनावको लागि सोमबार प्रतिनिधिसभातर्फ ११० र प्रदेशसभातर्फ २२० जनाको नाम आयोगमा बुझायो । नेपाली कांग्रेसका १३ पदाधिकारीमध्ये दुई जना पदाधिकारी समानुपातिकको बन्द सूचीमा परेका छन् ।

सहमहामन्त्रीद्वय फरमुल्लाह मन्सुर र जीवन परियार समानुपातिकमा सिफारिस भएका छन् । मन्सुर बारा- ३ बाट प्रत्यक्षतर्फ उम्मेदवार सिफारिस भएका थिए भने परियार कास्की- १ बाट प्रत्यक्षतर्फ उम्मेदवार सिफारिस भएका थिए । बारा ३ मा मन्सुर अर्का सहमहामन्त्री उमाकामन्त चौधरीबीच टकराव छ । मन्सुर सभापति शेरबहादुर देउवा नजिक छन् भने चौधरी कृष्णप्रसाद सिटौला निकट हुन् । उम्मेदवार सिफारिस गर्दासमेत दुई पक्षबीच विवाद थियो । चौधरी सिटौला समूहबाट प्राथमिक सूचीका उम्मेदवार हुन् । ०७४ को चुनावमा मन्सुर तेस्रो बनेका थिए ।

अर्का सहमहामन्त्री जीवन परियारले प्रदेशसभा लडेका थिए । प्रदेशसभा लड्ने एक्ला दलित उम्मेदवार थिए । कास्की १ क बाट दीपक कोइरालासँग पराजित भएका थिए । परियारसहित दर्जन हाराहारीमा आकांक्षी रहँदा व्यवस्थापन गर्न गाह्रो हुने थियो । सहमहामन्त्री परियार प्रत्यक्षमा नबस्दा अन्यले अवसर पाउने भएका छन् ।

पूर्वउपसभापति विमलेन्द्र निधिको नाम पनि समानुपातिक सूचीमा समावेश छ । उनी २०७४ मा धनुषा- ३ मा राजेन्द्र महतोसँग पराजित भएका थिए । महतो हाल लोकतान्त्रिक समाजवादी पार्टीका नेता छन् । ०७४ मा महतोले ३० हजार ७२५ मत ल्याएर विजयी हुँदा निधिले २७ हजार ८४७ मत ल्याएका थिए ।

कांग्रेस सभापतिसमेत रहेका प्रधानमन्त्री शेरबहादुर देउवाले लोसपाका अध्यक्ष महन्थ ठाकुर र नेता राजेन्द्र महतोलाई चुनावी क्षेत्र छाड्नुपर्ने हुन सक्ने बताइरहेका थिए ।

स्थानीय चुनावमा जनकपुरधाम उपमहानगरपालिकामा गठबन्धनको तर्फबाट जनता समाजवादी पार्टीले उम्मेदवार उठायो । तर, त्यसप्रति असन्तुष्टि जनाउँदै निधिनिकट मनोजकुमार साहले स्वतन्त्र उम्मेदवारी दिएर जिते । यो परिणामलाई जसपाले निधिले दिएको धोकाको रूपमा बुझेको छ । अहिले आफू प्रतिनिधिसभाको उम्मेदवार बन्दा धनुषामा त्यही धोका आफूतिर फर्किने डरमा निधि छन् । जसका कारण उनले यसपटक समानुपातिक रोजेको बुझ्न गाह्रो छैन ।

नेता गोपालमान श्रेष्ठको नाम पनि समानुपातिकतर्फ बन्दसूचीमा समावेश रहेको छ । ०७४ को चुनावमा श्रेष्ठ स्याङ्जा- २ मा पराजित भएका थिए । एमालेकी पद्मा अर्यालले ३५ हजार १४२ मत पाइन् भने श्रेष्ठले ३१ हजार ४३६ मत ल्याए । उनको नाम समानुपातिकमा सिफारिस भएको थियो । ०७४ मा अर्का नेता मोहन पाण्डेलाई समानुपातिकमा राखेर प्रत्यक्षमा टिकट लिएका श्रेष्ठ यो पटक पाण्डेको पल्ला भारी हुने देखेर पछि हटेका हुन् ।

प्रधानमन्त्री शेरबहादुर देउवfकी पत्नि तथा केन्द्रीय सदस्य आरजु राणा देउवा पनि समानुपातिकमा बसेकी छन् । उनी कैलाली- ५, बाँके- ३, बागलुङ- २ बाट प्रत्यक्षतर्फ र डडेल्धुराबाट समानुपातिकतर्फ सिफारिस भएकी थिइन् । ०७४ मा आरजु कैलाली ५ बाट पराजित भएकी थिइन् । एमालेका उम्मेदवार नारदमुनि राना २७ हजार २०२ मतसहित विजयी हुँदा राणाले २२ हजार ३२२ मत ल्याएकी थिइन् । राना एमालेबाट एकल सिफारिसमा परेका छन् ।

