भत्ता नपाउँदा राष्ट्रिय बीमा कम्पनीका कर्मचारीले वार्षिकोत्सव रोके

A+ A A-

भत्ता नपाउँदा राष्ट्रिय बीमा कम्पनीका कर्मचारीले कम्पनीको वार्षिकोत्सव नै रोकेका छन् । भत्ता नपाए कम्पनीको वार्षिकोत्सव कार्यक्रममा उपस्थित नहुने कर्मचारीको धम्कीपछि वार्षिकोत्सव कार्यक्रम रोकिएको हो ।

कम्पनीले अगामी शनिवार ५४औं वार्षिकोत्सव कार्यक्रम गर्न लागेको थियो । करिब ६ वर्षअघि राष्ट्रिय बीमा संस्थानबाट निर्जीबन बीमा व्यवसाय गर्नको लागि राष्ट्रिय बीमा कम्पनीको रुपमा बेग्लै कम्पनी स्थापना भएको थियो ।

कम्पनीको कर्मचारी विनियमावलीमा वार्षिकोत्सवमा एक महिना बराबरको भत्ता दिने उल्लेख भएपनि अर्थमन्त्रालयले त्यस्तो भत्ता रोकेको कारण देखाउँदै सत्तारुढ नेकपा निकट कर्मचारी संगठनले वार्षिकोत्सव कार्यक्रम स्थगित गर्न व्यवस्थापनलाई दवाब दिएको छ ।

संगठनले विहीबार र शुक्रबार कम्पनीका प्रमुख कार्यकारी अधिकृत डा. डिल्लीराज अर्यालको कार्यकक्षमा धर्ना दिएको छ । कर्मचारी विनियमावलीमा भएको व्यवस्था अनुसार १ महिनाको तलब बराबर वार्षिकोत्सव भत्ता पाउनु पर्ने संगठनको माग छ ।

कम्पनीको संचालक समिति अध्यक्ष उमेशचन्द्र उपाध्यायले वार्षिकोत्सव कार्यक्रम मनाउने विषयमा आफूलाई कुनै जानकारी प्राप्त नभएको प्रतिक्रिया दिए ।

‘म कम्पनीको दैनिक प्रशासनिक काममा संलग्न छैन, वार्षिकोत्सव कार्यक्रम मनाउने नमनाउने विषयमा मलाई केही जानकारी भएन, अहिलेसम्म मलाई केही खबर पनि आएको छैन,’ अध्यक्ष उपाध्यायले शुक्रवार शिलापत्रसँग भने ।

कम्पनीका प्रमुख कार्यकारी अधिकृत डा. अर्यालले ‘बेग्लै किसिमले’ वार्षिकोत्सव कार्यक्रम मनाउने तयारी भएको वताए ।

कर्मचारी संगठनका अनुसार कर्मचारी विनियमावलीमा वार्षिकोत्सव भत्ता मासिक एक महिनाको तलब बराबर दिने व्यवस्था छ । तर, अर्थमन्त्रालयले गत फागुन अन्तिम साता कम्पनीलाई पत्र लेख्दै विनियमावलीमा लेखिएका सुविधाहरु पनि अर्थमन्त्रालयको स्वीकृति लिएर मात्रै दिन कम्पनी र व्यवस्थापनलाई निर्देशन दिएको थियो ।

अर्थले दिएको निर्देशनमा मन्त्रालयको स्वीकृति बेगर सुविधा दिए सुविधाको स्वीकृति दिने अधिकारीबाट असुल उपर गर्ने भनिएको छ । सोही निर्देशनपछि कम्पनीले कर्मचारीलाई वार्षिकोत्सव भत्ता नदिने वताएको थियो । तर, मन्त्रीस्तरीय निर्णयबाट कार्यान्वयनमा आएको विनियमावलीलाई सचिव स्तरीय निर्णय गरेर काट्न नमिल्ने भन्दै कर्मचारी संगठन आन्दोलित बनेको हो ।

प्रकाशित मिति: शुक्रबार, साउन १७, २०७६ २२:५०