फेरि स्थगित भयो ७० अंक आए पास हुने ट्रायलको नियम, कहिलेदेखि होला लागू ?

A+ A A-

बागमती प्रदेशमा असोजदेखि लागू गर्ने भनिएको ७० अंक आए पास हुने सवारीचालक अनुमतिपत्र परीक्षा सञ्चालन निर्देशिका २०७७ तत्काल लागू नहुने भएको छ ।

३१ भदौमा श्रम, रोजगार तथा यातायात मन्त्रालय बागमतीले निर्देशिका तत्काल लागू नगर्ने व्यहोराको पत्र पठाएका कारण स्थगित गरिएको यातायात व्यवस्था कार्यालय, सवारी चालक अनुमति पत्र, चावहिलका कार्यालय प्रमुख विष्णु कुमार भट्टराईले जानकारी दिए ।

‘यही महिनादेखि लागू गर्ने निर्देशन थियो । फेरि अस्ति मन्त्रालयले चिट्ठी पठाएर तत्काल लागू नगर्न भनेको छ । त्यसैले अहिलेका लागि पुरानै निर्देशिका अनुसार परीक्षा सञ्चालन गराइरहेका छौँ,’ उनले शिलापत्रसँग भने । यातायात कार्यालयहरूले कार्यालयमा सेवाग्राहीको अत्यधिक चाप भएकाले केही समय नयाँ निर्देशिका लागू नगर्न आग्रह गरेकाले केही समयलाई स्थगित गरिएको श्रम रोजगार तथा यातायात मन्त्रालयका प्रवक्ता हरिहर पोख्रेलले जानकारी दिए ।

‘यातायात कार्यालयहरूले तत्कात लागू गर्न नसकिने भनेकाले स्थगित गरेका हौँ । अब दसैँ-तिहारपछि मात्रै लागू हुन्छ होला,’ उनले भने । यातायात व्यवस्था विभागले चैत २०७७ मै निर्देशिका जारी गरे पनि तयारी नपुगेको भन्दै बागमती प्रदेशले निर्देशिका लागू गरेको थिएन ।

निर्देशिका जारी भएको डेढ वर्षपछि २३ साउन २०७९ मा भौतिक पूर्वाधार तथा यातायातमन्त्री मोहम्मद इस्तियाक राईले निर्देशिका लागू गर्न पहल कदम चालेका थिए । उनले सातै प्रदेशका यातायातमन्त्रीहरूलाई निर्देशिका लागू गर्न सहमत गराएका थिए । अव्यावहारिक प्रयोगात्मक परीक्षाका कारण सेवाग्राही सानो गल्तीमा पनि फेल भई विचौलियाको चङ्गुलमा फस्ने भन्दै यातायात व्यवस्था विभागका तत्कालीन महानिर्देशक नमराज घिमिरेले निर्देशिका संशोधन गर्न पहल गरेका थिए ।

कसरी दिइन्छ अंक ?

सवारीचालक अनुमतिपत्र परीक्षा सञ्चालन कार्यविधि निर्देशिका, २०७७ (संशोधित) अनुसार परीक्षार्थीहरू सानो गल्तीमा फेल हुने छैनन् । परीक्षार्थीले लिखित परीक्षामा १०० पूर्णाङ्क ६० अंक ल्याउनुपर्छ भने प्रयोगात्मक परीक्षा (ट्रायल)लाई सातवटा चरणमा छुट्याइएको छ । यी सात चरण कटाउँदा परीक्षार्थीले ७० अंक ल्याउनुपर्नेछ ।

ट्रायलमा कसरी हुन्छ पास/फेल ?

ए र के वर्ग (मोटरसाइकल र स्कुटर)को हकमा पहिलो चरणको घुमाउरो ८ को अंकभार २० कायम गरिएको छ । एकपटक अंकित रेखा छोएमा ५ र एकपटक खुट्टाले भुईंमा टेकेमा ५ अंक काटिनेछ । त्यस्तै, एकपटकभन्दा धेरै अंकित रेखा छोएमा, सवारीको टायर अंकित रेखाभन्दा बाहिर गएमा, एकपटकभन्दा धेरै खुट्टाले भुईंमा टेकेमा, ठीक दिशा वा ठीक तरिकाबाट ८ नघुमाएमा र सवारीको स्टार्ट बन्द भएको अवस्थामा भने परीक्षार्थीलाई अनुत्तीर्ण घोषणा गरिनेछ ।

दोस्रो चरणको साँघुरो फलेकको अंकभार १० कायम गरिएको छ । यो चरणमा खुट्टाले भुईंमा टेकेमा र फलेकको लम्बाइ पार गर्नुअगावै सवारी फलेकबाहिर निस्केमा परीक्षार्थीलाई अनुत्तीर्ण घोषणा गरिनेछ ।

त्यस्तै, तेस्रो चरणको यू–टर्नको अंकभार १० कायम गरिएको छ । यसमा इन्डिकेटर लाइट नबालेमा १० अंक घटाइनेछ भने अंकित रेखा छोएमा अनुत्तीर्ण घोषणा गरिनेछ ।