प्रधानमन्त्री देउवाको शासकीय काममा हस्तक्षेप गरेर विवादास्पद निर्णय गराउने गरेको भन्दै पार्टीभित्र र बाहिरबाट आलोचना बढिरहँदा उनी समानुपातिकमा बसेकी छन् । स्थानीय चुनावमा सित्तैमा मलेसिया रोजगारको लागि पठाइदिने तथा कांग्रेसको सरकार नभएको ठाउँमा बजेट नपठाउने भन्दै भाषण गरेपछि उनको आलोचना भएको थियो । एक ठाउँमा गएर यस्तै प्रकृतिको भाषण गर्दा देशभर माहोल बिग्रने डर पनि कांग्रेसमा थियो । लड्ने तयारी गरेको कैलाली- ५ बाटै कांग्रेस नेता पुष्करनाथ ओझाले उम्मेदवारी दिने तयारी गरिरहेको र उनलाई बालुवाटारले मनाउन नसक्नु आरजु पछि हट्नुको अर्को कारण हो । ओझाको टिकट खोसेर ०७४ मा आरजु उम्मेदवार बनेकी थिइन् । कैलालीमा नागरिक उन्मुक्ति पार्टीको मत परिणामले पनि आरजुलाई पछि हट्न बाध्य पार्ने कारणमध्ये एक हो ।

कांग्रेस प्रवक्ता डा. प्रकाशशरण महत पनि समानुपातिक सिफारिसमा परेका छन् । प्रत्यक्ष चुनाव जित्न नसकेका उनी यसपटक नुवाकोट १ बाट उम्मेदवार बन्न चाहन्छन् । गठबन्धन हुँदा सहज रूपमा जित हात पार्ने हुँदा उनले पार्टी र गठबन्धनमा लबिङ गरिरहेका छन् । सके नुवाकोट जाने नसके समानुपातिकमा रहने उनको इच्छा छ । ०७४ को चुनावमा उनी काठमाडौं ५ मा एमालेका ईश्वर पोखरेलसँग पराजित भएका थिए । पोखरेलले २३ हजार २९ मत ल्याएर विजयी हुँदा महतले १३ हजार १६९ मत ल्याएका थिए । असोज १६ गतेसम्म उम्मेदवारको क्लस्टर मिलाउने समय भएकाले नाम हटाउन मिल्नेगरी उनी समानुपातिकमा बसेका हुन् । प्रत्यक्षमा स्थान पाए उनी समानुपातिकबाट पछि हट्नेछन् । माओवादीका हितबहादुर तामाङ आकांक्षी रहँदा उनलाई अप्ठेरो परेको देखिन्छ ।

नुवाकोटका अर्का नेता अर्जुननरसिंह केसीको पनि अवस्था उस्तै छ । नुवाकोट- २ बाट प्रत्यक्ष चुनाव लड्ने इच्छा गरिरहेका केसी पार्टीबाट समानुपातिकमा सिफारिसमा परेका थिए । उनलाई संस्थापन समूहमा रहेका देउवाका विश्वासपात्र बहादुरसिंह लामाले टक्कर दिइरहेका छन् । ०७४ मा समानुपातिकबाट सांसद बनेका लामालाई पार्टी विधानले समानुपातिकमा बस्न नदिएपछि प्रत्यक्ष चुनाव लड्दैछन् । ०७४ मा एमालेका उम्मेदवार नारायण खतिवडाले ३६ हजार ८९२ मत ल्याएर विजयी हुँदा केसीले २६ हजार ३३५ मत ल्याएका थिए ।

रामशरण महत नुवाकोट- १ बाट समानुपातिकमा सिफारिस भएका छन् । प्रत्यक्ष चुनाव लड्न स्वास्थ्यले साथ नदिने भएपछि संसदभित्र आवश्यक व्यक्तित्व भनेर समानुपातिकमा महत परेका हुन् । प्रत्यक्ष र समानुपातिक दुवैमा सिफारिस उनी कांग्रेसले जोगाउनै पर्ने तर ठाउँ दिन मुस्किल पर्ने नेता हुन् । ०७४ मा माओवादी उम्मेदवार हितबहादुर तामाङसँग पराजित भएका थिए । अम्बिका बस्नेत, प्रतिमा गौतम, आनन्द ढुंगाना, गोविन्द भट्टराई लगायतका केन्द्रीय नेताहरू पनि समानुपातिक सूचीमा छन् ।

प्रकाशित मिति: बुधबार, असोज ५, २०७९ ०६:१५