चोलेन्द्रकी छोरी भन्छिन्– हाम्राे जीवन रक्षाका लागि नेपाली जनताले पहल गर्नुपर्‍यो (भिडियाे)

चोलेन्द्रकी छोरी भन्छिन्– हाम्राे जीवन रक्षाका लागि नेपाली जनताले पहल गर्नुपर्‍यो (भिडियाे)

A+ A A-

निलम्बित प्रधानन्यायाधीश चोलेन्द्रशमशेर राणाकी छोरी सुनिधीले आफ्नो परिवारको जीवन रक्षाका लागि पहल गरिदिन नेपाली जनतासँग आग्रह गरेकी छन् । राणाकी छोरी सुनिधिले आफूहरूको परिवारलाई सरकारले नजरबन्दमा राखेर अत्याचार गरेको भन्दै बाँच्न पाउने आफूहरूको अधिकार सुरक्षित गर्न पनि नेपाली जनताले साथ दिनुपर्ने बताएकी छन् ।

आइतबार अपराह्न बालुवाटारस्थित प्रधानन्यायाधीशको निवासबाट गाडीमा बाहिर निस्कने क्रममा उनले आफूहरूलाई गठबन्धन सरकारले बाहिर निस्कन र भित्र पस्नसमेत नदिएर अत्याचार गरेको भन्दै नेपाली जनताको साथ चाहिएको बताइन् ।

देशको माया हुने, अदालतको माया हुने जो कोहीले पनि आफूहरूलाई साथ दिएर सरकारको दमनबाट उन्मुक्ति दिलाइदिन उनले आग्रह गरेकी छन् । स्कुुलमा रहेको बच्चा ल्याउने नदिने, औंषधि ल्याउन पनि नदिने गरी प्रहरीहरू सरकारले परिचालन गरेको उनको दुःखेसो छ ।

हामीमाथि सरकारले आफ्नो पावर देखाएर किन यस्तो अराजकता फैल्याएको छ ? भन्ने कुरा आफूहरूले बुझ्न नसकेको उल्लेख गर्दै सुनिधिले त्यसबारे तथ्य बुझ्न पनि नेपाली जनतालाई आग्रह गरिन् । उनले भनिन्, ‘हामीलाई बाहिर निस्कन पनि दिइराखेको छैन । बच्चाहरू स्कुलमा लिन जानुपर्छ । एउटा बच्चा लिई आइराखेको बेलामा उसलाई पनि समातेर लगेर थुनिदियो ।’

सुनिधिका अनुसार स्कुलको बच्चा लिन गएकी सहयोगीलाई पनि प्रहरीले नियन्त्रणमा लिएर सोधपुछ गरेको छ । यसैबीच, निलम्बित प्रधानन्यायाधीश राणा अस्वस्थ भएको बुझिएको छ । छोरी सुनिधिका अनुसार उनलाई सञ्चो नभएको हो । प्रहरीले राणाको उपचारका लागि औंषधि ल्याउन समेत नदिएको बताइएको छ ।

निलम्बित प्रधानन्यायाधीश राणाले आफूमाथि प्रतिनिधिसभामा लगाइएको महाअभियोग पुष्टि नभएको भन्दै आइतबार बिहान १० बजे सर्वोच्च अदालतमा काममा फर्कने तयारी गरेका थिए । तर सरकारले नजरबन्दमा राखेर जान नदिएको परिवारले बताएको छ ।

प्रकाशित मिति: आइतबार, असोज २, २०७९ १८:०१