नवौँ राष्ट्रिय खेलकुदः पोखराका पार्टी प्यालेसदेखि रंगशालासम्म हुँदै छन् खेल

नवौँ राष्ट्रिय खेलकुदः पोखराका पार्टी प्यालेसदेखि रंगशालासम्म हुँदै छन् खेल

A+ A A-

गण्डकी प्रदेशमा आगामी २८ असोजदेखि ३ कात्तिकसम्म हुने नवौँ राष्ट्रिय खेलकुद प्रतियोगिताको खेल स्थल र समय तय भएको छ । राष्ट्रिय खेलकुद परिषद्ले प्रदेशका ११ जिल्लामध्ये अधिकांश खेल राजधानी पोखरामा गर्ने गरी बुधबार पत्रकार सम्मेलन गरेर खेल स्थान र तालिका सार्वजनिक गरेको हो ।

राष्ट्रिय खेलकुद खेलाडीको सपना र खेलाडी उत्पादनको कारखाना हो । यो खेल क्षेत्रको ठूलो महोत्सव पनि हो । तर, अबको २९ दिनमा सुरु हुने यो प्रतियोगितालाई तय गरिएका खेलस्थलले नेपालको खेल पूर्वाधारको दुर्दशा छर्लंग पारेको छ । अधिकांश खेलका लागि छुट्टै खेल मैदान नहुँदा पोखरामा हुने नवौँ राष्ट्रिय खेलकुदका लागि निजी विद्यालयका पूर्वाधारदेखि पार्टी प्यालेसम्म प्रयोग हुँदै छन् । पोखरा रंगशालाको कवर्डहल, विद्यालयको मैदान, प्रदर्शनी हल र पार्टी प्यालेसमा खेल हुने छन् ।

प्रतियोगितामा हुने ३६ खेलमध्ये एथलेटिक्स, ब्याडमिन्टन, क्रिकेट महिला, टेनिस, बक्सिङ, ह्याण्डबल महिला–पुरुष, आर्चरी, जुडो, जिम्नास्टिक, भलिबल पुरुष, फेन्सिङ, उसु, स्क्वास, बास्केटबल पुरुष, फुलकन्ट्याक्ट कराँते, शारीरिक सुगठन, पौडी, टेबल टेनिस, हक्की, भारत्तोलन, गल्फ, साइक्लिङ, ट्रायथोलन, कुस्ती, कबड्डी, प्याराग्लाइडिङ, खो–खो पोखरामै गर्ने तय भएको छ । कबड्डी पोखराको रानीपौवास्थित रञ्जित पार्टी प्यालेसमा हुँदैछ ।

आईटीएफ टेक्वन्दो बागलुङमा, कराँते पर्वतमा, तेक्वान्दो म्याग्दीमा, कुस्ती नवलपुरमा, सुटिङ काठमाडौंमा, सेपाक्टाक्रो महिला–पुरुष नवलपुरमा, बुद्धिचाल गोरखामा र महिला भलिबल म्याग्दीमा हुनेछ । पुरुष क्रिकेट भने २३ भदौदेखि काठमाडौंमा जारी छ ।

गण्डकीको मनाङ, मुस्ताङ, लमजुङ र तनहुँमा भने कुनै खेल हुने छैन । स्याङ्जामा पनि कुनै खेल हुने÷नहुने अन्योल छ । स्याङ्जाको वालिङमा महिला फुटबल प्रतियोगिता हुन सक्ने भए पनि पक्का भइनसकेको प्रतियोगिता खेलस्थल व्यवस्थापन उपसमिति संयोजक राजेश गुरुङले बताए । ‘अहिले स्याङ्जामा खेल स्थल निर्माण भइरहेको छ । त्यहाँ पूर्वाधार तयार नभएको अवस्थामा हामीले पोखरामा गर्ने छौँ,’ उनले भने ।

प्रतियोगिताको मूल ट्रफी शुक्रबार प्रधानमन्त्री शेरबहादुर देउवाले सार्वजनिक गर्ने कार्यतालिका छ । असोज १ गते सुदुरपश्चिम प्रदेशबाट ट्रफी प्रदर्शनी र्‍याली सुरु गर्ने, क्रमशः सबै प्रदेश र तीन विभागीय टोलीसम्म पुर्‍याइने प्रचारप्रसार उपसमिति संयोजक दिपेन्द्र विष्टले जानकारी दिए ।

२०७६ साल वैशाखमा लुम्बिनी प्रदेशमा आठौं राष्ट्रिय खेलकुद प्रतियोगिता भएको थियो । त्यही संस्करणको समापन समारोहमा गण्डकी प्रदेशले नवौं आयोजनाको जिम्मेवारी पाएको थियो । २०७७ सालको अन्त्यतिर हुनुपर्ने नवौं संस्करण कोरोना भाइरस संक्रमणको जोखिम बढ्दा स्थगित हुँदै आएको थियो ।

राष्ट्रिय खेलकुद गण्डकीको भूगोलमा हुन लागेको यो दोस्रो पटक हो । यसअघि २०४० साल १२ देखि २० चैतसम्म दोस्रो राष्ट्रिय खेलकुद प्रतियोगिता पोखरामा भएको थियो । त्यतिबेला २१ खेलमा १४ अञ्चलका २५ सय खेलाडी सहभागी थिए ।

नवौँ राष्ट्रिय खेलकुद प्रतियोगितामा ३ सय ९३ स्वर्ण, ३ सय ९३ रजत र ६ सय कास्य पदकका लागि प्रतिस्पर्धा हुनेछ । त्यसमा साढे सात हजार खेलाडी सहभागी हुने छन् ।

प्रतियोगितामा सात प्रदेश, नेपाली सेना, नेपाल प्रहरी, सशस्त्र प्रहरी बल र गैरआवासीय नेपाली संघ (एनआरएन)का खेलाडीबीच प्रतिस्पर्धा हुनेछ ।