उदघाटन गर्न धारामा ‘नक्कली पानी’

मछाईनामा बनेका पानी नआउने धारा

A+ A A-

बाजुराकाे बडिमालिका नगरपालिका–९ मछाइना गाउँका ३० घर परिवारले यस वर्ष नगरपालिकासँग खानेपानीको माग गरे । योजना पनि बनाए । तर, पानीको तिर्सना भने मेटिएन ।

योजना पास गर्न खोलाको पानी पाइपमा भरेर धाराको उद्घाटन गरियो । पाइपमा एकपटक भरिएको पानी सकिएपछि धाराको पानी पनि सुक्यो ।

‘पानीको आसमा खोला नजिक बस्यौं । बर्खामा हिलो हुन्छ, खोलाको पानी खान सकिँदैन त्यसैले योजना मागेर धारा बनायौं । पाइप बिच्छायौं,’ स्थानीय अर्जुन चँदारा भन्छन् , ‘उद्घाटनको दिन कोर्दीपानी खोलाको पानी पाइपमा हाली धारामा पानी देखाएर उद्घाटन भयो । तर, अतिथि हिँडेपछि पानी पनि सुक्यो ।’

स्थानीय तहका विकासे योजना कसरी बन्छन् र बजेट कसरी पारित हुन्छ भन्ने एउटा नमुना मात्र हो यो । जिल्लाका अधिकांश योजना बजेट सक्नमै केन्द्रित हुँदा उपभोक्ताहरु मारमा परिरहेका छन् ।

खानेपानीको धारा जडान गरेको भन्दै पाइपमा खोलाको पानी ल्याएर उद्घाटन गरेपछि अहिलेसम्म पानी नआएको स्थानीयको गुनासो छ ।

‘गाउँलेले खेतको पानी खानुको विकल्प छैन । हिउँदमा यो पानी पनि सुक्छ, बाउली खोलाको पानी बोकेर खाने गरेका छौं,’ कुलाको पानी भर्दै गर्दा भेटिएकी हीरा विष्ट भन्छिन्, ‘पानी खान पाउने आशा थियो तर ठूलाबडाले पैसा खाइसके, खाने पानी आएकै छैन ।’

स्थानीय किसन विष्टका अनुसार योजनाअनुसार आफूहरुले तीनवटा धारा बनाएको तर पानी भने अझै नआएको गुनासो गरे । बजेट पारित गराउन पानी नै नआई खोलाको पानी पाइपमा ल्याएर धारो उद्घाटन गरिएको भन्दै उनले दुखेसाे पोखे ।

‘तीन वटा धारा बनायौं, पाइपलाइन पनि खन्यौं तर पानी आएको छैन,’ विष्ट भन्छन् । मार्तडी बृहत् खानेपानी योजनाको भम्की चौरले एक लाइन पानी दिने भने पनि अहिलेसम्म नदिँदा स्थानीय भने वर्षा याममा धमिलो पानी पिउन बाध्य छन् ।

उद्घाटन प्रयोजनका लागि धारामा पानी खसालिएको मछाइना खानेपानी आयोजनाको नाममा नगरपालिकाबाट ५ लाख ८ हजार २५० रुपैयाँ भुक्तानी भएको छ । तर, खानेपानी भने धारामा खसेको छैन । भम्की चौरबाट पानी दिने भनेको पाइपसमेत गाडीले कुल्चेर बिग्रिसकेको छ ।

नगरपालिकाका प्रमुख प्रशासकीय अधिकृत तीर्थराज भट्टराईले भने आफूलाई योजनाबारे पूर्ण रुपमा थाहा नभएको बताए । आफू काठमाडौं गोष्ठीमा गएकोले फर्केर आएपछि छलफल गर्ने उनले बताए ।

स्थानीय तहका इन्जिनियर शंकर पाध्यायले भने आफूहरु जाँदा धारामा पानी आएको देखिएको बताउँदै कसरी धारामा पनी खस्यो भन्ने बारेमा थाहा नभए पनि भुक्तानीका लागि सिफारिस भने गरेको स्वीकार गरे ।

प्रकाशित मिति: बिहीबार, साउन १६, २०७६ २१:३२