व्यवस्थापन गर्न नजान्दा भीआईपीको सवारीमा जनतालाई सास्ती

A+ A A-

‘करोडौको गाडीमा सानदार सवारी, बाटो खाली हुनुपर्ने आउदा तिनको गाडी
जनतालाई घन्टौं उभ्याउछन् तातो घाम अगाडि, आफै राजा भा’का छन् राजतन्त्र फाली ’

माथिका हरफ र्‍यापर शैलेश निरौलाको र्‍यापको अंश हो । र्‍यापमा निरौलाले भीआईपीको सवारी हुँदा सर्वसाधरणले भोग्नुपर्ने समस्या व्यक्त गरेका छन् । ३५ लाखभन्दा धेरैले हेरेको यो र्‍यापमा धेरैले नेपाली जनताले भोग्नुपरेको वास्तविक समस्या भन्दै कमेन्ट गरेका छन् ।

काठमाडौंवासीले पछिल्लो समय शैलेशले र्‍यापपमा भनेझै समस्या भोगिरहेका छन् । नेपाल भ्रमणमा रहेका चीनको राष्ट्रिय जनकांग्रेस स्थायी समितिका अध्यक्ष ली चान्सुकाे उच्चस्तरीय राजनीतिक भेटघाट क्रममा काठमाडौंको सवारी आवागमन अस्तब्यस्त भयाे ।

विदेशी पाहुना मात्र होइन राष्ट्रपतिको सवारी हुँदा पनि सर्वसाधरणले यस्तै सास्ती खेप्नुपर्ने अवस्था छ । सर्वसाधरणलाई सास्ती नदिई भीआईपीको सवारी गराउन सकिँदैन त ? यसको व्यवस्थापनको पाटो के हुन सक्छ ? हामीले यो प्रश्न केही विज्ञहरूलाई राख्यौं ।

भीआईपीको सवारीमा पूर्वाधारको अभावभन्दा पनि व्यवस्थापनको कमीले सर्वसाधरणले सास्ती खेप्नुपरेको पूर्वाधारविद् किशाेर थापा बताउँछन् । ‘विकशित देश जस्तो पूर्वाधार त नहोला तर भएकैलाई उचित व्यवस्थापन गर्न सकिएन । विदेशतिर भीआईपीको सवारीमा आम जनताको गाडी त चलिरहेकै हुन्छन्,’ उनले भने, ‘कुनै भीआईपीलाई ठूलै सुरक्षा दिनुपर्ने छ भने पनि सूचना प्रविधिको विभिन्न माध्यमबाट सूचना दिन सकिन्छ । यो रुटमा यति बजेदेखि यति बजेसम्म सडक अवरुद्ध हुन्छ भनेर मोवाइलमा म्यासेज, एफएम रेडियोमा सूचना दिन त सकिन्छ नि !’

प्रसाशनले केही सामान्य कुरामा ध्यान दिएको भए सर्वसाधरणले यस्तो समस्या भोग्नुनपर्ने यातायातविद् आशिष गजुरेल बताउँछन् । भीभीआईपी आउँदा उनीहरूले दिएको सेडड्यूलअनुसार वैकल्पिक रुटको प्लान गर्नुपर्ने उनको तर्क छ ।

‘वरिपरि भएका वैकल्पिक बाटो पहिचान गरी २/३ दिन अघि नै सर्वसाधरणलाई सूचित गर्नुपर्छ । सवारी कम चाप हुने बाटोलाई भीआईपी रुट बनाउनुपर्छ,’ उनले भने, ‘त्यस्तै अफटाइममा मात्र भीआईपि सवारी गराउनुपर्छ र बानेश्वरको जस्तो सडकमा आधा सडक भीआईपीका लागि छुट्याउने र आधा सर्वसाधरणका लागि निर्वाध चल्न दिनुपर्छ।’

भीआईपीको सवारीमा प्रहरी प्रसाशनको व्यवस्थापनमा कमजोरी रहेको विज्ञहरूको तर्कमा आंशिक सत्यता भए पनि पूरै दोष भने लगाउन नमिल्ने पूर्वडीआईजी केशव अधिकारीको तर्क छ । ‘व्यवस्थापकीय क्षमता विकास गर्नका लागि स्रोत साधनहरूको पनि जोहो गरिदिनुपर्‍याे नि, यातायात नीति नै अबैज्ञानिक छ । २०४९ को यातायात व्यवस्था ऐनले कसरी व्यवस्थापन गर्ने,’ उनले भने ‘१०/१५ लाख सवारी साधन हुँदा जति ट्राफिक जनशक्ति थियो अहिले २१/२२ लाख हुँदा पनि त्यति नै छ । अनि यति जनशक्तिले कति सवारी साधनलाई ड्राइभट गर्न सक्नु ।’

सडकलाई चाहिने पूर्वाधार(सडक फर्निचर) को पनि कमी रहेको उनी बताउँछन् । प्रसाशनले केही कुरामा भने कमजोरी गरेको उनी स्वीकार्छन् । ‘जोर बिजोर प्रणली लागू गरेको भए पनि त यति धेरै समस्या पर्थेन । त्यस्तै सूचना राम्रोसगँ प्रवाह भएन र सर्वसाधरणलाई धेरै बेर पनि रोकेर राखियो,’ उनले भने ‘सर्वसाधरणमा ट्राफिक सचेतना कम भएको कारण पनि धेरै बेर रोक्नुको विकल्प छैन।’

भीआईपीको सवारीमा ट्राफिक प्रहरी, सरकार र जनता आफ्नै कारणले पनि सर्वसाधरणले दु:ख पाइरहेको उनको तर्क छ ।

प्रकाशित मिति: बुधबार, भदौ २९, २०७९ १९:०६