चौथो चरणको ट्राफिक संकेतको अंकभार १५ छ । संकेत पालना नगरे १५ नम्बर घटाइनेछ भने फेल भने हुने छैन ।

त्यसैगरी, पाचौँ चरणमा रहेको बम्पसको अंकभार १५ छ । यसमा एकपटकसम्म खुट्टाले भुईंमा टेकेमा ५ र एकपटकसम्म स्टार्ट बन्द भएमा ५ अंक काटिनेछ । त्यस्तै, एकपटकभन्दा धेरै खुट्टाले भुईंमा टेकेमा र एकपटकभन्दा धेरै स्टार्ट बन्द भएमा अनुत्तीर्ण घोषणा गरिनेछ ।

छैटौँ चरणमा रहेको र्‍याम्प (उकालो÷ओरालो) को अंकभार २० छ । यसमा तोकिएको रेखा नाघी सवारी रोकेमा वा नरोकी अघि बढेमा, रोकिएको अवस्थामा सवारी अगाडि र पछाडिको टायर ६ इन्चभन्दा धेरै सरेमा, उकालो पार गरी ओरालो झर्ने क्रममा रेखा नाघी सवारी रोकेमा वा सवारी नरोकी अघि बढेमा र एक पटकभन्दा धेरै स्टार्ट बन्द भएमा परीक्षार्थी फेल हुनेछ ।

त्यस्तै, अन्तिम चरणमा परीक्षार्थीको व्यावहारिक पक्षको समग्र मूल्याङ्कनका लागि अंकभार १० कायम गरिएको छ । यसमा सवारी चलाउनुपूर्व ब्रेक, टायर र ऐनाहरूमा सामान्य निरीक्षण नगरे ३, हेल्मेटको लक नलगाई सवारी चलाए ४ र अस्वाभाविक गतिमा वा असंयमित रूपमा सवारी चलाए ३ नम्बर काटिनेछ ।

बी क्याटगोरी (कार, जिप भ्यान) का लागि पनि सातवटा चरण बनाएको छ । पहिलो चरणको घुमाउरो ८ को अंकभार २० छ । यसमा दुई पटकसम्म अंकित रेखा छोएमा ५÷५ अंक काटिनेछ ।

त्यस्तै, एक पटकभन्दा धेरै अंकित रेखा छोएमा, सवारीको टायर अंकित रेखाभन्दा बाहिर गएमा, ठीक दिशा वा ठीक तरिकाबाट ८ नघुमाएमा, अगाडि बढ्ने क्रममा सवारीलाई पछाडि सारेमा भने परीक्षार्थीलाई अनुत्तीर्ण गरिनेछ ।

त्यसैगरी, दोस्रो चरणको उबडखाबडको अंकभार १० कायम गरिएको छ । यसमा एकपटकसम्म स्टार्ट बन्द भएमा ५ अंक काटिनेछ भने एकपटकभन्दा धेरै स्टार्ट बन्द भएका परीक्षार्थीलाई फेल गरिनेछ ।

तेस्रो चरणमा यू–टर्नको अंकभार १० छ । यसमा ट्रेनिङ इन्डिकेटर लाइट नबालेमा १० अंक घटाइनेछ भने अंकित रेखा छोएमा अनुत्तीर्ण गरिनेछ । त्यस्तै, चौथो चरणको ट्राफिक संकेतको अंकभार १५ कायम गरिएको छ । संकेत पालना नगरे १५ नम्बर घटाइए पनि फेल भने नगरिने बताइएको छ ।

पाचौँ चरणमा रहेको ¥याम्प (उकालो÷ओरालो) को अंकभार १५ छ । यसमा तोकिएको रेखा नाघी सवारी रोकेमा वा नरोकी अघि बढेमा, रोकिएको अवस्थामा सवारी अगाडि र पछाडिको टायर ६ इन्चभन्दा धेरै सरेमा, उकालो पार गरी ओरालो झर्ने क्रममा रेखा नाघी सवारी रोकेमा वा सवारी नरोकी अघि बढेमा र एक पटकभन्दा धेरै स्टार्ट बन्द भएमा परीक्षार्थी फेल हुनेछ ।

छैटौँ चरणमा रहेको ग्यारेज पार्किङको अंकभार २० छ । यसमा सवारीलाई पछाडि गुडाउने क्रममा एकपटकसम्म अगाडि सरेमा १० नम्बर काटिनेछ भने पछाडि गुडाउने क्रममा एकपटकभन्दा धेरै अगाडि सरेमा र अंकित रेखा छोएमा परीक्षार्थी फेल हुनेछ ।

त्यसैगरी, सातौँ र अन्तिम चरणमा परीक्षार्थीको व्यावहारिक पक्षको समग्र मूल्याङ्कनका लागि अंकभार १० कायम गरिएको छ । यसमा सवारी चलाउनुपूर्व ब्रेक, टायर र ऐनाहरूका सामान्य निरीक्षण नगरे, सिटबेल्ट नलगाई चलाएमा ४ र अस्वाभाविक गतिमा वा असंयमित रूपमा सवारी चलाएमा ३ नम्बर काटिनेछ ।

प्रकाशित मिति: आइतबार, असोज २, २०७९ १७:३०