हरित ऊर्जाको विकास र प्रवर्द्धनमा सरकार प्रतिबद्ध छः ऊर्जामन्त्री भुसाल

A+ A A-

ऊर्जा, जलस्रोत तथा सिँचाइमन्त्री पम्फा भुसालले जलविद्युत् आयोजनासँग जोडिएका प्राविधिक, वित्तीय, पर्यावरणीय, प्राकृतिक प्रकोपलगायतका जोखिमको प्रभावकारी व्यवस्थापन गर्नुपर्ने बताएकी छन् ।

नेपाल हाइड्रोपावर एसोसिएसन र इन्टरनेसनल हाइड्रोपावर एसोसिएनले आयोजना गरेको अन्तर्राष्ट्रिय सम्मेलनको सोमबार उद्घाटन गर्दै भुसालले जलविद्युत् आयोजनाको दिगो विकासका लागि भरपर्दो र बलियो संरचना निर्माण गर्न, वातावरणलाई न्युन असर गर्दै प्रभावित समुदायको जीवनस्तरलाई गुणस्तरीय बनाउन सरकार लागिपरेको बताइन् । जनताको गुणस्तरीय जीवनका लागि आवश्यक कानुन, निर्देशिका र मापदण्ड तयार गरी लागु गरेको उनको भनाइ छ ।

‘हरित ऊर्जा, विशेषगरी जलविद्युत् र नवीकरणीय ऊर्जाको दिगो विकासका लागि अन्तर्राष्ट्रिय अनुभव र अभ्यास, नयाँ प्रविधिको विकाससमेतलाई ध्यानमा राख्दै अख्तियार गर्नुपर्ने कदमबारे छलफल गर्न महत्त्वपूर्ण मञ्चका रूपमा काम गर्नेछ भन्ने विश्वास लिएको छु,’ भुसालले भनिन् ।

जलवायु परिवर्तनका कारण विश्वका धेरै राष्ट्रसँगै नेपालले पनि अप्रत्यासित बाढी पहिरो, भूक्षय जस्ता प्राकृतिक प्रकोप, जैविक विविधतामा ह्रासलगायतका असर भोग्नुपरिरहेको भुसालले बताइन् । सोही कारण दिगो रूपमा जलविद्युत् आयोजनाको विकास, व्यवस्थापन र उपयोग गर्ने विषय अत्यन्त सान्दर्भिक रहेको उनको भनाइ छ ।

किफायति, विश्वसनीय, भरपर्दो र आधुनिक ऊर्जामा सबैको पहुँच सुनिश्चित गर्ने राष्ट्रिय लक्ष्य प्राप्त गर्न पनि जलविद्युत् आयोजनाको दिगो रूपमा विकास गरिनुपर्नेमा उनले जोड दिइन् ।

नेपालमा उपलब्ध प्रचुर जलस्रोतको विकासबाट देशभित्रको नवीकरणीय ऊर्जाको बढ्दो माग पूरा गर्दै बढी भएको स्वच्छ ऊर्जा छिमेकी मुलुकसम्म पुर्‍याउने उनको भनाइ छ ।

प्रकाशित मिति: सोमबार, भदौ २७, २०७९ १७:२५