दोर्दी कोरिडोर प्रसारण लाइन सञ्चालनमा, ७५ मेगावाट विद्यु्त् जोडिने

A+ A A-

लमजुङको दोर्दी र त्यसका सहायक खोलाहरूबाट उत्पादित विद्युत् प्रवाहका लागि निर्माण गरिएको दोर्दी कोरिडोर १३२ केभी डब्बल सर्किट प्रसारण लाइन सञ्चालनमा आएको छ ।

नेपाल विद्युत् प्राधिकरणले लमजुङको बेँसीशहर नगरपालिकाको उदिपुरबाट दोर्दी गाउँपालिकाको कीर्तिपुर सबस्टेसनसम्मको प्रसारण लाइनमा आइतबारबाट विद्युत् प्रवाह (चार्ज) गरी सञ्चालनमा ल्याएको हो । १३२/११ केभी कीर्तिपुर सबस्टेसन यसअघि आंशिक रूपमा सञ्चालनमा आइसकेको थियो । अब सबस्टेसन पनि पूर्ण क्षमतामा सञ्चालनमा आएको छ ।

प्रसारण लाइन सञ्चालनमा आएसँगै त्यस कोरिडोरमा निजीक्षेत्रले निर्माण गरेका ४ जलविद्युत् आयोजनाको ७२ मेगावाट विद्युत् कीर्तिपुर सबस्टेसनमार्फत राष्ट्रिय प्रसारण लाइनमा प्रवाह हुनेछ ।

प्रसारण लाइनको अभावमा ती आयोजनाको विद्युत् खेर जाने अवस्थाको अन्त्य भएको दोर्दी कोरिडोर प्रसारण लाइन आयोजनाका प्रमुख रमेश पौडेलले बताए । ‘गत वर्षको बाढीले क्षति पुर्‍याएको एउटा टावर निर्माणको अन्तिम चरणमा छ, त्यसैले उदिपुरबाट दोर्दी खोला– १, जलविद्युत् आयोजनासम्म हाम्रो लाइन र त्यहाँबाट कीर्तिपुर सबस्टेसनसम्म दोर्दी खोला– १ को प्रसारण लाइन प्रयोग गरी प्रसारण लाइन सञ्चालनमा ल्याएका छौं’, पौडेलले भने ‘प्रसारण लाइन अभावमा विद्युत् जोड्न नपाउने हो कि भन्ने चिन्ता र चासो त्यस क्षेत्रका निजी लगानीकर्ताहरूलाई थियो, अब कुनै पनि आयोजनाको बिजुली खेर जाँदैन ।’

२७ मेगावाटको दोर्दी खोला, २५ मेगावाटको माथिल्लो दोर्दी ए, १२ मेगावाटको दोर्दी खोला–१ र ८.६३ मेगावाटको चेपेखोला साना जलविद्युत् आयोजनाबाट उत्पादित ७२ मेगावाट विद्युत् राष्ट्रिय प्रसारणमा जोडिनेछ ।

दोर्दी खोलामा निर्माण भएका जलविद्युत् आयोजनाहरूको विद्युत् दोर्दी कोरिडोर प्रसारण लाइनमार्फत उदिपुर सबस्टेसनमा जोडिनेछ । उदिपुर सबस्टेसनको निर्माण केही समय लाग्ने देखिएपछि आयोजनाहरूको विद्युत् वैकल्पिक व्यवस्थामार्फत हाल सञ्चालनमा रहेको मध्यमर्स्याङ्दी विद्युत्‌गृहको स्वीचयार्डमा जोड्ने व्यवस्था गरिएको हो । यसका लागि निर्माणाधीन २२० केभीे मर्स्याङ्दी कोरिडोरको करिब ६ किलोमिटर लाइनलाई प्रयोगमा ल्याइएको छ ।

करिब ८५ करोड रुपैयाँ अनुमानित लागत रहेको दोर्दी कोरिडोर प्रसारण लाइन सरकारको लगानीमा निर्माण गरिएको हो । यसको लम्बाइ १० किलोमिटर छ । आयोजनाले नै कीर्तिपुरमा १३२ केभीको सबस्टेसन निर्माण गरेको हो । निर्माण सम्पन्न भएको प्रसारण लाइनको गत वर्षको असारमा दोर्दी खोलामा आएको बाढीले चारवटा टावर बगाइदिएको थियो । त्यसमध्ये तीनवटा टावर निर्माण सम्पन्न भएको छ भने एउटा अन्तिम चरणमा छ ।

प्रकाशित मिति: आइतबार, भदौ २६, २०७९ १८:३२